સરકારી ટેલિકોમ કંપની ભારત સંચાર નિગમ લિમિટેડ (BSNL)એ તેના ગ્રાહકો માટે એક મોટું પગલું ભર્યું છે. કંપનીએ એવી નવી ટેકનોલોજી શરૂ કરી છે, જે મોબાઇલ નેટવર્ક વગર પણ વોઇસ કોલ કરવાની મંજૂરી આપે છે.
BSNએ તેની નવી VoWiFi (વોઇસ ઓવર વાઇ-ફાઇ) સર્વિસ લોન્ચ કરી છે, જેના માધ્યમથી યુઝર્સ પોતાના ઘરના અથવા ઓફિસના Wi-Fi નેટવર્ક મારફતે કૉલ કરી શકશે. આ ટેકનોલોજી દ્વારા વોઇસ કૉલ માટે મોબાઇલ સિગ્નલની જરૂર નહીં પડે. ફક્ત Wi-Fi કનેક્શન પૂરતું રહેશે.
આ સાથે BSNL હવે Jio, Airtel અને Vodafone-Idea (Vi) જેવી ખાનગી કંપનીઓની સમકક્ષ આવી ગયું છે, જે પહેલાથી જ આવી સર્વિસ આપે છે.
દેશવ્યાપી નેટવર્ક વિસ્તરણ સાથે BSNLનો નવો માઈલસ્ટોન
BSNLએ તાજેતરમાં સમગ્ર દેશમાં 1 લાખથી વધુ મોબાઇલ ટાવર સ્થાપિત કર્યા છે, જેના માધ્યમથી તેની 4G સર્વિસનો વિસ્તાર થયો છે. કંપની આગામી મહિનાઓમાં અંદાજે 97,500 નવા ટાવર સ્થાપિત કરવાની તૈયારીમાં છે.
VoWiFi સેવાનું સોફ્ટ લોન્ચ 2 ઓક્ટોબરના રોજ ટેલિકોમ્યુનિકેશન વિભાગ (DoT)ના સચિવ નીરજ મિત્તલ દ્વારા કરવામાં આવ્યું હતું. હાલ આ સેવા દક્ષિણ અને પશ્ચિમ વર્તુળોમાં શરૂ કરવામાં આવી છે, પરંતુ BSNLએ સ્પષ્ટ કર્યું છે કે ટૂંક સમયમાં આ સેવા સંપૂર્ણ ભારતમાં ઉપલબ્ધ કરાશે.
BSNLએ થોડા અઠવાડિયા પહેલા મુંબઈમાં 4G અને eSIM સેવા પણ શરૂ કરી હતી, જે પહેલાં તમિલનાડુમાં ઉપલબ્ધ કરાવવામાં આવી હતી.
VoWiFi સેવા કેવી રીતે કામ કરશે?
આ સેવા ખાસ કરીને તે વિસ્તારોમાં લાભદાયી સાબિત થશે, જ્યાં મોબાઇલ નેટવર્ક નબળું હોય છે. યુઝર્સ ઘર અથવા ઓફિસના Wi-Fi કનેક્શનનો ઉપયોગ કરીને ક્લિયર અને સ્ટેબલ વોઇસ કૉલ કરી શકશે.
તે માટે જરૂરી છે કે ગ્રાહકનો સ્માર્ટફોન VoWiFi સપોર્ટેડ હોવો જોઈએ. આજના મોટાભાગના નવા Android અને iPhone મોડેલોમાં આ વિકલ્પ પહેલેથી જ બિલ્ટ-ઇન સેટિંગ તરીકે ઉપલબ્ધ છે.
ગ્રાહકો માટે સંપૂર્ણપણે મફત સર્વિસ
BSNLએ સ્પષ્ટ કર્યું છે કે VoWiFi સેવા સંપૂર્ણપણે ફ્રી રહેશે. કોઈ વધારાના ચાર્જ વગર યુઝર્સ Wi-Fi મારફતે કોલ કરી શકશે.
કંપનીએ તેના સત્તાવાર X હેન્ડલ પર જણાવ્યું કે,
“VoWiFi સેવા ગ્રાહકોને કોઈપણ વધારાના ખર્ચ વગર વધુ સારી કનેક્ટિવિટી અને સીમલેસ કોલિંગ અનુભવ આપશે.”
પ્રાઈવેટ ટેલિકોમ કંપનીઓ સામે સ્પર્ધા
BSNLનું આ પગલું ભારતીય ટેલિકોમ બજારમાં તેની સ્થિતિ મજબૂત બનાવવા માટે મહત્વપૂર્ણ માનવામાં આવે છે. અત્યાર સુધી Jio, Airtel અને Vi Wi-Fi કોલિંગ જેવી અદ્યતન સેવાઓ આપે છે, પરંતુ હવે સરકારી કંપની BSNL પણ આ રેસમાં જોડાઈ ગઈ છે.
