પ્રધાનમંત્રી નરેન્દ્ર મોદી આજે દિલ્હીમાં ખેડૂતોના કલ્યાણ માટે ₹35,440 કરોડની ત્રણ મહત્વપૂર્ણ યોજનાઓની શરૂઆત કરશે. આ ઉપરાંત, તેઓ કૃષિ, પશુપાલન, મત્સ્યઉદ્યોગ અને ખાદ્ય પ્રક્રિયા ક્ષેત્રોમાં ₹5,450 કરોડના પ્રોજેક્ટ્સનું ઉદ્ઘાટન અને ₹815 કરોડના પ્રોજેક્ટ્સનો શિલાન્યાસ કરશે. આ કાર્યક્રમ ભારતીય કૃષિ સંશોધન સંસ્થા (IARI) ખાતે યોજાશે, જ્યાં પીએમ મોદી ખેડૂતો સાથે સીધો સંવાદ કરશે.
પીએમ ધન ધાન્ય કૃષિ યોજના: ₹24,000 કરોડનું રોકાણ
પીએમ ધન ધાન્ય કૃષિ યોજના, જેનો ખર્ચ ₹24,000 કરોડ છે, કૃષિ ઉત્પાદકતા વધારવા, પાક વૈવિધ્યકરણ, ટકાઉ ખેતી પદ્ધતિઓ, સિંચાઈ સુવિધાઓના વિસ્તાર અને લણણી પછીના સંગ્રહને મજબૂત કરવા પર ધ્યાન કેન્દ્રિત કરશે. આ યોજના 100 પસંદગીના જિલ્લાઓમાં ટૂંકા અને લાંબા ગાળાના ધિરાણને સરળ બનાવશે.
કઠોળમાં આત્મનિર્ભરતા મિશન
પીએમ મોદી ₹11,440 કરોડના ખર્ચે કઠોળ આત્મનિર્ભરતા મિશનની શરૂઆત કરશે, જેનો ઉદ્દેશ કઠોળનું ઉત્પાદન વધારવું, વાવેતર વિસ્તારનું વિસ્તરણ, મૂલ્ય શૃંખલાને મજબૂત કરવું અને નુકસાન ઘટાડવું છે.
વડાપ્રધાન બેંગલુરુ અને જમ્મુ-કાશ્મીરમાં કૃત્રિમ ગર્ભાધાન તાલીમ કેન્દ્રો, આસામમાં IVF પ્રયોગશાળા, મહેસાણા, ઇન્દોર અને ભીલવાડામાં દૂધ પાવડર પ્લાન્ટ તથા તેજપુરમાં ફિશ ફીડ પ્લાન્ટનું ઉદ્ઘાટન કરશે. આ ઉપરાંત, ₹815 કરોડના અન્ય પ્રોજેક્ટ્સનો શિલાન્યાસ થશે.
ખેડૂતો સાથે સંવાદ અને પ્રમાણપત્ર વિતરણ
કાર્યક્રમ દરમિયાન, પીએમ મોદી રાષ્ટ્રીય કુદરતી ખેતી મિશન, MAITRI ટેકનિશિયન અને PACS હેઠળ પ્રમાણિત ખેડૂતોને પ્રમાણપત્રો આપશે. તેઓ કઠોળની ખેતી અને અન્ય કૃષિ યોજનાઓનો લાભ લેનારા ખેડૂતો સાથે પણ વાતચીત કરશે, જે ગ્રામીણ માળખાગત સુવિધાઓ અને કૃષિ સ્વનિર્ભરતાને પ્રોત્સાહન આપશે.આ કાર્યક્રમ ખેડૂતોના હિતો અને ગ્રામીણ વિકાસ પ્રત્યે સરકારની પ્રતિબદ્ધતાનું પ્રતીક છે.
