હાઈવે પર દોડતી કાર પર અચાનક આકાશમાંથી તૂટી પડ્યું પ્લેન : ડ્રાઈવરના બચાવનો લાઈવ વીડિયો જોઈને રૂંવાડા ઉભા થઈ જશે

અમેરિકાના ફ્લોરિડામાં એક હચમચાવી દે તેવી ઘટના સામે આવી છે જે જોઈને કોઈનો પણ શ્વાસ અદ્ધર થઈ જાય. સામાન્ય રીતે આપણે રોડ પર બે ગાડીઓ વચ્ચેના અકસ્માત વિશે સાંભળતા હોઈએ છીએ પરંતુ અહીં તો ચાલુ ટ્રાફિક વચ્ચે એક કાર પર આખેઆખું પ્લેન તૂટી પડ્યું હતું. હાઈવે પર ફૂલ સ્પીડમાં જઈ રહેલી એક કાર પર અચાનક ઉપરથી વિમાન ખાબક્યું અને પળવારમાં અફરાતફરી મચી ગઈ હતી. આ ભયાનક દ્રશ્ય પાછળ આવતી ગાડીના ડેશકેમમાં રેકોર્ડ થઈ ગયું હતું જે હવે સોશિયલ મીડિયા પર ખૂબ જ વાયરલ થઈ રહ્યું છે.

ટોયોટા કેમરી પર થયું ક્રેશ લેન્ડિંગ

આ ઘટના ફ્લોરિડાના હાઈવે I-95 પર બની હતી જ્યાં Beechcraft 55 નામનું એક નાનકડું પ્લેન ઉડાન ભરી રહ્યું હતું. ટેકઓફ કર્યાના થોડા જ સમયમાં પ્લેનના બંને એન્જિનમાં ખામી સર્જાઈ હતી અને તે બંધ થઈ ગયા હતા. પાયલટે રેડિયો પર સંદેશો મોકલ્યો કે તેને તાત્કાલિક ઈમરજન્સી લેન્ડિંગ કરવું પડશે. પાયલટે હાઈવે પર ઉતરાણ કરવાનો પ્રયાસ કર્યો પરંતુ તેનું સંતુલન બગડ્યું અને પ્લેન સીધું નીચે જઈ રહેલી 2023 મોડલની ટોયોટા કેમરી (Toyota Camry) કાર પર ક્રેશ થયું હતું.

ડ્રાઈવરનો ચમત્કારિક બચાવ

વાયરલ વીડિયોમાં સ્પષ્ટ જોઈ શકાય છે કે પ્લેન કારના પાછળના ભાગ અને છત સાથે અથડાય છે. ટક્કર એટલી જબરદસ્ત હતી કે કારનો ઉપરનો ભાગ કચડાઈ ગયો હતો. જોકે નવાઈની વાત એ છે કે કારમાં બેઠેલા 57 વર્ષીય ડ્રાઈવરનો આબાદ બચાવ થયો હતો અને તેમને માત્ર સામાન્ય ઈજાઓ જ પહોંચી હતી. કારની મજબૂત બોડી અને સેફ્ટી ફીચર્સના કારણે ડ્રાઈવરનો જીવ બચી ગયો હતો. પ્લેનમાં સવાર 27 વર્ષીય પાયલટ અને અન્ય એક પેસેન્જર પણ સુરક્ષિત છે.

સોશિયલ મીડિયા પર ટોયોટાની ચર્ચા

આ અકસ્માત બાદ લોકો ટોયોટા કેમરીની બિલ્ડ ક્વોલિટીના વખાણ કરી રહ્યા છે. જે રીતે પ્લેન ક્રેશ થવા છતાં કારની કેબિન સુરક્ષિત રહી તે જોઈને સૌ કોઈ હેરાન છે. સામાન્ય રીતે આવા અકસ્માતમાં બચવું મુશ્કેલ હોય છે પરંતુ ટોયોટાની મજબૂતીએ ડ્રાઈવરને નવું જીવન આપ્યું છે. એક્સપર્ટ્સનું કહેવું છે કે જો પ્લેન ડ્રાઈવર સાઈડ પર થોડું વધારે નમ્યું હોત તો પરિણામ ગંભીર આવી શકતું હતું. હાલમાં ફેડરલ એવિએશન એડમિનિસ્ટ્રેશન (FAA) દ્વારા આ સમગ્ર ઘટનાની તપાસ કરવામાં આવી રહી છે.

જુઓ વાયરલ વીડિયોની ઝલક

ઈન્ટરનેટ પર જીમ કોફી નામના એક વ્યક્તિ દ્વારા રેકોર્ડ કરાયેલો વીડિયો ફરતો થયો છે. જેમાં જોઈ શકાય છે કે કેવી રીતે પ્લેન હવામાંથી લથડિયા ખાતું નીચે આવે છે અને કાર સાથે ટકરાઈને રોડ પર ઘસડાય છે. આ દ્રશ્ય હોલિવૂડની કોઈ એક્શન ફિલ્મ જેવું લાગે છે. લોકો આ વીડિયોને શેર કરીને પોતાની પ્રતિક્રિયાઓ આપી રહ્યા છે અને ડ્રાઈવરના નસીબના વખાણ કરી રહ્યા છે.