Gujarat Heatwave: ગુજરાતમાં ઉનાળાની કાળઝાળ ગરમી વચ્ચે હવામાન નિષ્ણાત અંબાલાલ પટેલએ આગામી દિવસો અને વર્ષોને લઈને ચિંતાજનક આગાહી કરી છે. રાજ્યના અનેક વિસ્તારોમાં તાપમાન સતત ઊંચું રહેતા લોકો ગરમીથી ત્રસ્ત બન્યા છે ત્યારે અંબાલાલ પટેલે જણાવ્યું છે કે હજુ પણ ગુજરાતમાં ગરમીનો પ્રકોપ યથાવત્ રહેશે અને આગામી વર્ષોમાં ગરમી વધુ આકરી બની શકે છે.
તેમણે જણાવ્યું કે હાલ પડતી અસહ્ય ગરમી પાછળનું મુખ્ય કારણ સોલર રેડિયેશન છે. સૂર્યના કિરણો સીધા પૃથ્વી પર પડી રહ્યા હોવાથી ગરમીમાં વધારો થઈ રહ્યો છે. સાથે જ સૂર્યની ક્રાંતિ પણ વધી રહી છે, જેના કારણે તાપમાનમાં સતત વધારો નોંધાઈ રહ્યો છે. અંબાલાલ પટેલના જણાવ્યા મુજબ લગભગ 21 જૂન આસપાસ સૂર્યની ક્રાંતિ તેની ટોચ પર પહોંચશે, જેના કારણે ગરમી અને ઉકરાટ બંનેમાં વધારો થઈ શકે છે.
બોરવેલમાંથી નીકળ્યું ઝેરી લાલ પાણી!: 5 ગામોની જમીન બંજર થવાના આરે, કેમિકલ ફેક્ટરી સામે ખેડૂતોનો આક્રોશ
5 જૂન પછી પવન ફૂંકાશે, રાહતની શક્યતા
અંબાલાલ પટેલે જણાવ્યું કે 5 જૂન પછી પવન ફૂંકાવા લાગશે, જેના કારણે લોકોને ગરમીમાંથી કંઈક અંશે રાહત મળી શકે છે. જોકે તેમણે સ્પષ્ટ કર્યું કે આ સંપૂર્ણ રાહત નહીં હોય, કારણ કે ભેજવાળા વાતાવરણને કારણે ઉકરાટ અને બફારો યથાવત્ રહી શકે છે. તેમણે વધુમાં કહ્યું કે 18 તારીખ આસપાસ પ્રિ-મોન્સુન એક્ટિવિટી સક્રિય થઈ શકે છે અને કેટલાક વિસ્તારોમાં વરસાદી ઝાપટાં પડી શકે છે. આ વરસાદના કારણે તાપમાનમાં થોડો ઘટાડો થઈ શકે છે. ખાસ કરીને દરિયાકાંઠાના વિસ્તારોમાં ગરમીમાં રાહત મળવાની શક્યતા વ્યક્ત કરવામાં આવી છે.
ગુજરાતના મોટા ભાગના વિસ્તારોમાં હાલમાં “આકાશમાંથી અગનગોળા વરસતા હોય” તેવી સ્થિતિ સર્જાઈ છે. દિવસ દરમિયાન રસ્તાઓ સુમસામ જોવા મળે છે અને બપોરના સમયે લોકો બહાર નીકળવાનું ટાળી રહ્યા છે. અનેક શહેરોમાં તાપમાન 43 ડિગ્રીની આસપાસ પહોંચી રહ્યું છે, જેના કારણે હિટવેવ જેવી પરિસ્થિતિ સર્જાઈ રહી છે.
પીએમ મોદીએ 24 કલાકમાં બે વખત કહી આ વાત: દેશ માટે શું છે સંકેત?
આગામી 10 વર્ષ ગરમીના રહેશે
અંબાલાલ પટેલે લાંબા ગાળાની ચિંતાજનક આગાહી પણ કરી છે. તેમના જણાવ્યા મુજબ આગામી 10 વર્ષ દરમિયાન ગરમીનું પ્રમાણ વધતું રહેશે. ખાસ કરીને 2027થી 2035 વચ્ચે તાપમાનમાં નોંધપાત્ર વધારો થઈ શકે છે. તેમણે જણાવ્યું કે વૈશ્વિક સ્તરે વધી રહેલા તાપમાન અને પર્યાવરણમાં થતા ફેરફારોની અસર ગુજરાત સહિત દેશના અનેક વિસ્તારોમાં દેખાશે.
તેમણે જ્યોતિષીય સંદર્ભમાં પણ ઉલ્લેખ કર્યો કે જ્યારે શનિ મિથુન રાશિમાં પ્રવેશ કરશે ત્યારે પવનની ગતિ અને હવામાનની સ્થિતિમાં ફેરફાર જોવા મળી શકે છે. જોકે હવામાન વિભાગો વૈજ્ઞાનિક આધારિત આગાહીઓ કરે છે, ત્યારે અંબાલાલ પટેલની આગાહીઓ ગુજરાતમાં લાંબા સમયથી લોકોમાં ચર્ચાનો વિષય બનતી રહી છે.
પાટીદાર સમાજમાં આંતરજ્ઞાતિય લગ્ન મુદ્દે બે ફાંટા: અનાર પટેલ અને લાલજી પટેલના વિરોધાભાસી સૂર
વેસ્ટર્ન ડિસ્ટર્બન્સ અને ગરમ થતી ધરતી
અંબાલાલ પટેલના જણાવ્યા અનુસાર હાલ દેશના ઉત્તર ભાગોમાં વેસ્ટર્ન ડિસ્ટર્બન્સની અસર જોવા મળી રહી છે. આ પરિસ્થિતિ વચ્ચે ધરતીનું તાપમાન સતત વધી રહ્યું છે. ધરતી ગરમ થવાથી તેની ગરમી ઉપરના વાતાવરણમાં જઈ રહી છે, જેના કારણે ઉકળાટભર્યું વાતાવરણ સર્જાઈ રહ્યું છે. ગરમીનું પ્રમાણ એટલું વધી રહ્યું છે કે સામાન્ય લોકો માટે પણ તે સહન કરવી મુશ્કેલ બની રહી છે. ખાસ કરીને વૃદ્ધો, નાના બાળકો અને બીમાર લોકો માટે આ સ્થિતિ વધુ જોખમી બની શકે છે. તેમણે લોકોને બપોરના સમયે ઘરની બહાર ન નીકળવાની સલાહ આપી છે.
હિટસ્ટ્રોક અને લૂ લાગવાની શક્યતા અંગે પણ ચેતવણી આપવામાં આવી છે. અંબાલાલ પટેલે જણાવ્યું કે જરૂરી કામ સિવાય બહાર જવાનું ટાળવું જોઈએ, કારણ કે લાંબા સમય સુધી તડકામાં રહેવાના કારણે હિટસ્ટ્રોકનો ખતરો વધી શકે છે. શરીરમાં પાણીની અછત, ચક્કર, ઉલ્ટી, થાક અને બેહોશી જેવા લક્ષણો દેખાય તો તરત સારવાર લેવી જોઈએ.
1912માં પણ પડી હતી આકરી ગરમી
અંબાલાલ પટેલે ઐતિહાસિક ઉલ્લેખ કરતાં જણાવ્યું કે 1912માં ગુજરાતમાં હાલની પરિસ્થિતિ કરતાં પણ વધુ ગરમી પડી હતી. એટલે કે અતિશય ગરમીની પરિસ્થિતિ નવી નથી, પરંતુ છેલ્લા કેટલાક વર્ષોમાં તેનું પ્રમાણ અને અસર બંને વધી રહ્યા છે. પર્યાવરણ નિષ્ણાતો પણ માને છે કે ક્લાઈમેટ ચેન્જના કારણે ગરમીના દિવસો વધી રહ્યા છે. શહેરોમાં કોંક્રીટના જંગલો, વાહનોનું પ્રદૂષણ અને હરિયાળીનું ઘટતું પ્રમાણ પણ ગરમી વધારતા મહત્વના પરિબળો બની રહ્યા છે. આ વચ્ચે આરોગ્ય નિષ્ણાતોએ લોકોને વધુ પાણી પીવું, હળવું ખોરાક લેવું, માથું ઢાંકીને બહાર નીકળવું અને સીધા તડકાથી બચવાની સલાહ આપી છે. આગામી દિવસોમાં ગરમીનો પ્રકોપ યથાવત્ રહેવાની શક્યતા વચ્ચે લોકો માટે સાવચેતી જ સૌથી મોટું રક્ષણ બની શકે છે.
