Street Food Vendors QR Code System In Ahmedabad : અમદાવાદ શહેરમાં સ્ટ્રીટ ફૂડ એટલે કે ખાણી-પીણીની લારીઓ ગ્રાહકોમાં ખૂબ જ લોકપ્રિય છે. આ લારીઓ પર સ્વચ્છતા, હાઇજીન અને ખાદ્ય સુરક્ષાના ધોરણો વધુ મજબૂત બને તે માટે અમદાવાદ મ્યુનિસિપલ કોર્પોરેશન (AMC) ના હેલ્થ વિભાગના ફૂડ ડિપાર્ટમેન્ટ દ્વારા એક અદભુત નવીન પહેલ કરવામાં આવી છે. હવેથી શહેરમાં ખાણી-પીણીની લારીઓ પર QR કોડ લગાવવામાં આવશે. આ QR કોડ આધારિત રજિસ્ટ્રેશન અને ફિડબેક સિસ્ટમની મદદથી સ્ટ્રીટ ફૂડ વેન્ડરોના કામમાં પારદર્શકતા આવશે અને કોર્પોરેશન દ્વારા તેનું યોગ્ય અને અસરકારક મોનિટરિંગ પણ કરી શકાશે.
QR કોડ દ્વારા સરળ ઓનલાઈન રજિસ્ટ્રેશન
AMC દ્વારા બહાર પાડવામાં આવેલા આ QR કોડને સ્કેન કરીને કોઈપણ સ્ટ્રીટ ફૂડ વેન્ડર પોતાની લારીનું ઓનલાઈન રજિસ્ટ્રેશન ખૂબ જ સરળતાથી કરી શકે છે. આ રજિસ્ટ્રેશન પ્રક્રિયા શરૂ થતાં જ સૌથી પહેલાં વેન્ડરના ધંધાના સ્થળનું GPS લોકેશન સિસ્ટમ દ્વારા કેપ્ચર કરવામાં આવે છે. આનાથી કોર્પોરેશનના ડેટાબેઝમાં લારીનું ચોક્કસ સ્થાન નોંધાઈ જાય છે. ત્યારબાદ વેન્ડરે પોતાનું નામ, મોબાઈલ નંબર, વ્યવસાયનું નામ, સરનામું અને વોર્ડની તમામ વિગતો ઓનલાઈન ફોર્મમાં ભરવાની રહે છે. પ્રક્રિયા પૂરી થતાં જ એક યુનિક QR કોડની PDF જનરેટ થાય છે, જેની પ્રિન્ટ કાઢીને વેન્ડરે પોતાની લારી પર ગ્રાહકો સરળતાથી જોઈ શકે તે રીતે લગાવવાની રહેશે. જો કોઈ વેન્ડરનો QR કોડ ખોવાઈ જાય તો તે રજિસ્ટર્ડ મોબાઈલ નંબર દ્વારા તેને ફરીથી મેળવી શકે છે.
આ પણ ખાસ વાંચો : AMCમાં સ્ટોર્મ વૉટર લાઇનનું મહાકૌભાંડ! : કરોડોની ગેરરીતિ બાદ હવે અધિકારીઓ પર તવાઈ
ગ્રાહકો માટે ફિડબેક અને રેટિંગ આપવાની સુવિધા
આ સિસ્ટમ માત્ર વેન્ડરો માટે જ નહીં પરંતુ સામાન્ય નાગરિકો માટે પણ ખૂબ જ ઉપયોગી સાબિત થશે. લારી પર લગાવેલા QR કોડને ગ્રાહકો પોતાના મોબાઈલથી સ્કેન કરી શકશે. સ્કેન કરતાં જ સંબંધિત ફૂડ વેન્ડરની તમામ વિગતો સ્ક્રીન પર આવી જશે. આ સાથે ગ્રાહકો લારી પરની સ્વચ્છતા, હાઇજીન અને ફૂડની ક્વોલિટી કેવી છે તે અંગે પોતાનો કિંમતી ફિડબેક અને રેટિંગ આપી શકશે. ગ્રાહકો તરફથી મળતા આ પ્રતિસાદના આધારે જ AMCનો ફૂડ વિભાગ લારીઓનું નિયમિત મોનિટરિંગ કરશે અને જરૂર જણાય ત્યાં યોગ્ય કાર્યવાહી પણ કરશે.
આ પણ ખાસ વાંચો : અલ નીનોની આશંકા વચ્ચે ગુજરાત સરકારનું મોટું એલાન : 300થી વધુ તળાવો ભરવાનો સરકારનો નિર્ણય
10,076 થી વધુ રજિસ્ટ્રેશન અને ટોપ-5 ફૂડ વેન્ડર્સ
અમદાવાદના અલગ-અલગ ઝોનમાં આ સિસ્ટમને ખૂબ જ સારો પ્રતિસાદ મળ્યો છે અને અત્યાર સુધીમાં 10,076થી વધુ સ્ટ્રીટ ફૂડ વેન્ડરોનું ઓનલાઈન રજિસ્ટ્રેશન થઈ ચૂક્યું છે. નાગરિકો દ્વારા મળેલા ફિડબેકના આધારે શહેરમાં સૌથી શ્રેષ્ઠ રેટિંગ મેળવનાર ટોપ-5 વેન્ડરોની યાદી પણ બહાર આવી છે. જેમાં ઉત્તર ઝોનના કુબેરનગરમાં હરિયાળી પાન સેન્ટર પાસે આવેલું દિલીપ પકોડી સેન્ટર, પૂર્વ ઝોનમાં સોનીની ચાલી બ્રિજ પાસે આવેલું એવન બોમ્બે બિરયાની, દક્ષિણ-પશ્ચિમ ઝોનના જોધપુર વિસ્તારમાં આકૃતિ શોપિંગ સેન્ટર પાસે આવેલો શર્મા સ્ટોલ, પૂર્વ ઝોનના વસ્ત્રાલમાં આવેલું પટેલ પાણીપુરી તેમજ દક્ષિણ ઝોનના વટવા વિસ્તારમાં દેવભૂમિ ચોકડી પાસે આવેલું જલારામ ફાસ્ટ ફૂડ મોખરે રહ્યા છે.
આ પણ ખાસ વાંચો : "...તો હું જીતુ વાઘાણીના પગ ધોઈને પાણી પીશ" : વિવાદોમાં રહેતી TikTok ગર્લ કીર્તિ પટેલનું નિવેદન ચર્ચામાં, જાણો શું છે મામલો
શ્રેષ્ઠ કામગીરી કરનાર વેન્ડરોનું સન્માન અને AMCની અપીલ
સ્ટ્રીટ ફૂડમાં ગુણવત્તા અને સ્વચ્છતા જળવાઈ રહે તે માટે AMC દ્વારા દર મહિને સૌથી સારું રેટિંગ મેળવનારા ફૂડ વેન્ડરોને પ્રોત્સાહિત કરીને બિરદાવવામાં આવશે. આનાથી અન્ય વેન્ડરો પણ પોતાની લારી પર સ્વચ્છતા રાખવા માટે પ્રેરિત થશે. કોર્પોરેશન દ્વારા હજુ સુધી રજિસ્ટ્રેશન ન કરાવનાર તમામ નાના-મોટા ફૂડ વેન્ડરોને તાત્કાલિક આ પ્રક્રિયા પૂર્ણ કરવા અને QR કોડ પ્રદર્શિત કરવા માટે નમ્ર અપીલ કરવામાં આવી છે જેથી અમદાવાદ આખામાં ગ્રાહકોને સ્વચ્છ, સુરક્ષિત અને વિશ્વાસપાત્ર સ્ટ્રીટ ફૂડ મળી રહે.
