Online Shopping Safety Tips: આજકાલ, દરેક વ્યક્તિ સસ્તામાં માલ મેળવવા માંગે છે, અને આ પ્રાપ્ત કરવા માટે, લોકો ઓનલાઈન સેલની રાહ જુએ છે. ઈ-કોમર્સ કંપનીઓ તહેવારો અથવા ખાસ પ્રસંગો દરમિયાન ભારે ડિસ્કાઉન્ટ આપે છે, જેનાથી ગ્રાહકોને સસ્તા ભાવે પ્રોડક્ટ મેળી શકે છે. પરંતુ એક બાજુ સેલના ફાયદા છે તો બીજી બાજુ સ્કેમર આનો સંપૂર્ણ ફાયદો ઉઠાવતા હોય છે.
સેલ દરમિયાન સ્કેમર ગ્રાહકોને છેતરવા અને તેમના બેંક ખાતામાંથી પૈસા ઉપાડવા માટે નકલી વેબસાઇટ્સ અને એપ્લિકેશન્સ બનાવે છે. તેથી, સેલ દરમિયાન આ બાબતોનું ધ્યાન રાખવું મહત્વપૂર્ણ છે. નહિંતર, સસ્તા માલને કારણે મોટું નુકસાન થઈ શકે છે. ચાલો જાણીએ કે આ ફ્રોડ કેવી રીતે થાય છે અને તમે તેનાથી કેવી રીતે બચી શકો છો.
સેલના નામે ફ્રોડ કેવી રીતે થાય છે?
તહેવારોની સિઝન નજીક આવતાની સાથે, કંપનીઓ તેમના સેલનો જોરશોરથી પ્રચાર કરે છે. સોશિયલ મીડિયા, ટીવી જાહેરાતો અને ઇન્ટરનેટ ડિસ્કાઉન્ટ અને ઑફર્સથી ભરાઈ જાય છે. લોકો આ વેચાણની આતુરતાથી રાહ જુએ છે. દરમિયાન, ફ્રોડ કરનારાઓ આ તકનો લાભ લે છે. તેઓ નકલી વેબસાઇટ્સ અથવા એપ્લિકેશન્સ બનાવે છે જે બિલકુલ ઓરીજનલ વેબસાઇટ જેવી દેખાય છે.
કંપનીનું નામ, લોગો અને ઇન્ટરફેસ અસલી એપ્લિકેશન અથવા વેબસાઇટ જેવા જ હોય છે. આ સ્કેમર્સ પછી લોકોને સોશિયલ મીડિયા, ટેક્સ્ટ સંદેશાઓ અથવા ઇમેઇલ દ્વારા લિંક્સ મોકલે છે. ડિસ્કાઉન્ટની લાલચમાં આવીને કોઈ વ્યક્તિ આ લિંક્સ પર ક્લિક કરે કે તરત જ તેમની બેંક ડિટેલ્સ ચોરી લેવામાં આવે છે અને તેમના ખાતામાંથી પૈસા ઉપાડી લેવામાં આવે છે.
આ છેતરપિંડીથી કેવી રીતે બચી શકાય?
જો તમે ઓનલાઈન સેલ દરમિયાન કંઈક ખરીદવા માંગતા હો, તો સાવધાની રાખવી ખૂબ જ મહત્વપૂર્ણ છે. કોઈપણ અજાણી લિંક્સ, સંદેશાઓ અથવા ઇમેઇલ્સ પર ક્લિક કરશો નહીં. હંમેશા ફક્ત ઓફિશિયલ ઈ-કોમર્સ વેબસાઇટ્સ અથવા તેમની ઓફિશિયલ એપ્લિકેશન્સ પર જ ખરીદી કરો. તમે જે પણ ઑફર જુઓ છો તેના પર તરત જ વિશ્વાસ કરશો નહીં. સામાન્ય કરતાં વધુ ડિસ્કાઉન્ટથી લલચાશો નહીં; છેતરપિંડી કરનારાઓ ઘણીવાર તમને લલચાવવા માટે આવી ઑફર્સ આપે છે.
