Jio IPO Update: ભારતમાં ટેલિકોમ અને ડિજિટલ ક્ષેત્રમાં ક્રાંતિ લાવનાર Jio Platforms Limited હવે તેના બહુપ્રતીક્ષિત IPO માટે તૈયારીઓમાં ઝડપ લાવી રહ્યું છે. Reliance Industries Limitedની આ પેટાકંપનીનો IPO દેશના ઇતિહાસમાં સૌથી મોટો સાબિત થઈ શકે છે, જેના કારણે રોકાણકારોમાં ભારે ઉત્સાહ જોવા મળી રહ્યો છે.
બ્લૂમબર્ગના અહેવાલ મુજબ, કંપની આ મહિનાના અંત સુધીમાં તેના ડ્રાફ્ટ રેડ હેરિંગ પ્રોસ્પેક્ટસ (DRHP) ફાઇલ કરી શકે છે. આ પ્રક્રિયાને આગળ વધારવા માટે કંપનીએ કુલ 17 બેન્કરોની નિમણૂક કરીને IPO તરફ ઔપચારિક પગલું ભર્યું છે. આંતરરાષ્ટ્રીય સ્તરે જાણીતી બેન્કો જેમ કે Morgan Stanley, HSBC Holdings, JPMorgan Chase, Citigroup અને Goldman Sachs આ IPOમાં સલાહકાર તરીકે જોડાઈ છે. સાથે જ સ્થાનિક સ્તરે Kotak Mahindra Capital અને Axis Capital જેવી કંપનીઓ પણ મહત્વની ભૂમિકા ભજવી રહી છે.
આ IPOની સૌથી ખાસ બાબત એ છે કે તે આશરે બે દાયકામાં Mukesh Ambaniની આગેવાની હેઠળની રિલાયન્સ ગ્રુપની કોઈ મોટી પેટાકંપનીનું પ્રથમ પબ્લિક ઇશ્યુ હશે. સરકાર દ્વારા લિસ્ટિંગ નિયમોમાં કરાયેલા ફેરફારોને કારણે હવે મોટી કંપનીઓ માટે માત્ર 2.5% હિસ્સો જાહેર કરવા જરૂરી બન્યું છે, જેના કારણે આ IPOને વધુ ગતિ મળી છે.
વેલ્યુએશનની દૃષ્ટિએ જોવામાં આવે તો Jio Platformsનું મૂલ્યાંકન 130 અબજ ડોલરથી 170 અબજ ડોલર (લગભગ ₹10 થી ₹14 લાખ કરોડ) વચ્ચે હોઈ શકે છે. કેટલાક વિશ્લેષકો મુજબ આ આંકડો 180 અબજ ડોલર સુધી પહોંચી શકે છે, જે તેને ભારતનો અત્યાર સુધીનો સૌથી મોટો IPO બનાવી શકે છે. ઉલ્લેખનીય છે કે 2020માં વૈશ્વિક ટેક દિગ્ગજો Meta Platforms અને Googleએ Jio Platformsમાં લગભગ 10 અબજ ડોલરનું રોકાણ કર્યું હતું. આ રોકાણથી કંપનીની વિશ્વસનીયતા અને વૃદ્ધિ ક્ષમતામાં વધુ મજબૂતી આવી હતી.
આગામી દિવસોમાં DRHP ફાઇલિંગ અને અન્ય અપડેટ્સ સાથે Jio IPO વધુ સ્પષ્ટ બનશે. જો બધું આયોજન મુજબ ચાલે, તો આ IPO ભારતીય શેરબજારમાં નવી ઇતિહાસ રચી શકે છે અને લાખો રોકાણકારો માટે મોટો અવસર સાબિત થઈ શકે છે. એવું માનવામાં આવે છે કે આ IPO માં વર્તમાન રોકાણકારો દ્વારા તેમના શેરનું વેચાણ (ઓફર ફોર સેલ - OFS) સામેલ હશે. જોકે, IPO ના કદ, માળખું અને સમય અંગે હજુ સત્તાવાર મહોર લાગવાની બાકી છે અને તેમાં ફેરફાર થઈ શકે છે. હાલમાં કંપની કે બેંકોના પ્રતિનિધિઓ દ્વારા આ બાબતે કોઈ સત્તાવાર નિવેદન આપવામાં આવ્યું નથી.
