આજના સમયમાં રોકાણ માટેના વિકલ્પોની ભરમાર છે, જેના કારણે રોકાણકારો માટે યોગ્ય નિર્ણય લેવું મુશ્કેલ બની જાય છે. ખાસ કરીને SIP દ્વારા અનેક મ્યુચ્યુઅલ ફંડ્સમાં રોકાણ કરનારાઓ માટે પોર્ટફોલિયોનું સંચાલન મોટો પડકાર બની જાય છે.
વિવિધ ફંડ્સમાં નાની રકમનું રોકાણ કરતા રોકાણકારોનો પોર્ટફોલિયો વિખરાયેલો બની જાય છે. કયા ફંડ્સ રાખવા અને કયા છોડવા, એ સૌથી મોટો સવાલ બની રહે છે. ETWealthના અહેવાલ મુજબ, નાણાકીય નિષ્ણાત રવિ કુમારે આ સમસ્યાનું અસરકારક ઉકેલ રજૂ કર્યો છે અને સમજાવ્યું છે કે કેવી રીતે મર્યાદિત ફંડ્સમાં રોકાણ કરીને પણ સ્થિર વળતર મેળવી શકાય છે.
રવિ કુમારની સલાહ – “5 થી 6 ફંડ્સ પૂરતા”
રવિ કુમાર કહે છે કે જો રોકાણકાર પોતાના ફંડ્સનું નિયમિત મૂલ્યાંકન કરે અને તેમની કામગીરીને સમજે, તો માત્ર 5 થી 6 મ્યુચ્યુઅલ ફંડ્સ પૂરતા થાય છે. દરેક ફંડની પોતાની ભૂમિકા હોય છે, તેથી એક જ પ્રકારની કંપનીઓમાં રોકાણ કરવાનું ટાળવું જરૂરી છે.
તેમના મતે, બજાર નિષ્ણાતોની સલાહથી અલગ અલગ કેટેગરીના ફંડ્સ પસંદ કરીને સાચું વૈવિધ્યકરણ (Diversification) પ્રાપ્ત કરી શકાય છે.
ડાયવર્સિફિકેશન માટે વધુ ફંડ્સ જરૂરી નથી
ઘણા રોકાણકારો માને છે કે વધુ ફંડ્સ એટલે વધુ સુરક્ષા, પરંતુ રવિ કુમાર કહે છે કે એ ખોટી માન્યતા છે. મહત્વનું એ છે કે ફંડ્સ વચ્ચે કેટલો તફાવત છે અને તેમની રોકાણની રણનીતિ કેટલી સંતુલિત છે.
જો બધા ફંડ્સ એક જ પ્રકારના શેરોમાં રોકાણ કરે છે, તો ફંડ્સની સંખ્યા વધારવાથી કોઈ વધારાનો લાભ મળતો નથી.
દરેક ફંડની પોતાની રોકાણ શૈલી હોય છે
રવિ કુમારના જણાવ્યા અનુસાર, દરેક ઇક્વિટી ફંડની પોતાની ઇન્વેસ્ટમેન્ટ સ્ટાઇલ હોય છે — કેટલાક ફંડ્સ વૃદ્ધિ આધારિત શેરોમાં રોકાણ કરે છે, જ્યારે અન્ય ફંડ્સ મૂલ્ય કે ગુણવત્તા આધારિત શેરો પર ધ્યાન આપે છે.
તેથી, માર્કેટમાં ચઢાવ-ઉતાર વચ્ચે પણ સંતુલન જાળવવા માટે, પોર્ટફોલિયોમાં વિવિધ વ્યૂહરચના ધરાવતા ફંડ્સનો સમાવેશ કરવો જરૂરી છે.
