સામાન્ય લોકોને રાહત આપતાં, સરકારે 350cc સુધીની નાની કાર અને મોટરસાયકલ પરનો GST 28% થી ઘટાડીને 18% કર્યો છે. નવો દર 22 સપ્ટેમ્બર 2025 થી અમલમાં આવશે. આ સાથે, થ્રી-વ્હીલર અને પરિવહન માટે વપરાતા વાહનો પર પણ ટેક્સ ઘટાડવામાં આવ્યો છે. ઓટો ઇંડસ્ટ્રી માને છે કે, આ નિર્ણયથી તહેવારોની મોસમ દરમિયાન વાહનોના વેચાણમાં વધારો થશે. જાણો વિગતવાર.
પેટ્રોલ અને CNG કારનો દર
હવે 1200cc સુધીની પેટ્રોલ, પેટ્રોલ હાઇબ્રિડ, LPG અને CNG કાર પર ફક્ત 18% GST લાગશે. જોકે, આ છૂટ ફક્ત તે વાહનોને જ મળશે જેમની લંબાઈ 4 મીટરથી ઓછી છે. અગાઉ આ વાહનો પર 28% ટેક્સ ચૂકવવો પડતો હતો.
1500cc સુધીની ડીઝલ કાર
ડીઝલ અને ડીઝલ હાઇબ્રિડ કાર ખરીદનારાઓને પણ ફાયદો થશે. હવે 1500cc સુધીની ડીઝલ કાર અને 4 મીટર સુધીની લંબાઈવાળા વાહનો પર ફક્ત 18% GST ચૂકવવો પડશે.
બાઇક અને થ્રી-વ્હીલર
હવે 350cc સુધીની મોટરસાઇકલ પર ફક્ત 18% ટેક્સ લાગશે. પહેલા આ દર 28% હતો. થ્રી-વ્હીલર અને ટ્રાન્સપોર્ટ વાહનો પણ હવે સસ્તા થશે કારણ કે, તેમના પરનો ટેક્સ પણ ઘટાડીને 18% કરવામાં આવ્યો છે.
મોટા અને લક્ઝરી વાહનો પર હવે કેટલો ટેક્સ લાગશે?
ચાલો તમને જણાવી દઈએ કે નાના વાહનોને રાહત મળી છે, પરંતુ લક્ઝરી કાર અને મોટી બાઇક પર હવે 40% GST લાગશે. 1200cc થી વધુની પેટ્રોલ કાર, 1500cc થી વધુની ડીઝલ કાર અને 350cc થી વધુ ક્ષમતા ધરાવતી મોટરસાઇકલ આ શ્રેણીમાં આવશે. SUV, MUV, MPV અને XUV જેવા મોટા વાહનો તેમજ હેલિકોપ્ટર, યાટ અને સ્પોર્ટ્સ વાહનો પર પણ આ જ દર લાગુ પડશે. જોકે, હવે લક્ઝરી વાહનો પરનો કુલ ટેક્સ પણ ઓછો થશે. હાલમાં, 28% GST અને 22% સેસ, એટલે કે કુલ 50% ટેક્સ તેમના પર વસૂલવામાં આવતો હતો. નવી સિસ્ટમમાં, હવે ફક્ત 40% GST લાગશે અને સેસ લેવામાં આવશે નહીં.
ઓટો ઇંડસ્ટ્રી અને ગ્રાહકોને ફાયદો
છેલ્લા કેટલાક વર્ષોથી, નવી ટેકનોલોજી, કડક નિયમો અને સલામતી ધોરણોને કારણે વાહનોના ભાવમાં વધારો થઈ રહ્યો હતો. ટુ-વ્હીલર કંપનીઓ પણ લાંબા સમયથી GST માં ઘટાડો કરવાની માંગ કરી રહી હતી. સરકારના આ નિર્ણયથી હવે નાની કાર અને બાઇકના વેચાણમાં વધારો જોવા મળી શક્શે.
