આજના સમયમાં સ્માર્ટફોન ચાર્જર આપણા જીવનનો અભિન્ન ભાગ બની ગયો છે. તમે જોયું હશે કે બજારમાં ઉપલબ્ધ મોટાભાગના ચાર્જર સફેદ રંગમાં જ હોય છે, જ્યારે કાળા અથવા અન્ય રંગના ચાર્જર બહુ ઓછા જોવા મળે છે. હવે પ્રશ્ન એ છે કે ચાર્જરનો રંગ મુખ્યત્વે સફેદ જ કેમ રાખવામાં આવે છે? તેનું કારણ જેટલું રસપ્રદ છે, એટલું જ ઉપયોગી પણ છે.
સફેદ રંગથી પ્રીમિયમ લુક
સ્માર્ટફોન કંપનીઓનું માનવું છે કે સફેદ રંગ સ્વચ્છતા અને પ્રીમિયમ દેખાવ આપે છે. દૂરથી ચમકતો દેખાવ ગ્રાહકો પર સારી છાપ પાડે છે. આ જ કારણ છે કે Apple જેવી કંપનીઓ હંમેશા તેમના ચાર્જર અને કેબલ સફેદ રંગમાં જ લોન્ચ કરે છે.
ગંદકી અને નુકસાન ઝડપથી દેખાય
સફેદ રંગની બીજી મોટી ખાસિયત એ છે કે તે પર થતી ગંદકી, સ્ક્રેચ અથવા બર્ન માર્ક તરત જ દેખાઈ જાય છે. વપરાશકર્તા સમયસર ચાર્જરમાં ખામી કે જોખમ ઓળખી શકે છે. જ્યારે કાળા કે ઘેરા રંગના ચાર્જરમાં આવી સમસ્યા છુપાઈ જાય છે.
પ્રોડક્શન સસ્તું અને સરળ
ચાર્જર બનાવવામાં વપરાતું પ્લાસ્ટિક સ્વાભાવિક રીતે સફેદ રંગમાં મોલ્ડ થાય છે. કંપનીઓને વધારાના કલરિંગ ખર્ચની જરૂર પડતી નથી, જેના કારણે સફેદ ચાર્જરનું ઉત્પાદન સસ્તું અને મોટા પાયે કરવું સરળ બને છે.
ગરમીનું સંચાલન
ચાર્જિંગ દરમિયાન ચાર્જરમાં ગરમી ઉત્પન્ન થાય છે. સફેદ સપાટી ગરમી ઓછું શોષે છે, જ્યારે કાળા કે ડાર્ક કલર ઝડપથી ગરમી શોષી લે છે. તેથી સફેદ રંગ ચાર્જરને ઠંડુ રાખવામાં મદદરૂપ થાય છે અને તેની આયુષ્ય વધારી શકે છે.
બ્રાન્ડિંગ અને માર્કેટિંગ
સફેદ રંગ શાંતિ, વિશ્વાસ અને સરળતાનું પ્રતીક માનવામાં આવે છે. Apple એ પોતાના બ્રાન્ડિંગ સાથે સફેદ ચાર્જરને એક સ્ટાન્ડર્ડ તરીકે સ્થાપિત કર્યો છે, જેને બાદમાં અન્ય કંપનીઓએ પણ અપનાવ્યો.
તો કાળા ચાર્જર ખરાબ છે?
એવું નથી. કાળા અથવા અન્ય રંગના ચાર્જર પણ સલામત હોય છે. ઘણા બ્રાન્ડ્સ હવે ગ્રાહકોને પ્રીમિયમ અને વ્યક્તિગત અનુભવ આપવા વિવિધ કલરમાં ચાર્જર લોન્ચ કરી રહ્યા છે. છતાં, મોટાભાગની કંપનીઓ માટે સફેદ રંગ આજે પણ સલામતી, સરળતા અને માર્કેટિંગ માટે પ્રથમ પસંદગી છે.
