Gujarat Heatwave: ગુજરાતમાં ઉનાળાની શરૂઆત સાથે જ ગરમીનો પ્રકોપ દિવસેને દિવસે વધી રહ્યો છે. માર્ચ મહિનામાં જ અનેક શહેરોમાં તાપમાન 42 ડિગ્રીને પાર પહોંચી જતા આરોગ્ય વિભાગ અને હોસ્પિટલ તંત્ર એલર્ટ મોડ પર આવી ગયું છે. અમદાવાદ, સુરત, વડોદરા, રાજકોટ અને નવસારી સહિતના શહેરોમાં હીટવેવ અને હીટ સ્ટ્રોકના વધતા જોખમને ધ્યાનમાં રાખીને ખાસ વોર્ડ, વધારાના ડોક્ટરો, વેન્ટિલેટર સુવિધા અને ઈમરજન્સી ટીમોની વ્યવસ્થા કરવામાં આવી રહી છે.
રાજ્યમાં વધી રહેલી ગરમીને કારણે સામાન્ય લોકોમાં ડિહાઇડ્રેશન, ભારે તાવ, ઝાડા-ઉલટી, માથાનો દુખાવો અને હીટ ઈલનેસના કેસોમાં વધારો જોવા મળી રહ્યો છે. 108 ઇમરજન્સી સેવા દ્વારા આપવામાં આવેલી માહિતી અનુસાર છેલ્લા ચાર દિવસમાં સમગ્ર ગુજરાતમાં ગરમી સંબંધિત 402 કેસ નોંધાયા છે. તેમાં સૌથી વધુ કેસ ભારે તાવ અને હીટ ઈલનેસના નોંધાયા હોવાનું જાણવા મળ્યું છે.
સુરતમાં ગરમીના કારણે 28 વર્ષીય યુવકનું મોત!: "હજુ પણ વધશે ગરમી..." અંબાલાલ પટેલે કરી 'માથું ફાડતી' આગાહી
અમદાવાદમાં સૌથી વધુ ભારે તાવના કેસ
રાજ્યના સૌથી મોટા શહેર અમદાવાદમાં ગરમીની અસર સૌથી વધુ જોવા મળી રહી છે. છેલ્લા કેટલાક દિવસોમાં શહેરમાં ભારે તાવના 75 કેસ નોંધાયા છે. આરોગ્ય નિષ્ણાતોના જણાવ્યા મુજબ બપોરના સમયે બહાર નીકળતા લોકોમાં ડિહાઇડ્રેશન અને હીટ એક્ઝોશન જેવી સમસ્યાઓ ઝડપથી વધી રહી છે. 108 ઇમરજન્સી સેવા અનુસાર ગરમીને કારણે પેટમાં દુખાવો, ઝાડા-ઉલટી અને માથાના દુખાવાના કેસોમાં પણ વધારો થયો છે. હોસ્પિટલોમાં દર્દીઓની સંખ્યામાં વધારો થવાની શક્યતાને ધ્યાનમાં રાખીને તંત્ર દ્વારા આગોતરી તૈયારીઓ શરૂ કરવામાં આવી છે. તબીબો ખાસ કરીને વૃદ્ધો, બાળકો અને બહાર કામ કરતા શ્રમિકોને બપોરના સમયે બહાર ન નીકળવાની સલાહ આપી રહ્યા છે. શહેરમાં ગરમીના કારણે દિવસ દરમિયાન રસ્તાઓ પર લોકોની અવરજવર પણ ઓછી જોવા મળી રહી છે.
ગુજરાતમાં નર્સિંગ ક્ષેત્રે મોટો સુધારો: 8 સ્પેશિયલાઈઝ્ડ ડિપ્લોમા કોર્સ શરૂ કરવાનો લેવાયો નિર્ણય
સુરત સિવિલ હોસ્પિટલમાં ખાસ 10 બેડનો હીટવેવ વોર્ડ
દક્ષિણ ગુજરાતમાં પણ ગરમીનો પ્રભાવ સતત વધી રહ્યો છે. સુરત સિવિલ હોસ્પિટલ દ્વારા હીટવેવને પહોંચી વળવા માટે ખાસ 10 બેડનો અલગ વોર્ડ તૈયાર કરવામાં આવ્યો છે. આ વોર્ડમાં વેન્ટિલેટર સહિતની તમામ ઈમરજન્સી સુવિધાઓ ઉપલબ્ધ કરાવવામાં આવી છે. હોસ્પિટલ તંત્રએ દર્દીઓ અને તેમના સગાંઓને ગરમીથી રાહત મળે તે માટે OPD અને ઈમરજન્સી વિભાગમાં 15થી વધુ નવા કુલર પણ લગાવ્યા છે. ઉપરાંત 3થી વધુ ડોક્ટરો અને નર્સિંગ સ્ટાફની ખાસ ટીમ 24 કલાક તહેનાત રાખવામાં આવી છે. સુરતમાં ખાસ કરીને ઉદ્યોગ વિસ્તારોમાં કામ કરતા મજૂરો અને ડાયમંડ-ટેક્સટાઈલ ઉદ્યોગ સાથે જોડાયેલા કર્મચારીઓ ગરમીના સીધા પ્રભાવ હેઠળ આવતા હોવાથી આરોગ્ય વિભાગ વધુ સતર્ક બન્યું છે.
અમદાવાદ એરપોર્ટ આસપાસ અનેક વિસ્તારોમાં નોનવેજના વેચાણ પર પ્રતિબંધ: નોનવેજ વેચતા પકડાશો તો 3 વર્ષની સજા
વડોદરામાં હીટ સ્ટ્રોક માટે અલગ વોર્ડ
વડોદરાની એસએસજી હોસ્પિટલમાં પણ ગરમીને ધ્યાનમાં રાખીને હીટ સ્ટ્રોક માટે અલગ વોર્ડ ઉભો કરવામાં આવ્યો છે. હોસ્પિટલ તંત્રના જણાવ્યા અનુસાર હાલ સુધી કોઈ ગંભીર દર્દી દાખલ થયો નથી, પરંતુ આગામી દિવસોમાં તાપમાન વધુ વધવાની શક્યતાને ધ્યાનમાં રાખીને સંપૂર્ણ તૈયારીઓ કરવામાં આવી છે. હોસ્પિટલ દ્વારા દાવો કરવામાં આવ્યો છે કે OPDમાં હજુ સુધી દર્દીઓની સંખ્યામાં નોંધપાત્ર વધારો થયો નથી, છતાં તમામ મેડિકલ ટીમોને એલર્ટ રાખવામાં આવી છે. ખાસ કરીને ઈમરજન્સી વિભાગમાં વધારાની સુવિધાઓ અને દવાઓ ઉપલબ્ધ રાખવામાં આવી છે. આરોગ્ય નિષ્ણાતોનું કહેવું છે કે હીટ સ્ટ્રોકના કેસોમાં શરૂઆતમાં સામાન્ય થાક અથવા ચક્કર જેવી લક્ષણો દેખાય છે, પરંતુ સમયસર સારવાર ન મળે તો પરિસ્થિતિ ગંભીર બની શકે છે.
ગીરમાં શિકાર કરતાં સિંહ-સિંહણના Live દ્રશ્યો: પ્રવાસીઓના જીવ તાળવે ચોંટ્યા!
રાજકોટમાં 20 બેડનો સ્પેશિયલ વોર્ડ
સૌરાષ્ટ્ર વિસ્તારમાં ગરમીનું પ્રમાણ સૌથી વધુ અનુભવાઈ રહ્યું છે. રાજકોટમાં માર્ચ મહિનાથી જ તાપમાન 42 ડિગ્રી સુધી પહોંચી જતા લોકોમાં હીટ સ્ટ્રોક અને ડિહાઇડ્રેશનની ભીતિ વધી છે. આ પરિસ્થિતિને ધ્યાનમાં રાખીને રાજકોટની પી.ડી.યુ. સિવિલ હોસ્પિટલ દ્વારા હીટ સ્ટ્રોકના દર્દીઓ માટે ખાસ 20 બેડનો સ્પેશિયલ વોર્ડ શરૂ કરવામાં આવ્યો છે. અહીં 24 કલાક તબીબી સેવાઓ ઉપલબ્ધ રહેશે અને વિશેષ ટીમો તહેનાત કરવામાં આવી છે. હોસ્પિટલ તંત્રનું કહેવું છે કે ગરમી વધતાં ખાસ કરીને વૃદ્ધો અને નાના બાળકોમાં પાણીની ઉણપ અને બેભાન થવાના કેસો વધી શકે છે. તેથી લોકો પૂરતું પાણી પીવે અને બપોરના સમયે બહાર નીકળવાનું ટાળે તેવી અપીલ કરવામાં આવી છે.
"હવે શનિ મિથુન રાશિમાં જશે ત્યારે જ પવન આવશે": અંબાલાલ પટેલે ગરમીને લઈને કેમ અપાવી 1912ની યાદ? આગાહી જાણીને ફફડી જશો
નવસારીમાં 30 બેડનો ઈમરજન્સી વોર્ડ
નવસારી સિવિલ હોસ્પિટલ દ્વારા પણ વધતી ગરમીને ધ્યાનમાં રાખીને આગોતરી વ્યવસ્થા કરવામાં આવી છે. હોસ્પિટલના મેડિકલ ઓફિસર વિરેન્દ્રસિંહના જણાવ્યા મુજબ હીટ સ્ટ્રોકના દર્દીઓ માટે 30 બેડનો ખાસ ઈમરજન્સી વોર્ડ કાર્યરત કરવામાં આવ્યો છે. આ ઉપરાંત ઈમરજન્સી વિભાગમાં વધારાના ડોક્ટરો, સિસ્ટર અને ક્લાસ-4 કર્મચારીઓની નિમણૂક કરવામાં આવી છે. હોસ્પિટલમાં હીટ સ્ટ્રોકની સારવાર માટે જરૂરી તમામ દવાઓનો પૂરતો જથ્થો ઉપલબ્ધ રાખવામાં આવ્યો છે. હોસ્પિટલ તંત્રએ સ્પષ્ટ કર્યું છે કે કોઈ પણ પ્રકારની ઈમરજન્સી સ્થિતિને પહોંચી વળવા માટે 24 કલાક એલર્ટ મોડ પર કામગીરી ચાલી રહી છે.
હવામાન વિભાગની ચેતવણી બાદ તંત્ર સતર્ક
હવામાન વિભાગ દ્વારા આગામી દિવસોમાં ગુજરાતના અનેક વિસ્તારોમાં તાપમાન વધુ વધવાની આગાહી કરવામાં આવી છે. ખાસ કરીને ઉત્તર ગુજરાત, સૌરાષ્ટ્ર અને દક્ષિણ ગુજરાતના કેટલાક વિસ્તારોમાં હીટવેવ જેવી પરિસ્થિતિ સર્જાઈ શકે છે.
આથી આરોગ્ય વિભાગે લોકોને ખાસ સાવચેતી રાખવા અપીલ કરી છે.
શું કહે છે તબીબો?
બપોરે 12થી 4 દરમિયાન બહાર ન નીકળવું
પૂરતું પાણી અને પ્રવાહી પીવું
હળવા અને કપાસના કપડાં પહેરવા
લાંબા સમય સુધી સીધી ધુપમાં કામ ટાળવું
જાહેર આરોગ્ય નિષ્ણાતોના જણાવ્યા અનુસાર આગામી કેટલાક અઠવાડિયા ગરમીની દ્રષ્ટિએ અત્યંત મહત્વપૂર્ણ રહેશે અને હોસ્પિટલ તંત્ર માટે પણ આ સમય પડકારજનક બની શકે છે.
