ભારતીય જનતા પાર્ટીના વરિષ્ઠ નેતા લાલકૃષ્ણ અડવાણી આજે 98 વર્ષના થયા છે. દેશભરના રાજકીય નેતાઓએ તેમને જન્મદિવસની શુભેચ્છાઓ પાઠવી છે. વડા પ્રધાન નરેન્દ્ર મોદીએ પણ સોશિયલ મીડિયા પ્લેટફોર્મ X દ્વારા અડવાણીને જન્મદિવસની શુભેચ્છા પાઠવી અને તેમની લાંબી રાજકીય સફર તથા દેશ માટેના યોગદાનની પ્રશંસા કરી છે.
પીએમ મોદીનો પ્રશંસાપૂર્ણ સંદેશ
પીએમ મોદીએ X પર લખ્યું કે, “લાલકૃષ્ણ અડવાણીજીને તેમના જન્મદિવસ પર હાર્દિક શુભેચ્છાઓ. અડવાણીજી એક એવી દ્રષ્ટિ ધરાવતા રાજકારણી છે જેમણે ભારતની પ્રગતિ અને લોકશાહી મજબૂત બનાવવામાં મહત્વપૂર્ણ યોગદાન આપ્યું છે. તેમણે હંમેશા નિઃસ્વાર્થભાવથી ફરજનું પાલન કર્યું છે અને સિદ્ધાંતોને જીવનનો આધાર બનાવ્યો છે. તેમના કાર્ય અને વિચારોથી દેશના રાજકીય અને સાંસ્કૃતિક ક્ષેત્ર પર અમીટ અસર પડી છે.” વડા પ્રધાનએ શુભેચ્છા વ્યક્ત કરતાં ઉમેર્યું કે ભગવાન અડવાણીજીને સારા સ્વાસ્થ્ય અને લાંબુ આયુષ્ય આપે.
લાલ કૃષ્ણ અડવાણીનું રાજકીય યોગદાન
લાલકૃષ્ણ અડવાણી ભારતીય જનતા પાર્ટીના સ્થાપક સભ્યોમાંના એક છે. 1980માં જનતા પાર્ટી વિસર્જન બાદ અટલ બિહારી વાજપેયી સાથે મળીને તેમણે ભાજપની સ્થાપના કરી હતી. બંનેએ મળીને પક્ષની વિચારધારાને ઘડવામાં અને રાષ્ટ્રીય સ્તરે ભાજપને મજબૂત રાજકીય શક્તિ તરીકે ઉભી કરવામાં મહત્વપૂર્ણ ભૂમિકા ભજવી.
વાજપેયી સરકારમાં મહત્વપૂર્ણ પદ સંભાળ્યું
અડવાણીએ વર્ષ 2002થી 2004 દરમિયાન અટલ બિહારી વાજપેયીની સરકારમાં નાયબ વડાપ્રધાન તરીકે સેવા આપી હતી. તે સમયગાળા દરમિયાન તેમણે આંતરિક સુરક્ષા અને શાસન સુધારાઓ માટે અનેક નિર્ણાયક પગલાં લીધા હતા. તેમની નેતૃત્વ ક્ષમતાએ ભાજપને સંગઠિત રાજકીય માળખું આપ્યું.
રથયાત્રાથી ઉભી થઈ રાષ્ટ્રીય ઓળખ
અડવાણીની રાજકીય સફરમાં 1990ની રથયાત્રા એક ઐતિહાસિક ઘટના ગણાય છે. રામ જન્મભૂમિ ચળવળને મજબૂતી આપવા માટે તેમણે અયોધ્યાની યાત્રા શરૂ કરી હતી. આ અભિયાનથી હિંદુ રાષ્ટ્રવાદી વિચારધારાને નવો વેગ મળ્યો અને અડવાણી રાષ્ટ્રીય સ્તરે લોકપ્રિય રાજકીય ચહેરા તરીકે ઉભર્યા.
ભારત રત્નથી સન્માનિત નેતા
આ વર્ષે લાલકૃષ્ણ અડવાણીને ભારતના સર્વોચ્ચ નાગરિક સન્માન ‘ભારત રત્ન’થી નવાજવામાં આવ્યા છે. રાજકારણમાં અડવાણીની અડગ પ્રતિબદ્ધતા, સ્વચ્છ છબી અને રાષ્ટ્રીય એકતાના પ્રયાસોને કારણે તેઓ આજેય રાજકીય ક્ષેત્રમાં પ્રેરણાસ્ત્રોત ગણાય છે.
