Kia Sonet 2026 : કિયા ઇન્ડિયાએ તેની લોકપ્રિય કોમ્પેક્ટ SUV, સોનેટને MY26 (Model Year 2026) માટે નવા લુકમાં રજૂ કરી છે. આ વખતે કંપનીએ મધ્યમ વર્ગના ગ્રાહકોને ધ્યાનમાં રાખીને મોટા ફેરફારો કર્યા છે. સૌથી મહત્વની વાત એ છે કે, હવે સોનેટમાં ડીઝલ અને ટર્બો-પેટ્રોલ એન્જિન સાથે ઓટોમેટિક ટ્રાન્સમિશનના ઓપ્શન 10 લાખ રૂપિયાથી પણ ઓછી કિંમતમાં ઉપલબ્ધ કરાવવામાં આવ્યા છે.
ડીઝલ એન્જિનમાં ઓટોમેટિકનો નવો ઓપ્શન
સોનેટનું 1.5-લિટર ડીઝલ એન્જિન, જે 116hp પાવર અને 250nm ટોર્ક જનરેટ કરે છે, તેમાં હવે HTE(O) વેરિઅન્ટથી જ 6-સ્પીડ ટોર્ક કન્વર્ટર ઓટોમેટિક ગિયરબોક્સ મળશે. આ વેરિઅન્ટની કિંમત માત્ર 9.78 લાખ રૂપિયા (એક્સ-શોરૂમ) થી શરૂ થાય છે. અગાઉ ડીઝલ ઓટોમેટિક લેવા માટે ગ્રાહકોએ વધુ કિંમત ચૂકવવી પડતી હતી, પરંતુ હવે તે સામાન્ય ખરીદદારોની પહોંચમાં છે.
માઇલેજ અને પરફોર્મન્સનું કોમ્બિનેશન
કિયા સોનેટ તેના દમદાર માઇલેજ માટે પણ જાણીતી છે. ડીઝલ ઓટોમેટિક વેરિઅન્ટમાં ARAI-રેટેડ 18.6kmpl ની માઇલેજ મળે છે, જ્યારે તેના મેન્યુઅલ વેરિઅન્ટમાં 22.3kmpl નો દાવો કરવામાં આવ્યો છે. આ ફેરફાર સાથે સોનેટ ભારતીય બજારમાં સૌથી સસ્તી ઓટોમેટિક ડીઝલ કારોમાંની એક બની ગઈ છે.
ટર્બો પેટ્રોલ સાથે DCT ની મજા
પેટ્રોલ પ્રેમીઓ માટે 1.0-લિટર ટર્બો યુનિટ આપવામાં આવ્યું છે, જે 120hp પાવર અને 172nm ટોર્ક આપે છે. આ એન્જિન હવે HTK(O) વેરિઅન્ટમાં 7-સ્પીડ DCT ઓટોમેટિક ગિયરબોક્સ સાથે ઉપલબ્ધ છે, જેની કિંમત 9.89 લાખ રૂપિયાથી શરૂ થાય છે. જે ગ્રાહકો પહેલા માત્ર મેન્યુઅલ કે iMT લેવા માટે મજબૂર હતા, તેઓ હવે મોડર્ન DCT નો આનંદ માણી શકશે.
એન્જિનના અન્ય વિકલ્પો
આ બે પાવરફુલ એન્જિન ઉપરાંત, સોનેટમાં 1.2-લિટર નેચરલી એસ્પિરેટેડ પેટ્રોલ એન્જિનનો ઓપ્શન પણ યથાવત છે. આ એન્જિન 81hp પાવર અને 115nm ટોર્ક જનરેટ કરે છે, જે શહેરના ટ્રાફિકમાં ડ્રાઇવિંગ માટે ઉત્તમ છે.
સુરક્ષા અને હાઇ-ટેક ફીચર્સ
સુરક્ષાની બાબતમાં Kia એ કોઈ બાંધછોડ કરી નથી. સોનેટના આ વેરિઅન્ટ્સમાં 6 એરબેગ્સ, ESC (ઇલેક્ટ્રોનિક સ્ટેબિલિટી કંટ્રોલ), હિલ-સ્ટાર્ટ આસિસ્ટ અને રિયર પાર્કિંગ સેન્સર્સ જેવા ફીચર્સ સ્ટાન્ડર્ડ મળે છે. જ્યારે HTK+ વેરિઅન્ટમાં 8-ઇંચની ટચસ્ક્રીન, વાયરલેસ કનેક્ટિવિટી, રિયર કેમેરા અને ક્રુઝ કંટ્રોલ જેવા પ્રીમિયમ ફીચર્સ ઉમેરવામાં આવ્યા છે.
કોમ્પિટિટર્સ અને કિંમત
અમદાવાદમાં કિયા સોનેટની એક્સ-શોરૂમ કિંમત 7.30 લાખ રૂપિયાથી શરૂ થઈને 14.09 લાખ સુધીની છે. માર્કેટમાં આ કિયા સોનેટના કોમ્પિટિટર્સમાં Mahindra XUV 3XO, Hyundai Venue, Maruti Suzuki Brezza, Tata Nexon અને Skoda Kylaq જેવા મોડલોનો સમાવેશ થાય છે.
