હવામાન વિભાગે ચેતવણી આપી છે કે આગામી દિવસોમાં દેશમાં એક તીવ્ર ચક્રવાતી વાવાઝોડું આવી શકે છે. પવનની ગતિ 110 કિમી પ્રતિ કલાક સુધી પહોંચી શકે છે, જે સામાન્ય જનજીવનને ખોરવી શકે છે. IMD એ બંગાળની ખાડી અને અરબી સમુદ્રમાં સક્રિય ચક્રવાતી વાવાઝોડાની પ્રવૃત્તિ જોઈ છે, જેના કારણે ઓડિશા અને આંધ્રપ્રદેશમાં ચક્રવાતી વાવાઝોડાની ચેતવણી જારી કરવામાં આવી છે.
26 ઓક્ટોબરે તોફાન ત્રાટકશે
IMD ભુવનેશ્વરના ડિરેક્ટર મનોરમા મોહંતીએ જણાવ્યું છે કે, 26 ઓક્ટોબર સુધીમાં બંગાળની ખાડીમાં એક તીવ્ર ચક્રવાતી વાવાઝોડું બનવાની ધારણા છે, જે વધુ તીવ્ર બનશે અને 28 ઓક્ટોબરની સાંજે કે રાત્રે માછલીપટ્ટનમ અને કલિંગપટ્ટનમ વચ્ચે કાકીનાડા નજીક આંધ્રપ્રદેશના દરિયાકાંઠે લેન્ડફોલ કરશે.
90-110 કિમી/કલાકની ઝડપે પવન ફૂંકાશે
હવામાન વિભાગના જણાવ્યા અનુસાર, ચક્રવાતી વાવાઝોડાના વિકાસ દરમિયાન ઓડિશામાં ૯૦-૧૧૦ કિમી/કલાકની ઝડપે પવન ફૂંકાશે. ૨૭ ઓક્ટોબરે ઓડિશામાં પણ ભારે વરસાદની આગાહી છે.
28 ઓક્ટોબરે ઓડિશાના અનેક જિલ્લાઓમાં તેની અસર અનુભવાશે
28 ઓક્ટોબર સુધીમાં આ વાવાઝોડું ઓડિશાના અનેક જિલ્લાઓમાં પ્રવેશ કરશે તેવું જાણવા મળી રહ્યું છે. 27 થી 29 ઓક્ટોબર દરમિયાન ગંજમ, ગજપતિ, રાયગડા, કોરાપુટ અને મલકાનગિરી જિલ્લામાં ભારે વરસાદ અને 60 થી 80 કિમી/કલાકની ઝડપે પવન ફૂંકાઈ શકે છે. 28 ઓક્ટોબરે આ વાવાઝોડું આંધ્રપ્રદેશમાં પણ લેન્ડફોલ કરશે. હવામાન વિભાગે આ વિસ્તારો માટે યલો એલર્ટ જારી કર્યું છે.
માછીમારોને સતર્ક રહેવાની સલાહ
પૂર્વ-મધ્ય અરબી સમુદ્ર પર રચાયેલ આ ડિપ્રેશન 12 કિમી/કલાકની ઝડપે પશ્ચિમ-ઉત્તરપશ્ચિમ તરફ આગળ વધી રહ્યું છે. તે ગોવાથી આશરે 450 કિમી પશ્ચિમ-ઉત્તરપશ્ચિમ અને મુંબઈથી 430 કિમી દક્ષિણ પશ્ચિમમાં સ્થિત છે. IMD અનુસાર આગામી 24 કલાકમાં આ ડિપ્રેશન વધુ તીવ્ર બનશે પરંતુ ભારતીય દરિયાકાંઠા પર તેની કોઈ ખાસ અસર થશે નહીં. જોકે, ઊંચા મોજા ઉછળવાની શક્યતાને કારણે માછીમારોને દરિયામાં ન જવાની કડક સલાહ આપવામાં આવી છે.
