દેશમાં ચાલી રહેલી મતદાર યાદી સુધારણા અને ચકાસણી (SIR)ની કામગીરી હવે જીવલેણ સાબિત થઈ રહી છે. કોડીનારમાં શિક્ષકની આત્મહત્યા અને વડોદરામાં ચૂંટણીલક્ષી કામગીરી દરમિયાન એક સહાયક BLO મહિલાનું ફરજ પર કરૂણ મોતની ઘટના હજું તો તાજી જ છે ત્યાં હવે વધુ એક BLOએ સ્યુસાઈડ નોટ લખી આત્મહત્યા કરી લીધી છે. જેમાં પશ્ચિમ બંગાળના નાદિયા જિલ્લામાં એક બૂથ લેવલ ઓફિસર (BLO) એ આત્મહત્યા કરી છે. મૃતકની ઓળખ રિંકુ તરફદાર તરીકે થઈ છે, જે કૃષ્ણનગરના શાસ્તીતલા વિસ્તારની રહેવાસી હતી. તે છાપરા પોલીસ સ્ટેશન વિસ્તારના બાંગલાઝી વિસ્તારમાં બૂથ નંબર 202 પર BLO તરીકે પોસ્ટેડ હતી.
પરિવારના જણાવ્યા અનુસાર, રિંકુ તરફદારે તેના મૃત્યુ પહેલાં એક સુસાઇડ નોટ છોડી હતી, જેમાં તેણે કથિત રીતે તેના મૃત્યુ માટે ચૂંટણી પંચ અને વહીવટી દબાણને જવાબદાર ઠેરવ્યું હતું. પરિવારનો દાવો છે કે વ્યવસાયે પેરા-ટીચર હોવા છતાં, રિંકુને કોઈપણ છૂટછાટનો ઇનકાર કરવામાં આવ્યો હતો અને BLO તરીકે ભારે કાર્યભારના બોજ હેઠળ દબાવવામાં આવી હતી.
"હું આ દબાણ સહન કરી શકતી નથી... મને સ્ટ્રોક નથી જોઈતો"
સુસાઇડ નોટમાં જણાવાયું છે કે તેને તેનું 90 ટકા કામ પૂર્ણ કરી લીધું હતું, પરંતુ ઓનલાઈન પ્રક્રિયા પૂર્ણ કરવામાં અસમર્થતાને કારણે તે ભારે તણાવમાં હતી. પરિવારનો આરોપ છે કે રિંકુ ઓનલાઈન કામમાં બહુ પારંગત નહોતી.
નોંધમાં, રિંકુએ લખ્યું, "હું આ દબાણ સહન કરી શકતી નથી. મને સ્ટ્રોક નથી જોઈતો." પરિવારના સભ્યોના જણાવ્યા મુજબ, તે રાત્રે 11 વાગ્યા સુધી સામાન્ય હતી, પરંતુ સવારે તે કામ કરી રહી હતી અને કદાચ દબાણને કારણે તે તૂટી પડી.
પરિવારે નિષ્પક્ષ તપાસની માંગ કરી
પરિવારના સભ્યોએ કહ્યું, "એક સામાન્ય ગૃહિણી અને પેરાએડ્યુકેટર પર આટલી મોટી જવાબદારી કેવી રીતે મૂકવી તે વાજબી છે? ઉચ્ચ અધિકારીઓ કેમ સમજી શકતા નથી કે વ્યક્તિ કેટલું કામ સંભાળી શકે છે?" પરિવારે સમગ્ર ઘટનાની નિષ્પક્ષ તપાસની માંગ કરી છે. સ્થાનિક પોલીસ આ કેસની તપાસ કરી રહી છે.
