અમેરિકામાં ચાલી રહેલું 41 દિવસનું સૌથી લાંબું શટડાઉન હવે અંતિમ તબક્કે છે. સોમવારે, કેટલાક કાયદા ઘડનારાઓએ શટડાઉન સમાપ્ત કરવાના પ્રસ્તાવને મંજૂરી આપી. જોકે, ડેમોક્રેટિક પાર્ટીના અનેક નેતાઓ હજી વોશિંગ્ટનની બહાર હોવાથી, તેમની વાપસી બાદ કોંગ્રેસમાં બિલ પર મતદાન થશે. આ પગલું યુએસ ઇતિહાસના સૌથી લાંબા સરકારી શટડાઉનને સમાપ્ત કરી શકે છે.
ટ્રમ્પે આપ્યું બિલને સમર્થન
યુએસ પ્રમુખ ડોનાલ્ડ ટ્રમ્પે શટડાઉન સમાપ્ત કરવાના બિલને સમર્થન આપતાં કહ્યું કે,
“અમે ટૂંક સમયમાં આપણો દેશ ફરીથી ખોલવા જઈ રહ્યા છીએ.”
ટ્રમ્પના આ નિવેદન પછી વ્હાઇટ હાઉસ અને કોંગ્રેસ વચ્ચેની તંગ પરિસ્થિતિમાં રાહતની આશા વધી છે.
ઓબામાકેર ફંડના મુદ્દે વિવાદ
શટડાઉનનું મુખ્ય કારણ ઓબામાકેર ફંડ અને આરોગ્ય વીમા યોજનાને લઈને ઉઠેલો વિવાદ હતો.
વિપક્ષી ડેમોક્રેટિક પાર્ટીએ આરોગ્ય વીમા યોજનામાં કપાતના વિરોધમાં શટડાઉનની જાહેરાત કરી હતી. ડેમોક્રેટ્સ સતત રિપબ્લિકન પાર્ટીને તેમની માંગણીઓ સ્વીકારવા માટે દબાણ કરી રહ્યા હતા.
40 દિવસથી વધુ ચાલેલા આ તણાવ બાદ ગઈકાલે બંને પક્ષના નેતાઓ વચ્ચે બેઠક યોજાઈ. બેઠકમાં વ્હાઇટ હાઉસે શટડાઉન સમાપ્ત કરવાનો અને ડિસેમ્બરમાં એફોર્ડેબલ કેર એક્ટ પર મતદાન કરવાનો પ્રસ્તાવ રજૂ કર્યો.
ડેમોક્રેટ્સમાં આંતરિક વિભાજન
ન્યૂ હેમ્પશાયરના સેનેટર જીની શાહીને જણાવ્યું કે,
“રિપબ્લિકન પાર્ટીએ અમારી મુખ્ય માંગણીઓને નકારી. આરોગ્યસંભાળ સેવાઓ ચાલુ રાખવા માટે અમને આ શરત સ્વીકારવી પડી. યોગ્ય સમયે આ મુદ્દે મતદાન થશે અને અમને વિશ્વાસ છે કે આ સેવાઓ ચાલુ રહેશે.”
જો કે, ડેમોક્રેટ્સમાં વિભાજન જોવા મળી રહ્યું છે. વાટાઘાટોમાં સામેલ 10-15 સભ્યોમાંથી માત્ર પાંચ સભ્યોએ પ્રસ્તાવને સમર્થન આપ્યું છે. બાકીના નેતાઓ હજી પણ શટડાઉન ચાલુ રાખવા માટે દબાણ કરી રહ્યા છે.
આગામી તબક્કો – કોંગ્રેસમાં મતદાન
હવે આગામી તબક્કામાં કોંગ્રેસ બિલ પર મતદાન કરશે. જો બિલ પસાર થાય, તો 41 દિવસથી ચાલતું આ શટડાઉન સમાપ્ત થશે અને ફેડરલ એજન્સીઓ ફરીથી કાર્યરત બનશે.
રાજકીય વિશ્લેષકોનું માનવું છે કે આ શટડાઉનને કારણે અમેરિકાની અર્થવ્યવસ્થાને ભારે નુકસાન થયું છે અને લાખો સરકારી કર્મચારીઓ પગાર વિના કામ કરવા મજબૂર બન્યા હતા.
