Ahmedabad Airport News: અમદાવાદના સરદાર વલ્લભભાઈ પટેલ ઈન્ટરનેશનલ એરપોર્ટ પર એક ગંભીર સુરક્ષા ઘટના સામે આવી છે. એર ઈન્ડિયા અને ઈન્ડિગોના બે પેસેન્જર વિમાન ટેક્સીવે પર સામસામે આવી જતાં મોટી દુર્ઘટનાનું જોખમ ઊભું થયું હતું. જોકે એર ટ્રાફિક કન્ટ્રોલ (ATC)ની સમયસરની સતર્કતાને કારણે બંને વિમાનોને સમયસર રોકી દેવામાં આવ્યા હતા અને મોટી દુર્ઘટના ટળી હતી. આ ઘટનાને નાગરિક ઉડ્ડયન સુરક્ષાની દ્રષ્ટિએ અત્યંત ગંભીર માનવામાં આવી રહી છે. પ્રાથમિક માહિતી મુજબ એર ઈન્ડિયાના પાયલટ દ્વારા ટેક્સીંગ દરમિયાન ખોટો વળાંક લેવામાં આવતા આ પરિસ્થિતિ સર્જાઈ હતી. ઘટનાને પગલે ડિરેક્ટરેટ જનરલ ઓફ સિવિલ એવિએશન (DGCA)એ તપાસના આદેશ આપ્યા છે અને દેશભરના એરપોર્ટ પર ટેક્સીવે ઓપરેશન દરમિયાન વધારાની સાવચેતી રાખવા સૂચના આપવામાં આવી છે.
શું બની હતી સમગ્ર ઘટના?
મળતી માહિતી અનુસાર, એર ઈન્ડિયાની ફ્લાઈટ AI-2493 બુધવારે મોડી સાંજે મુંબઈથી અમદાવાદ પહોંચી હતી. એર ટ્રાફિક કન્ટ્રોલ દ્વારા વિમાનને ટેક્સીવે 'C' અને 'G' મારફતે સ્ટેન્ડ નંબર 34L સુધી જવાની મંજૂરી આપવામાં આવી હતી. પરંતુ ટેક્સીંગ દરમિયાન એર ઈન્ડિયાના વિમાને નિર્ધારિત માર્ગને બદલે ખોટો વળાંક લઈ લીધો હતો. તે જ સમયે મુંબઈ જવા માટે તૈયાર ઈન્ડિગોની ફ્લાઈટ 6E-5160 ટેક્સીવે પર આગળ વધી રહી હતી. ATCએ પરિસ્થિતિને તરત જ ઓળખી ઈન્ડિગોના વિમાનને રોકવાનો આદેશ આપ્યો હતો. પરિણામે બંને વિમાનો અંદાજે 200 મીટરના અંતરે અટકી ગયા અને સંભવિત મોટી દુર્ઘટના ટળી ગઈ.
એર ઈન્ડિયાએ સ્વીકારી પાયલટની ભૂલ
આ ઘટનાને લઈને એર ઈન્ડિયાએ પોતાના પ્રાથમિક નિવેદનમાં સ્વીકાર્યું છે કે ટેક્સીંગ દરમિયાન પાયલટ દ્વારા ખોટો વળાંક લેવામાં આવતા આ સ્થિતિ સર્જાઈ હતી. બીજી તરફ એરપોર્ટ મેનેજમેન્ટનું કહેવું છે કે વિમાન લેન્ડિંગથી લઈને પાર્કિંગ સ્ટેન્ડ સુધી પહોંચે ત્યાં સુધીની સમગ્ર પ્રક્રિયાનું નિયંત્રણ એર ટ્રાફિક કન્ટ્રોલ પાસે રહે છે અને એરપોર્ટ મેનેજમેન્ટની તેમાં સીધી ભૂમિકા હોતી નથી. ATC અધિકારીઓના જણાવ્યા મુજબ, સમયસર લેવાયેલા નિર્ણય અને સતત મોનિટરિંગના કારણે જ બંને વિમાનોને સુરક્ષિત રીતે રોકી શકાયા હતા.
DGCAએ તપાસ શરૂ કરી, તમામ એરપોર્ટને અપાઈ સૂચના
ઘટનાની ગંભીરતાને ધ્યાનમાં રાખીને DGCAએ સમગ્ર મામલે તપાસ શરૂ કરી છે. તપાસમાં પાયલટના નિર્ણય, ATCની સૂચનાઓ, ટેક્સીવે પ્રક્રિયા અને અન્ય તકનીકી પાસાઓની સમીક્ષા કરવામાં આવશે. સાથે જ દેશના તમામ એરપોર્ટ મેનેજમેન્ટ અને એરલાઇન્સને ટેક્સીવે ઓપરેશન દરમિયાન વધારાની સતર્કતા રાખવા સૂચના આપવામાં આવી છે, જેથી ભવિષ્યમાં આવી ઘટના ફરી ન બને.
આ પણ વાંચો: ડિજિટલ અરેસ્ટ કૌભાંડ સામે CBIનો દેશવ્યાપી પ્રહાર : 16 રાજ્યોમાં 80થી વધુ સ્થળોએ દરોડા, બે આરોપીઓની ધરપકડ
આ ઘટનાને ગંભીર કેમ માનવામાં આવે છે?
એવિએશન સુરક્ષાના નિયમો મુજબ ટેક્સીવે પર બે વિમાન સામસામે આવી જવું 'સીરિયસ સેફ્ટી ઈન્સિડેન્ટ' તરીકે ગણવામાં આવે છે. જો બંને વિમાનોની ગતિ વધુ હોત અથવા સમયસર બ્રેક ન લગાવવામાં આવ્યા હોત તો મોટી ટક્કર સર્જાઈ શકતી હતી. આવી ઘટનાઓ માત્ર વિમાનોને નુકસાન પહોંચાડતી નથી, પરંતુ મુસાફરો અને ક્રૂ સભ્યોના જીવને પણ ગંભીર જોખમમાં મૂકી શકે છે. તેથી આવા બનાવોની તપાસ ખૂબ જ ગંભીરતાથી કરવામાં આવે છે.
આવી પરિસ્થિતિ કેવી રીતે સર્જાય છે?
વિમાન જમીન પર ચાલતું હોય ત્યારે પણ પાયલટ, એર ટ્રાફિક કન્ટ્રોલ, ગ્રાઉન્ડ સ્ટાફ અને એરપોર્ટની માર્ગદર્શક સિસ્ટમ વચ્ચે સતત અને ચોક્કસ સંકલન જરૂરી હોય છે. નિષ્ણાતોના જણાવ્યા મુજબ, ATCની સૂચનાનો ખોટો અર્થ કાઢવો, ટેક્સીવેના સાઈન ચૂકી જવા, રાત્રિના સમયે ઓછી દૃશ્યતા અથવા માનવીય ભૂલ જેવા કારણો આવી ઘટનાઓ માટે જવાબદાર બની શકે છે.
છેલ્લા કેટલાક વર્ષોમાં આવી ઘટનાઓ
છેલ્લાં ચાર વર્ષ દરમિયાન દેશના એરપોર્ટ પર ટેક્સીવે સંબંધિત કેટલીક ગંભીર સુરક્ષા ઘટનાઓ સામે આવી ચૂકી છે. જૂન 2024માં મુંબઈ એરપોર્ટ પર એર ઈન્ડિયા અને ઈન્ડિગોના બે વિમાન જમીન પર એકબીજાની ખૂબ નજીક આવી ગયા હતા. તે સમયે એક વિમાન પુશબેક પ્રક્રિયામાં હતું જ્યારે બીજું ટેક્સીંગ કરી રહ્યું હતું. તે પહેલાં વર્ષ 2023માં ઈન્ડિગોના એક વિમાનનો પાછળનો ભાગ ટેક્સીવે દરમિયાન રનવે સાથે અથડાયો હતો. આ ઘટનાને પગલે સંબંધિત પાયલટ સામે કાર્યવાહી પણ કરવામાં આવી હતી.
તપાસ બાદ જ સામે આવશે સાચું કારણ
હાલમાં આ સમગ્ર ઘટનાની સત્તાવાર તપાસ ચાલુ છે. DGCAની તપાસ પૂર્ણ થયા બાદ જ સ્પષ્ટ થશે કે ઘટનાનું ચોક્કસ કારણ શું હતું અને તેમાં કોની બેદરકારી જવાબદાર હતી. જોકે સમયસરની સતર્કતાના કારણે મોટી દુર્ઘટના ટળી જતા અનેક મુસાફરો અને ક્રૂ સભ્યોનો જીવ બચી ગયો હોવાનું માનવામાં આવી રહ્યું છે.
