Snapchat Is No Longer Free: Snapchat વપરાશકર્તાઓ માટે, તેમનો ફેવરિટ ફીચરમાંથી એક હવે મફત નહીં રહે. કંપનીએ જાહેરાત કરી છે કે, તે Memories ફીચર માટે ચાર્જ લેશે, જે જૂના ફોટા અને વિડિઓઝ સંગ્રહિત કરે છે. 2016 માં તેની શરૂઆત થઈ ત્યારથી, આ ફીચર મફતમાં ઉપલબ્ધ છે અને વપરાશકર્તાઓને તેમના ફોટા અને વિડિઓઝ સંગ્રહિત કરવાનો ઓપ્શન આપે છે. વપરાશકર્તાઓ કંપનીની જાહેરાતથી નાખુશ છે અને આ નિર્ણયને પાછો ખેંચવાની માંગ કરી રહ્યા છે.
ક્યારે ચૂકવણી કરવી પડશે?
નવી નીતિ હેઠળ, જો વપરાશકર્તાઓ પાસે 5GB થી વધુ સ્ટોરેજ હશે તો કંપની તેમની પાસેથી ચાર્જ વસૂલશે. કંપનીએ એક બ્લોગ પોસ્ટમાં જણાવ્યું હતું કે, આ નીતિ ધીમે ધીમે બધા વપરાશકર્તાઓ માટે લાગુ કરવામાં આવશે. કંપનીના પ્રવક્તાએ જણાવ્યું હતું કે, 100GB પ્લાનનો ખર્ચ દર મહિને US$1.99 (આશરે રૂ. 177) થશે, જ્યારે 250GB પ્લાન Snapchat+ સબ્સ્ક્રિપ્શનનો ભાગ હશે જેની કિંમત $3.99 (આશરે રૂ. 355) છે. હાલમાં, Snapchat પાસે 90 કરોડથી વધુ માસિક સક્રિય વપરાશકર્તાઓ છે, અને કંપની કહે છે કે, આમાંના મોટાભાગના વપરાશકર્તાઓ પાસે 5GB થી ઓછી સ્ટોરેજ સ્પેસ છે. આ વપરાશકર્તાઓ નવા નિર્ણયથી પ્રભાવિત થશે નહીં.
જો તમે ચૂકવણી નહીં કરો તો શું થશે?
5GB થી વધુ Memories ધરાવતા વપરાશકર્તાઓને એક વર્ષ માટે કામચલાઉ સ્ટોરેજ અને તેમની સેવ કરેલી કન્ટેન્ટ ડાઉનલોડ કરવાનો વિકલ્પ મળશે. એક વર્ષ પછી, તેમને સ્ટોરેજ પ્લાન ખરીદવાની જરૂર પડશે. સ્નેપચેટ લોન્ચ થયાને લગભગ એક દાયકા થઈ ગયો છે, અને એક ટ્રિલિયનથી વધુ Memories સાચવવામાં આવી છે. પોતાના નિર્ણયનો બચાવ કરતા, સ્નેપચેટે કહ્યું કે, વપરાશકર્તાઓ માટે તે મુશ્કેલ હશે, પરંતુ આ પૈસાનો ઉપયોગ આ ફીચરના વ્યાપને વિસ્તૃત કરવા માટે કરવામાં આવશે.
