Ahmedabad CG Road Pelican Signal: અમદાવાદ સ્માર્ટ સિટી તરીકે સતત નવી ટેકનોલોજી અને આધુનિક સુવિધાઓ અપનાવી રહેલા અમદાવાદ શહેરમાં હવે પદયાત્રીઓ માટે પણ એક નવી સ્માર્ટ ટ્રાફિક વ્યવસ્થાની શરૂઆત કરવામાં આવી છે. શહેરના સૌથી વ્યસ્ત ગણાતા સીજી રોડ પર અમદાવાદ મ્યુનિસિપલ કોર્પોરેશન (AMC) દ્વારા શહેરનું પ્રથમ પેલિકન ટ્રાફિક સિગ્નલ (Pelican Signal) પ્રાયોગિક ધોરણે શરૂ કરવામાં આવ્યું છે. આ નવી વ્યવસ્થા હેઠળ હવે પદયાત્રીઓને રોડ ક્રોસ કરવા માટે ટ્રાફિક અટકવાની રાહ જોવાની જરૂર નહીં રહે. તેઓ સિગ્નલ પાસે લગાવવામાં આવેલું બટન દબાવીને વાહનવ્યવહારને નિયંત્રિત કરી શકશે, જેના કારણે રોડ પાર કરવાનું વધુ સુરક્ષિત અને સરળ બનશે.
શું છે પેલિકન સિગ્નલ?
પેલિકન સિગ્નલ એ ખાસ કરીને પદયાત્રીઓની સુરક્ષા માટે તૈયાર કરાયેલ ટ્રાફિક સિસ્ટમ છે, જે દુનિયાના અનેક વિકસિત શહેરોમાં સફળતાપૂર્વક અમલમાં છે. આ સિસ્ટમમાં રોડની બંને બાજુ વિશેષ પુશ-બટન લગાવવામાં આવે છે. જ્યારે કોઈ વ્યક્તિ રોડ ક્રોસ કરવા માંગે ત્યારે તેને આ બટન દબાવવાનું રહે છે. ત્યારબાદ ટ્રાફિક કંટ્રોલ સિસ્ટમ સક્રિય થાય છે અને થોડા સમય પછી વાહનો માટે સિગ્નલ લાલ થઈ જાય છે. વાહનો અટકી જતા પદયાત્રીઓને સુરક્ષિત રીતે રોડ પાર કરવા માટે નિર્ધારિત સમય આપવામાં આવે છે.
આ પણ વાંચો: વેસ્ટર્ન ડિસ્ટર્બન્સ અને અલનીનો વચ્ચે અંબાલાલ પટેલની મોટી આગાહી: આ તારીખથી ગુજરાતમાં તૂટી પડશે મેઘરાજા!
CG રોડ પર પ્રથમ પ્રયોગ
AMC દ્વારા આ પેલિકન સિગ્નલ શહેરના મ્યુનિસિપલ માર્કેટ નજીક CG રોડ પર સ્થાપિત કરવામાં આવ્યું છે. આ વિસ્તાર દિવસભર ભારે ટ્રાફિક અને મોટી સંખ્યામાં પદયાત્રીઓ માટે જાણીતો છે. અધિકારીઓનું માનવું છે કે, આ સિસ્ટમના કારણે રસ્તો ક્રોસ કરતી વખતે થતા અકસ્માતોમાં ઘટાડો થશે અને પદયાત્રીઓને વધુ સુરક્ષા મળશે. જો આ પ્રયોગ સફળ રહેશે તો શહેરના અન્ય વ્યસ્ત વિસ્તારોમાં પણ આવી સિસ્ટમ સ્થાપિત કરવામાં આવી શકે છે.
કેવી રીતે કામ કરશે નવી સિસ્ટમ?
પદયાત્રીએ રોડ ક્રોસ કરતાં પહેલાં સિગ્નલ થાંભલા પર લગાવેલું "Push Button to Cross" બટન દબાવવાનું રહેશે. બટન દબાવ્યા પછી સિસ્ટમ ટ્રાફિક સિગ્નલ સાથે સંકલિત થઈ જશે. થોડા સમય બાદ વાહનો માટે રેડ સિગ્નલ શરૂ થશે અને વાહનચાલકોને થોભવું પડશે. ત્યારબાદ પદયાત્રીઓ માટે "WALK" સૂચના દેખાશે અને તેઓ સુરક્ષિત રીતે રસ્તો પાર કરી શકશે. સિગ્નલ પર "WAIT", "WALK" અને "PUSH BUTTON TO CROSS" જેવા સ્પષ્ટ સૂચનો પણ મૂકવામાં આવ્યા છે જેથી લોકો સરળતાથી તેનો ઉપયોગ કરી શકે.
સ્માર્ટ સિટી તરફ વધુ એક પગલું
અમદાવાદમાં વધતા ટ્રાફિક અને પદયાત્રીઓની સુરક્ષા અંગે ઉઠતા પ્રશ્નો વચ્ચે AMCની આ પહેલને મહત્વપૂર્ણ માનવામાં આવી રહી છે. ખાસ કરીને વૃદ્ધો, બાળકો અને મહિલાઓ માટે વ્યસ્ત માર્ગો પાર કરવાનું હવે વધુ સરળ અને સુરક્ષિત બનશે. શહેરમાં સ્માર્ટ ટ્રાફિક મેનેજમેન્ટ અને રોડ સેફ્ટી વધારવા માટે AMC દ્વારા લેવામાં આવેલું આ પગલું ભવિષ્યમાં અન્ય વિસ્તારો માટે પણ મોડેલ બની શકે છે.
