સ્વચ્છ હવાની માગ કરતાં લોકો સાથે ક્રિમિનલ જેવો વ્યવહાર : દિલ્હી પોલીસની એક્શન પર ભડક્યા રાહુલ ગાંધી

દેશમાં વધી રહેલા વાયુપ્રદૂષણ અને આ મુદ્દે વિરોધ નોંધાવતા નાગરિકો પ્રત્યે સરકારના વલણ અંગે કોંગ્રેસના સાંસદ તથા વિપક્ષના નેતા રાહુલ ગાંધીએ તીખી ટિપ્પણી કરી છે. તેમણે જણાવ્યું કે સ્વચ્છ હવાની માંગ કરવી એ કોઈ ગુનો નથી, પરંતુ માનવ અધિકાર છે, છતાં સરકાર શાંતિપૂર્ણ અવાજોને દબાવી રહી છે.

રાહુલ ગાંધીએ પોતાના નિવેદનમાં કહ્યું કે દરેક વ્યક્તિને સ્વચ્છ અને સુરક્ષિત હવાની હકદારી છે. તેમણે સવાલ ઉઠાવ્યો કે જે લોકો સ્વચ્છ પર્યાવરણ માટે શાંતિપૂર્ણ રીતે માંગણી કરે છે, તેમના પર દમનાત્મક પગલાં કેમ લેવામાં આવી રહ્યા છે.

"સરકાર ઉકેલ લાવે, દમન નહીં કરે"

વિપક્ષના નેતાએ જણાવ્યું કે પ્રદૂષણના કારણે દેશભરના લાખો લોકો શ્વાસ સંબંધિત રોગોથી પીડાઈ રહ્યા છે અને નાના બાળકોના સ્વાસ્થ્ય પર પણ ગંભીર અસર થઈ રહી છે. તેમ છતાં, સરકાર માત્ર કાગળ પરના વચનો આપીને મામલો ટાળી રહી છે. તેમણે કહ્યું કે સત્તામાં બેસેલા લોકો લોકોના જીવ સાથે રમે છે અને પ્રદૂષણ સામેની લડાઈને ગંભીરતાથી નથી લેતા.

તેમણે ભારપૂર્વક જણાવ્યું કે હવે સમય આવી ગયો છે કે સરકાર તરત જ અસરકારક પગલાં લે. નાગરિકોની અવાજ દબાવવાને બદલે સમસ્યાનું નિરાકરણ લાવવું એ સરકારની જવાબદારી છે.

દિલ્હીનો હવા ગુણવત્તા સૂચકાંક 400 પાર

રાજધાની દિલ્હીમાં પ્રદૂષણના સ્તર ચિંતાજનક બની ગયા છે. અનેક વિસ્તારોમાં Air Quality Index (AQI) 400 ને વટાવી ગયો છે, જેના કારણે શહેરને ‘Red Zone’ તરીકે જાહેર કરવામાં આવ્યું છે. પરિસ્થિતિને ધ્યાનમાં રાખીને પર્યાવરણપ્રેમી સંસ્થાઓ, વિદ્યાર્થીઓ અને રાજકીય કાર્યકરોએ ઇન્ડિયા ગેટ સુધી શાંતિપૂર્ણ કૂચ યોજવાનો પ્રયાસ કર્યો.

જોકે પોલીસે સુપ્રીમ કોર્ટના આદેશનો હવાલો આપતાં જણાવ્યું કે ઇન્ડિયા ગેટ જાહેર પ્રદર્શન માટે માન્ય સ્થળ નથી અને જંતર મંતર એ માટે નિર્ધારિત સ્થળ છે. છતાં, પ્રદર્શનકારીઓએ વિરોધ ચાલુ રાખ્યો, જેના પગલે પોલીસે ઘણા લોકોને અટકાયત કરી.

"શાંતિપૂર્ણ વિરોધને રોકવાનો પ્રયાસ"

વિરોધમાં સામેલ લોકોએ આરોપ લગાવ્યો કે તેમને શાંતિપૂર્ણ રીતે પોતાની વાત રાખવાની પરવાનગી આપવામાં આવી ન હતી અને પોલીસે બળજબરીથી તેમને દૂર કર્યા. વકીલ પ્રશાંત ભૂષણે પણ આ ઘટનાને લઈને સરકારની કાર્યવાહી પર નારાજગી વ્યક્ત કરી હતી. તેમણે જણાવ્યું કે શાંતિપૂર્ણ વિરોધ પ્રદર્શન દરેક નાગરિકનો બંધારણીય અધિકાર છે અને તેને દમન દ્વારા રોકવું લોકશાહી માટે ખતરનાક સંકેત છે.

પરિસ્થિતિને જોતા પર્યાવરણ અને નાગરિક અધિકારના મુદ્દે રાજકીય ગરમાવો વધ્યો છે. વિપક્ષી પક્ષો સરકારે તાત્કાલિક પગલાં લેવાની માગ સાથે કહ્યું છે કે સ્વચ્છ હવા માત્ર રાજકીય ચર્ચાનો વિષય નહીં પરંતુ દરેક નાગરિકનો મૂળભૂત અધિકાર છે.