Know before buying a new car : આજના સમયમાં કાર એ માત્ર મુસાફરીનું સાધન નથી રહી, પરંતુ તે આપણી જીવનશૈલી અને જરૂરિયાતનો એક મહત્વનો ભાગ બની ગઈ છે. જ્યારે આપણે નવી કાર ખરીદવા જઈએ છીએ, ત્યારે માર્કેટમાં હેચબેક, સેડાન અને SUV જેવા અનેક નામ સાંભળવા મળે છે. ઘણીવાર લોકો આ નામો વચ્ચે મૂંઝવણ અનુભવતા હોય છે. તમારી જરૂરિયાત અને બજેટ મુજબ કઈ કાર શ્રેષ્ઠ છે, તે જાણવા માટે તેમના બોડી ટાઈપ અને ફીચર્સ સમજવા ખૂબ જ જરૂરી છે.
હેચબેક : સીટી ડ્રાઇવિંગ માટે શ્રેષ્ઠ ઓપ્શન
હેચબેક કાર સાઇઝમાં નાની અને બજેટમાં હોય છે. આ કારની મુખ્ય ઓળખ તેનો પાછળનો દરવાજો છે જે ઉપરની તરફ ખુલે છે, જેના કારણે કેબિન અને સામાન રાખવાની જગ્યા (બૂટ સ્પેસ) એકબીજા સાથે જોડાયેલા રહે છે. ટ્રાફિકવાળા વિસ્તારો અને સાંકડા રસ્તાઓ પર ચલાવવા માટે આ કાર એકદમ પરફેક્ટ છે. વધુ માઇલેજ અને ઓછી કિંમતને કારણે મધ્યમ વર્ગના પરિવારોમાં તે ખૂબ લોકપ્રિય છે.
ઉદાહરણ : Maruti WagonR, Tata Tiago, Hyundai i20 અને Maruti Baleno.
સેડાન : પ્રીમિયમ લૂક અને આરામદાયક મુસાફરી
જો તમને આરામ અને સ્ટાઇલ ગમતી હોય, તો સેડાન તમારા માટે છે. આ કારમાં ત્રણ અલગ ભાગ હોય છે: આગળ એન્જિન, વચ્ચે મુસાફરો માટે કેબિન અને પાછળ સામાન માટે અલગથી મોટી બૂટ સ્પેસ. સેડાન કારમાં બેસવાની જગ્યા વધુ આરામદાયક હોય છે, જે તેને લાંબા અંતરની મુસાફરી માટે શ્રેષ્ઠ બનાવે છે.
ઉદાહરણ : Honda City અને Hyundai Verna.
કોમ્પેક્ટ SUV : સ્ટાઇલ અને પરફોર્મન્સનું કોમ્બિનેશન
કોમ્પેક્ટ SUV એ મોટી SUV નું નાનું અને સસ્તું વર્ઝન છે. તે સાઇઝમાં મોટી SUV કરતાં થોડી નાની હોય છે પણ લુકમાં તેના જેવી જ દમદાર લાગે છે. આ કારનું ગ્રાઉન્ડ ક્લિયરન્સ (જમીનથી ઊંચાઈ) વધુ હોવાથી ખરાબ રસ્તાઓ પર પણ તે આસાનીથી ચાલે છે. શહેર અને હાઇવે એમ બંને જગ્યાએ ચલાવવા માટે આ એક સ્માર્ટ ચોઈસ છે.
ઉદાહરણ : Tata Nexon, Hyundai Creta અને Kia Seltos.
SUV : પાવર અને ઓફ-રોડિંગની માસ્ટર
SUV એટલે કે 'સ્પોર્ટ્સ યુટિલિટી વ્હીકલ'. આ કાર સાઇઝમાં મોટી, મજબૂત અને પાવરફુલ એન્જિન સાથે આવે છે. જો તમારે ઓફ-રોડિંગ કરવું હોય અથવા ખરાબ રસ્તાઓ પર લાંબી મુસાફરી કરવી હોય, તો SUV સૌથી ઉત્તમ છે. તેમાં પુષ્કળ જગ્યા અને હાઇ-ટેક ફીચર્સ જોવા મળે છે.
ઉદાહરણ : Mahindra Scorpio અને Toyota Fortuner .
કૂપ : સ્પોર્ટી ડિઝાઇન અને ખાસ અંદાજ
કૂપ કાર તેની ખાસ ઢળતી છત (Sloping Roofline) અને સ્ટાઇલિશ ડિઝાઇન માટે જાણીતી છે. મોટાભાગની કૂપ કારમાં બે દરવાજા હોય છે અને તેનું મુખ્ય ધ્યાન લૂક અને પરફોર્મન્સ પર હોય છે. જેમને સ્પોર્ટ્સ કાર જેવો લૂક જોઈતો હોય તેમના માટે આ શ્રેષ્ઠ પસંદગી છે.
ઉદાહરણ : BMW 4 Series અને Audi A5.
