જાપાનની ઓટોમોબાઇલ કંપની Honda એ વૈશ્વિક સ્તરે પોતાની ઇલેક્ટ્રિક વ્હીકલ વ્યૂહરચનામાં મોટો ફેરફાર કરીને સૌને ચોંકાવી દીધા છે. કંપનીએ ઉત્તર અમેરિકા અને એશિયાના અન્ય બજારો માટે તૈયાર કરવામાં આવી રહેલા તેના ત્રણ મહત્વપૂર્ણ ઇલેક્ટ્રિક મોડલ્સના લોન્ચિંગને રદ કરવાનો આદેશ આપ્યો છે. આંતરરાષ્ટ્રીય બજારમાં બદલાતા આર્થિક સમીકરણો અને ઇલેક્ટ્રિક વાહનોની માંગમાં આવેલી ઓટને ધ્યાનમાં રાખીને હોન્ડાએ આ આકરો નિર્ણય લીધો છે. જોકે, ભારતીય ગ્રાહકો માટે રાહતના સમાચાર એ છે કે ભારત માટે ખાસ ડિઝાઇન કરવામાં આવેલ ઇલેક્ટ્રિક પ્રોજેક્ટ હજુ પણ કાર્યરત છે.
કંપની દ્વારા જે ત્રણ મુખ્ય મોડલ્સ રદ કરવામાં આવ્યા છે તેમાં '0 Series SUV' અને એક આલીશાન ઇલેક્ટ્રિક સેડાનનો સમાવેશ થાય છે. Honda ના જણાવ્યા અનુસાર, અત્યારે ઇલેક્ટ્રિક વાહનોના ઉત્પાદન પાછળ થતો ખર્ચ અને તેની સામે બજારમાં મળતો પ્રતિસાદ સંતુલિત નથી. આ સંજોગોમાં જો ઉત્પાદન ચાલુ રાખવામાં આવે તો લાંબા ગાળે આર્થિક નુકસાન થવાની ભીતિ છે. ખાસ કરીને અમેરિકામાં EV સબસિડી અને પર્યાવરણના નિયમોમાં થયેલા ફેરફારોએ કંપનીની મુશ્કેલીઓ વધારી દીધી છે. આ ઉપરાંત ચીની કંપનીઓ દ્વારા સોફ્ટવેર બેઝ્ડ ટેકનોલોજી સાથે આપવામાં આવતી સસ્તી સ્પર્ધા પણ એક મોટું પરિબળ સાબિત થઈ છે.
ભારતીય બજારના સંદર્ભમાં જોઈએ તો, હોન્ડા હવે પોતાની રણનીતિ 'હાઇબ્રિડ' વાહનો તરફ વધુ આક્રમક રીતે વાળવાની તૈયારીમાં છે. કંપનીનું માનવું છે કે અત્યારે ભારતમાં ચાર્જિંગ ઇન્ફ્રાસ્ટ્રક્ચર હજુ વિકાસના તબક્કે હોવાથી હાઇબ્રિડ કારો ગ્રાહકો માટે વધુ વ્યવહારુ વિકલ્પ છે. ભારત માટે જે '0 Alpha' EV મોડલનું આયોજન છે, તે રદ કરવામાં આવેલા મોડલ્સમાં સામેલ નથી. આનો અર્થ એ છે કે ભવિષ્યમાં આ 'મેડ ઇન ઇન્ડિયા' ઇલેક્ટ્રિક SUV લોન્ચ થઈ શકે છે.
નોંધનીય છે કે હોન્ડા હવે ભારતમાં પોતાની લોકપ્રિય ગાડીઓના હાઇબ્રિડ વેરિઅન્ટ્સ પર વધુ રોકાણ કરશે. આગામી સમયમાં કંપની નવી ટેકનોલોજી સાથેના મોડલ્સ રજૂ કરીને ભારતીય રસ્તાઓ પર પોતાની પકડ મજબૂત કરવા માંગે છે. ઇલેક્ટ્રિક કારોના વિકાસમાં રોકાયેલા સંસાધનોનો ઉપયોગ હવે હાઇબ્રિડ અને વધુ કાર્યક્ષમ એન્જિન બનાવવા માટે કરવામાં આવશે. આ ફેરફારથી હોન્ડાને એશિયન માર્કેટમાં ચીની કંપનીઓ સામે ટકી રહેવામાં મદદ મળશે તેવી આશા છે.
