સુરેન્દ્રનગર: સુરેન્દ્રનગરમાં યોજાયેલી કિસાન મહાપંચાયતમાં ખેડૂત નેતા અને આમ આદમી પાર્ટીના નેતા ઈસુદાન ગઢવીએ ખેડૂતોના વિવિધ પ્રશ્નોને લઈને રાજ્ય સરકાર સામે આંદોલન તેજ કરવાની જાહેરાત કરી છે. તેમણે જણાવ્યું કે ખેડૂતોના હિતના મુદ્દાઓને લઈને આગામી 5 જુલાઈએ ગાંધીનગરની સત્યાગ્રહ છાવણી ખાતે સામૂહિક ઉપવાસ કરવામાં આવશે.
મહાપંચાયતને સંબોધતા ઈસુદાન ગઢવીએ ખાસ કરીને ખેડૂતોની જમીનમાંથી પસાર થતી હાઈટેન્શન વીજ લાઈનો અને તેના બદલામાં મળતા વળતરનો મુદ્દો ઉઠાવ્યો હતો. તેમણે રાજ્ય સરકાર પાસે ખેડૂતોને યોગ્ય અને લાંબા ગાળાના હિતોને ધ્યાનમાં રાખીને વળતર આપવાની વ્યવસ્થા કરવાની માંગ કરી હતી.
આ પણ વાંચો: સુરતમાં જ્વેલર્સની દુકાનમાં રૂ. 30 લાખથી વધુની ચોરી : છતનું પતરું કાપી તસ્કરો 15 કિલો ચાંદીના દાગીના અને DVR લઈ ફરાર
સ્ટેટ લેવલ વળતર કમિટીની માંગ
ઈસુદાન ગઢવીએ જણાવ્યું કે ખેડૂતોની જમીન પર હાઈટેન્શન વીજ લાઈનોના થાંભલા ઉભા થતાં જમીનની કિંમત પર સીધી અસર પડે છે. તેમના કહેવા મુજબ, હાલની બજાર કિંમતના આધારે નહીં પરંતુ ભવિષ્યમાં જમીનની વધતી કિંમત અને વીજ કંપનીઓને થનારા નફાને ધ્યાનમાં રાખીને વળતર નક્કી થવું જોઈએ.
તેમણે રાજ્ય સરકારને સ્ટેટ લેવલની વળતર કમિટી બનાવવાની માંગ કરી. તેમના સૂચન મુજબ આ કમિટીમાં કેન્દ્ર અને રાજ્ય સરકારના અધિકારીઓ, ખેડૂતોના પ્રતિનિધિઓ, અસરગ્રસ્ત ખેડૂતો તથા નિવૃત્ત ન્યાયાધીશોનો સમાવેશ થવો જોઈએ જેથી પારદર્શક રીતે વળતર નક્કી થઈ શકે.
હાઈટેન્શન લાઈન અંગે સરકાર પર આક્ષેપ
ઈસુદાન ગઢવીએ આક્ષેપ કર્યો કે રાજ્યમાં મોટી સંખ્યામાં હાઈટેન્શન લાઈનોના પ્રોજેક્ટ માટે ભાજપના નેતાઓ અને ખાનગી કંપનીઓ વચ્ચે બેઠકો યોજાઈ રહી છે. તેમણે દાવો કર્યો કે ખેડૂતોના હિતોની પૂરતી કાળજી લેવામાં આવી રહી નથી અને જમીનની કિંમતમાં ઘટાડો થતો હોવા છતાં યોગ્ય વળતર આપવામાં આવતું નથી.
તેમણે વધુમાં કહ્યું કે ખેડૂતોને માત્ર એક વખતનું વળતર નહીં પરંતુ પ્રોજેક્ટથી થતા આર્થિક લાભમાં પણ યોગ્ય હિસ્સો મળવો જોઈએ.
આ પણ વાંચો: CM ભૂપેન્દ્ર પટેલે કરાવ્યો રાજ્યવ્યાપી પલ્સ પોલિયો અભિયાનનો પ્રારંભ : 83.49 લાખ બાળકોને પીવડાવાશે પોલિયોના ટીપાં
5 જુલાઈથી આંદોલનનો પ્રારંભ
મહાપંચાયત દરમિયાન ઈસુદાન ગઢવીએ જણાવ્યું કે ખેડૂતો, ખેતમજૂરો અને ભાગીદારી ખેતી કરતા ખેડૂતોના પ્રશ્નોને લઈને આંદોલનની શરૂઆત થઈ ચૂકી છે. તેમણે તમામ ખેડૂતોને 5 જુલાઈએ ગાંધીનગરની સત્યાગ્રહ છાવણી ખાતે યોજાનારા સામૂહિક ઉપવાસમાં જોડાવા અપીલ કરી હતી.
તેમણે કહ્યું કે ખેડૂતોના પ્રશ્નોનું યોગ્ય નિરાકરણ ન આવે ત્યાં સુધી લોકશાહી માધ્યમથી આંદોલન ચાલુ રહેશે.
