હૈદરાબાદ સ્થિત સ્ટાર્ટઅપ વિઓના ફિનટેકને નેશનલ પેમેન્ટ્સ કોર્પોરેશન ઓફ ઇન્ડિયા (NPCI) તરફથી થર્ડ-પાર્ટી એપ્લિકેશન પ્રોવાઇડર (TPAP) તરીકે કામ કરવાની મંજૂરી મળી છે. આ સાથે કંપનીને ઝડપથી વિકસતા યુનિફાઇડ પેમેન્ટ્સ ઇન્ટરફેસ (UPI) ઇકોસિસ્ટમમાં પ્રવેશવાનો માર્ગ મોકળો થયો છે.
કંપનીએ 8 સપ્ટેમ્બરે જાહેર કરેલી પ્રેસ રિલીઝ મુજબ, આ પગલાથી ટિયર-II, ટિયર-III અને ગ્રામીણ બજારોમાં ડિજિટલ ચુકવણીઓનો વ્યાપ વધશે. વિઓના ફિનટેક GramPay અને Viona Pay જેવી એપ્સ ચલાવે છે, જે ખાસ કરીને ગ્રામ્ય અને વંચિત વિસ્તારોને નિશાન બનાવે છે.
કંપનીના ફાઉન્ડર રવિન્દ્રનાથ યાર્લાગડ્ડાએ જણાવ્યું હતું કે, “આ મંજૂરી NPCI તરફથી અમારી એપ્લિકેશનોમાં વિશ્વાસ દર્શાવે છે. અમે ખેડૂતો, દુકાનદારો અને પરિવારો માટે UPI પેમેન્ટ ચુકવણીઓ વધુ સુલભ બનાવવા પ્રતિબદ્ધ છીએ.” તેમણે વધુમાં ઉમેર્યું કે વિઓના ફિનટેક શહેરી અને ગ્રામ્ય બંનેના લોકોને સુરક્ષિત અને સરળ ફાયનાન્શિયલ ટૂલ પૂરા પાડવા પર ધ્યાન કેન્દ્રિત કરી રહી છે.
કિસાન બજાર સાથે સીધી કનેક્ટિવિટી
વિઓનાની યોજના હેઠળ GraamPay પ્લેટફોર્મ પર કિસાન બજાર શરૂ કરવામાં આવશે, જ્યાં ખેડૂતોને વાજબી ભાવ, ઝડપી નિરાકરણ અને ખરીદદારો સાથે સીધા જોડાવાની તક મળશે. આ પ્લેટફોર્મ ગ્રામ સ્તરના ઉદ્યોગસાહસિકો (VLEs)ના નેટવર્ક દ્વારા ઈ-કોમર્સ, નાણાકીય સાક્ષરતા અને ડિજિટલ ટ્રાન્ઝેક્શનને પ્રોત્સાહન આપશે.
