બિહારમાં ખાસ સુધારણા અભિયાન બાદ હવે દેશવ્યાપી Special Intensive Revision (SIR) પ્રક્રિયા શરૂ થવાની તૈયારી છે. ચૂંટણી પંચ (ECI) તરફથી મળેલી માહિતી મુજબ, આ અભિયાનનો પ્રથમ તબક્કો મંગળવાર, 28 October 2025થી શરૂ થશે. સોમવારે ચૂંટણી પંચે આ બાબતે ઉચ્ચ સ્તરીય બેઠક બોલાવી હતી જેમાં કામગીરીના માળખા પર ચર્ચા કરવામાં આવી હતી.
પ્રથમ તબક્કામાં પાંચ રાજ્યોનો સમાવેશ
ચૂંટણી પંચના આયોજન અનુસાર, પ્રથમ તબક્કામાં અસામ, તમિલનાડુ, પુડુચેરી, કેરળ અને પશ્ચિમ બંગાળનો સમાવેશ કરવામાં આવશે. આ રાજ્યોમાં 2026માં વિધાનસભાની ચૂંટણી યોજાવાની હોવાથી સુધારણા પ્રક્રિયા અહીંથી શરૂ થશે. ત્યારબાદ ઉત્તર પ્રદેશ, મધ્ય પ્રદેશ અને છત્તીસગઢ જેવા રાજ્યોમાં પણ SIR હાથ ધરાશે.
પ્રક્રિયા ક્યારે પૂર્ણ થશે
અધિકારીઓના જણાવ્યા મુજબ, મતદાર યાદી સુધારણા અભિયાન માર્ચ 2026 સુધી પૂર્ણ થવાની શક્યતા છે. પ્રથમ તબક્કો પૂરો થયા પછી બાકી રાજ્યો અને કેન્દ્રશાસિત પ્રદેશોમાં સુધારણા માટેનો બીજો તબક્કો શરૂ કરવામાં આવશે. તેમાં પહાડી વિસ્તારો અને નાના રાજ્યોનો પણ સમાવેશ થશે.
SIR નો મુખ્ય હેતુ
SIRનો ઉદ્દેશ્ય મતદાર યાદીઓને વધુ સચોટ અને પારદર્શક બનાવવાનો છે. આ અભિયાન અંતર્ગત નવા મતદારોના નામ ઉમેરવા, હાલના નામોની ચકાસણી અને ભૂલો સુધારવાનું કામ હાથ ધરાશે. ચૂંટણી પંચના જણાવ્યા મુજબ, સમગ્ર પ્રક્રિયા સંપૂર્ણપણે પારદર્શક અને ન્યાયી રીતે હાથ ધરાશે જેથી આવનારી ચૂંટણીમાં વધુને વધુ નાગરિકો ભાગ લઈ શકે.
ચૂંટણી પંચના વરિષ્ઠ અધિકારીએ જણાવ્યું કે પશ્ચિમ બંગાળમાં SIR દરમિયાન બૂથ લેવલ ઓફિસરો (BLO)ને સહાય આપવા માટે સરકારી કર્મચારીઓમાંથી સ્વયંસેવકોની નિમણૂક કરી શકાય છે. આ સહાયકો મતદારોને નામાંકન ફોર્મ ભરવામાં મદદ કરશે અને માહિતી ચકાસણીની પ્રક્રિયામાં BLOને સહયોગ આપશે.
આ સ્વયંસેવકો ખાસ કરીને તેવા મતદાન મથકો પર તૈનાત કરવામાં આવશે જ્યાં 1,200થી વધુ મતદારો નોંધાયેલા હશે.
ચૂંટણી પંચનો આ અભિયાન લોકતંત્રને વધુ મજબૂત બનાવવાનો એક મહત્વપૂર્ણ પ્રયાસ માનવામાં આવી રહ્યો છે, કારણ કે આથી દરેક યોગ્ય નાગરિકનું નામ મતદાર યાદીમાં ઉમેરાય તે સુનિશ્ચિત થશે.
