સંયુક્ત રાષ્ટ્ર સુરક્ષા પરિષદ (UNSC)ની બેઠકમાં ભારતે આતંકવાદ અને ગેરકાયદેસર હથિયારોની દાણચોરી સામે તીવ્ર વિરોધ વ્યક્ત કર્યો છે. ભારતના કાયમી પ્રતિનિધિ પર્વતાનેની હરીશે આડકતરી રીતે પાકિસ્તાનની નીતિઓની નિંદા કરતાં જણાવ્યું કે ભારત વર્ષોથી સરહદ પારથી થતા આતંકવાદનો ભોગ બનતું આવ્યું છે અને હવે ડ્રોન મારફતે હથિયારોની ઘૂસણખોરી ચિંતાજનક સ્તરે પહોંચી છે.
હરીશે કહ્યું કે સુરક્ષા પરિષદને આવા તત્વો સામે શૂન્ય સહિષ્ણુતા રાખવી જોઈએ, જે આતંકવાદી સંગઠનોને નાણાં, સહાય કે શસ્ત્રો પૂરા પાડે છે. તેમણે સ્પષ્ટ કર્યું કે નાના હથિયારો અને દારૂગોળાની અંધાધૂંધ દાણચોરી આતંકવાદી સંગઠનોને સક્રિય રાખે છે અને તેના માધ્યમથી આંતરરાષ્ટ્રીય શાંતિ અને સુરક્ષા પર સીધો ખતરો ઉભો થાય છે.
ભારતે કહ્યું કે UNSC દ્વારા લાદવામાં આવેલા શસ્ત્ર પ્રતિબંધો માત્ર દસ્તાવેજી ન રહે, પરંતુ તે વાસ્તવિક રીતે અમલમાં આવે એ જરૂરી છે. સંઘર્ષગ્રસ્ત વિસ્તારોમાં હથિયારોના પ્રવાહને રોકવા માટે વૈશ્વિક સ્તરે સમન્વયિત પગલાં લેવામાં આવે તે સમયની માંગ છે.
હરીશે જણાવ્યું કે હથિયારોની ગેરકાયદેસર દાણચોરી અટકાવવા માટે દેશોએ સરહદ અને કસ્ટમ સંકલન મજબૂત કરવું જોઈએ, ગુપ્તચર માહિતીની આપલે વધારવી જોઈએ અને નિકાસ નિયંત્રણ માટે સખત કાયદા અમલમાં લાવવા જોઈએ. તેમણે યુએનના ‘પ્રોગ્રામ ઓફ એક્શન’ (PoA) અને ‘ઇન્ટરનેશનલ ટ્રેસિંગ ઇન્સ્ટ્રુમેન્ટ’ (ITI) ને વધુ અસરકારક બનાવવા માટે વૈશ્વિક સહકારની જરૂરિયાત પર ભાર મૂક્યો.
યુએન સેક્રેટરી-જનરલના તાજેતરના અહેવાલનો ઉલ્લેખ કરતાં હરીશે કહ્યું કે કમજોર સુરક્ષાવાળા વેરહાઉસ, નરમ સરહદ નિયંત્રણ અને દાણચોરી નેટવર્ક આતંકવાદી જૂથોને હથિયાર પુરવઠો સરળ બનાવે છે. તેમણે ચેતવણી આપી કે ઘરઆંગણે બનેલા હથિયારોની વધતી પ્રવૃતિ ટ્રેસિંગ પ્રક્રિયાને વધુ મુશ્કેલ બનાવી રહી છે.
અંતમાં હરીશે સ્પષ્ટ કર્યું કે ભારત આતંકવાદી જૂથો સુધી હથિયારો ન પહોંચે તે માટે પૂરેપૂરું પ્રતિબદ્ધ છે અને વૈશ્વિક સ્તરે આતંકવાદ સામેની લડતમાં સક્રિય યોગદાન આપતું રહેશે.
