વ્હાઇટ કોલર ટેરર મોડ્યુલ કેસના મુખ્ય આરોપી મુઝમ્મિલ ગનીએ NIA પૂછપરછ દરમિયાન અનેક ખુલાસા કર્યા છે. તેણે કહ્યું હતું કે પાંચ ડોક્ટરોએ મળીને દેશના અનેક શહેરોમાં એકસાથે મોટા આતંકવાદી હુમલાઓ કરવા માટે 26 લાખ રૂપિયા ભેગા કર્યા હતા. આ નેટવર્કે વિસ્ફોટકો અને રિમોટ ટ્રિગર ડિવાઇસ મેળવવામાં લગભગ બે વર્ષ પસાર કર્યા હતા. અધિકારીઓના જણાવ્યા અનુસાર, ગનીએ સ્વીકાર્યું હતું કે તેણે પોતે 5 લાખ રપિયા આપ્યા હતા. આદિલ અહેમદ રાથેરે 8 લાખ આપ્યા હતા, અને તેના ભાઈ મુઝફ્ફર અહેમદ રાથેરે 6 લાખ આપ્યા હતા. શાહીન શાહિદે 5 લાખ રૂપિયા આપ્યા હતા અને ડૉ. ઉમર ઉન-નબી મોહમ્મદે 2 લાખ રૂપિયા આપ્યા હતા. આ સમગ્ર રકમ ઉમરને સોંપવામાં આવી હતી, જે દર્શાવે છે કે તે હુમલાઓ કરવા માટે જવાબદાર હતો.
મુઝમ્મિલ ગનીએ ગુરુગ્રામ અને નૂહથી આશરે 3 લાખ રૂપિયામાં 26 ક્વિન્ટલ NPK ખાતર ખરીદવાની કબૂલાત કરી. NIA ના એક અધિકારીએ નામ ન આપવાની શરતે મીડિયાને જણાવ્યું, "ખાતર અને અન્ય રસાયણો મેળવવા માટે ગની જવાબદાર હતો. આ લોકો રાતોરાત વિસ્ફોટકો બનાવતા નહોતા, પરંતુ એક સુવિચારિત યોજના હેઠળ કામ કરી રહ્યા હતા." આ ખાતરને ઉમર ઉન-નબીની દેખરેખ હેઠળ વિસ્ફોટકોમાં રૂપાંતરિત કરવામાં આવ્યું હતું, જેમણે રિમોટ ડેટોનેટર અને સર્કિટરીની વ્યવસ્થા કરી હતી. તપાસકર્તાઓના મતે, એમોનિયમ નાઈટ્રેટ અને યુરિયાનો પણ મોટી માત્રામાં સંગ્રહ કરવામાં આવ્યો હતો. હુમલાની જવાબદારીઓ સ્પષ્ટપણે વહેંચાયેલી હતી, જેમાં ઉમરે ટેકનિકલ પાસાઓ સંભાળ્યા હતા.
તપાસ ક્યાં સુધી પહોંચી છે?
અહેવાલ મુજબ, અત્યાર સુધીમાં ત્રણ ડોક્ટરો (મુઝમ્મિલ ગની, શાહીન શાહિદ અને આદિલ રાથેર) ની ધરપકડ કરવામાં આવી છે. આદિલનો ભાઈ મુઝફ્ફર રાથેર પણ આ નેટવર્કનો ભાગ હોવાની શંકા છે. તે હાલમાં અફઘાનિસ્તાનમાં હોવાનું જાણવા મળે છે. અલ-ફલાહ મેડિકલ કોલેજમાં ઓમર, ગની અને શાહિદ સાથે કામ કરનારા નિસાર ઉલ-હસનની પણ શોધ ચાલુ છે. એવું કહેવાય છે કે ઓમરે 10 નવેમ્બરના રોજ લાલ કિલ્લાની બહાર હ્યુન્ડાઇ i20 કારમાં રાખેલા વિસ્ફોટકોમાં વિસ્ફોટ કર્યો હતો.
ચાલતી હતી અનેક વિસ્ફોટોની તૈયારીઓ
NIA અધિકારીએ જણાવ્યું હતું કે આરોપીની કબૂલાત અગાઉ છૂટાછવાયા સંકેતોને એકત્રિત કરવામાં મહત્વપૂર્ણ સાબિત થઈ છે. તેમણે ઉમેર્યું હતું કે, "જપ્ત કરાયેલ સામગ્રીનો જથ્થો સ્પષ્ટપણે દર્શાવે છે કે આ એક હુમલો નહોતો, પરંતુ અનેક શહેરોમાં શ્રેણીબદ્ધ વિસ્ફોટો હતો. આટલો મોટો જથ્થો એક જ વિસ્ફોટ માટે ન હોઈ શકે." જોકે, કાયદેસર રીતે, આરોપીની કબૂલાત ફક્ત ત્યારે જ માન્ય છે જો મેજિસ્ટ્રેટ અથવા કોર્ટ સમક્ષ આપવામાં આવે. તપાસ એજન્સી હવે સપ્લાયર્સને ઓળખવા અને આ વ્યક્તિઓએ તેમની વ્યાવસાયિક ડિગ્રી અને ઓળખનો દુરુપયોગ કર્યો છે કે કેમ તેની તપાસ કરવા પર ધ્યાન કેન્દ્રિત કરી રહી છે. આ એક ઊંડાણપૂર્વક સ્થાપિત નેટવર્ક હોય તેવું લાગે છે જે શિક્ષણવિદોના આડમાં કાર્યરત છે.
