મહારાષ્ટ્ર કેબિનેટે રાજ્યના શ્રમ કાયદામાં મહત્વપૂર્ણ ફેરફારોને મંજૂરી આપી છે. નવા નિયમો અનુસાર, ફેક્ટરીઓમાં કામના કલાકો હાલના 9 કલાકથી વધારીને 12 કલાક કરવામાં આવશે, જ્યારે દુકાનો અને સંસ્થાઓમાં 9 કલાકની ફરજ વધારીને 10 કલાક નક્કી કરવામાં આવી છે.
મુખ્યમંત્રી દેવેન્દ્ર ફડણવીસની અધ્યક્ષતામાં યોજાયેલી કેબિનેટ બેઠકમાં કેન્દ્રીય ટાસ્ક ફોર્સના સૂચન મુજબ આ નિર્ણય લેવામાં આવ્યો. આ સાથે મહારાષ્ટ્ર, કર્ણાટક, તમિલનાડુ, તેલંગાણા, ઉત્તર પ્રદેશ અને ત્રિપુરા જેવા રાજ્યોની યાદીમાં સામેલ થઈ ગયું છે, જ્યાં આવા સુધારા પહેલાથી જ અમલમાં છે.
સરકારનો દાવો : ઉદ્યોગોને સુવિધા, કામદારોને વધારાની આવક
સત્તાવાર નિવેદનમાં જણાવાયું છે કે સુધારાઓ ફેક્ટરી એક્ટ, 1948 અને મહારાષ્ટ્ર દુકાનો અને સ્થાપના અધિનિયમ, 2017 હેઠળ કરવામાં આવશે. સરકારનું કહેવું છે કે આ પગલાથી રોકાણ આકર્ષવામાં, રોજગાર નિર્માણમાં અને કામદારોના અધિકારોના રક્ષણમાં મદદ મળશે.
નવી વ્યવસ્થા મુજબ, ફેક્ટરીઓમાં હવે પાંચ કલાકને બદલે છ કલાક પછી આરામનો સમય મળશે. સાથે જ કામદારોને ઓવરટાઇમ માટે બમણું વેતન આપવામાં આવશે.
ઓવરટાઇમની મર્યાદા પણ વધી
નવી નીતિ મુજબ કાનૂની ઓવરટાઇમ મર્યાદા પ્રતિ ક્વાર્ટર 115 કલાકથી વધારીને 144 કલાક કરવામાં આવી છે. આ માટે કામદારોની લેખિત સંમતિ જરૂરી રહેશે. સાપ્તાહિક કામના કલાકોની મર્યાદા પણ 10.5 કલાકથી વધારીને 12 કલાક કરવામાં આવી છે.
સુધારેલા કાયદા મુજબ દુકાનો અને સંસ્થાઓમાં દૈનિક કામના કલાકો 9 થી વધારીને 10 કલાક કરાયા છે, ઓવરટાઇમ મર્યાદા 125 થી વધારીને 144 કલાક કરવામાં આવી છે અને કટોકટી ફરજ માટેની મર્યાદા 12 કલાક નક્કી કરવામાં આવી છે. આ નિયમો 20 કે તેથી વધુ કર્મચારીઓ ધરાવતા સંસ્થાઓ પર લાગુ થશે.
_09f17c03-7a6d-4455-ae4d-91c93a0bae11.webp&w=384&q=75)
