લદ્દાખને રાજ્યનો દરજ્જો આપવાની માંગ કરી રહેલા આંદોલનના નેતા સોનમ વાંગચુકની ધરપકડ કરવામાં આવી છે. લેહમાં બંધ દરમિયાન લદ્દાખને રાજ્યનો દરજ્જો આપવાની માંગ કરી રહેલા પ્રદર્શનકારીઓ અને સુરક્ષા દળો વચ્ચે વ્યાપક અથડામણમાં ચાર લોકોના મોત થયા બાદ આ કાર્યવાહી કરવામાં આવી છે. સોનમ વાંગચુક આજે બપોરે 2:30 વાગ્યે પ્રેસ કોન્ફરન્સ કરવાના હતા, પરંતુ તે પહેલાં પોલીસે તેમની ધરપકડ કરી હતી. સોનમ વાંગચુકની ધરપકડ બાદ, લેહમાં ઇન્ટરનેટ ઍક્સેસ બ્લોક કરી દેવામાં આવી હતી.
નોંધનીય છે કે ગુરુવારે, કેન્દ્રીય ગૃહ મંત્રાલયે ક્લાઇમેટ એક્ટિવિસ્ટ સોનમ વાંગચુક દ્વારા સ્થાપિત સ્ટુડન્ટ્સ એજ્યુકેશનલ એન્ડ કલ્ચરલ મૂવમેન્ટ ઓફ લદ્દાખ (SECMOL) ના FCRA લાઇસન્સને તાત્કાલિક અસરથી રદ કર્યું હતું. લદ્દાખ માટે રાજ્યનો દરજ્જો અને બંધારણીય સુરક્ષાની માંગ સાથે શાંતિપૂર્ણ આંદોલનનું નેતૃત્વ કરી રહેલા કાર્યકર્તાએ તેમની વ્યક્તિગત સલામતી અંગે પણ ચિંતા વ્યક્ત કરી હતી.
સોનમ વાંગચુકે કહ્યું હતું કે, "હું જોઉં છું કે તેઓ મારા પર જાહેર સલામતી કાયદા હેઠળ કેસ ચલાવવાનો અને મને બે વર્ષ માટે જેલમાં રાખવાનો પ્રયાસ કરી રહ્યા છે." તેમણે કહ્યું, "હું તેના માટે તૈયાર છું, પરંતુ સોનમ વાંગચુકને જેલમાં રાખવાથી તેને મુક્ત થવા કરતાં વધુ સમસ્યાઓ થઈ શકે છે."
વધુમાં, સોનમ વાંગચુકે લદ્દાખમાં તાજેતરના હિંસક વિરોધ પ્રદર્શનો માટે ગૃહ મંત્રાલય દ્વારા તેમના પર દોષારોપણને "બલિનો બકરો" બનાવવાની યુક્તિ ગણાવી છે.
