ગોવામાં પહેલી વાર આંતરરાષ્ટ્રીય સ્તરે સ્ટ્રીટ રેસનું આયોજન થવા જઈ રહ્યું છે. મુખ્યમંત્રી પ્રમોદ સાવંતે જાહેરાત કરી હતી કે Goa Street Race 2025 આવનારા 1 અને 2 નવેમ્બરના રોજ યોજાશે. આ રેસ Indian Racing Festival (IRF)ના ચોથા રાઉન્ડ તરીકે યોજાશે. રેસિંગ ટ્રેકનું સ્થળ હેડલેન્ડ સાદા, બોગડા છે, જ્યાં 3.214 કિમી લાંબો સમુદ્ર કિનારો સર્કિટ તૈયાર કરવામાં આવ્યો છે.
RPPLના ચેરમેન અને મેનેજિંગ ડિરેક્ટર અખિલેશ રેડ્ડીએ જણાવ્યું હતું કે ટ્રેકની લંબાઈ 3.214 કિમી હશે અને તેમાં 12થી 14 શાર્પ વળાંક હશે. આ ટ્રેક FIA Grade-3 પ્રમાણપત્ર સાથે બનાવવામાં આવશે અને તેમાં યુરોપથી આયાત કરાયેલ સલામતી અવરોધો, કોંક્રિટ બ્લોક્સ અને ક્રેશ ફેન્સ સ્થાપિત કરવામાં આવશે. ફોર્મ્યુલા 4 કાર અહીં 180-190 કિમી પ્રતિ કલાકની ઝડપે દોડશે. રેસ માટે ભવિષ્યમાં નાઇટ રેસ અને ટ્રેકના વિસ્તરણની પણ શક્યતા છે. દર્શકો માટે 15,000 થી 20,000 બેઠકોની વ્યવસ્થા કરવામાં આવશે.
આ ઇવેન્ટ માટે કુલ ₹127 કરોડનું રોકાણ કરવામાં આવી રહ્યું છે. જેમાં લાઇસન્સ અને અન્ય ખર્ચ માટે ₹27 કરોડ, ગોવા સરકાર દ્વારા ઈન્ફ્રાસ્ટ્રક્ચર માટે ₹25 કરોડ અને બાકીનો લગભગ 70 ટકા ખર્ચ RPPL ઉઠાવશે. રેડ્ડીએ જણાવ્યું કે ટ્રેક તૈયાર કરવામાં 3 થી 3.5 મહિના લાગશે અને રેસ પૂરી થયા પછી 15 થી 20 દિવસમાં રસ્તો ફરીથી જાહેર જનતા માટે ખુલ્લો મુકાઈ જશે.
મુખ્યમંત્રી પ્રમોદ સાવંતે જણાવ્યું કે આ ઇન્ફ્રાસ્ટ્રક્ચર ફક્ત રેસિંગ સુધી મર્યાદિત નહીં રહે પરંતુ મેરેથોન, સાયક્લોથોન અને અન્ય રમતગમત કાર્યક્રમો માટે પણ ઉપયોગી બનશે. આ ગોવાની ઓળખને “સૂર્ય, રેતી અને સમુદ્ર”થી આગળ વધારીને Sports Tourism સુધી લઈ જશે.
અખિલેશ રેડ્ડીએ ઉમેર્યું કે આ ઇવેન્ટ ભારતના મોટરસ્પોર્ટ્સને નવી દિશા આપશે. સાથે જ સૌરવ ગાંગુલી, જોન અબ્રાહમ, અર્જુન કપૂર અને સુદીપ જેવા સેલિબ્રિટી ટીમ માલિકોની હાજરી દર્શકોની રુચિમાં વધારો કરશે.
