રસોઈમાં ઘણી વાનગીઓ બનાવતા પહેલા કેટલીક સામગ્રીને બાફવી જરૂરી હોય છે. પરંતુ મોટા ભાગના લોકો આ કામ ઉતાવળમાં કે ખોટી રીતે કરી દે છે, જેનાથી વાનગીનો સ્વાદ અને ટેક્સચર બગડી જાય છે. માસ્ટર શેફ પંકજ ભદૌરિયા કહે છે કે બાફવાનું તાપમાન અને રીત ખૂબ મહત્વની છે. ચાલો જાણીએ બટાકા, ઈંડા, પાસ્તા/નૂડલ્સ અને ફ્લાવર/બ્રોકોલીને બાફવાની સાચી અને સરળ રીતો.
બટાકા બાફવાની સાચી રીત
ભરતું, દમ આલૂ કે અન્ય વાનગીઓ માટે બટાકા બાફવા જરૂરી છે. મોટા ભાગના લોકો ઉકળતા પાણીમાં બટાકા નાખી દે છે, જેનાથી બહારથી વધુ પડતા બફાઈ જાય છે અને અંદર કાચા રહી જાય છે. સાચી રીત: બટાકાને હંમેશા ઠંડા પાણીમાં મૂકીને ચૂલો ચાલુ કરો. ધીમે ધીમે પાણી ગરમ થતાં બટાકા અંદર-બહારથી એકસરખા બફાઈ જશે અને ચીકણા પણ નહીં બને.
ઈંડા બાફવાની પરફેક્ટ રીત
ઈંડા બાફતી વખતે ફાટી જવા કે પીળો ભાગ લીલો રહી જવો એ સામાન્ય સમસ્યા છે. જેથી ઈંડાને ક્યારેય ઉકળતા પાણીમાં ન નાખો. પહેલા ઠંડા પાણીમાં ઈંડા મૂકો અને પછી વાસણ ગેસ પર મૂકો. પાણી ધીમે ધીમે ગરમ થવાથી કાચલી ફાટશે નહીં અને અંદરનો ભાગ સંપૂર્ણ રીતે પાકી જશે. આ રીતથી ઈંડા સરસ અને સ્મૂથ બને છે.
પાસ્તા, મેક્રોની અને નૂડલ્સ બાફવાની રીત
વીકેન્ડમાં પાસ્તા કે નૂડલ્સ બનાવવાનું મન થાય તો ઘણા લોકો ઠંડા પાણીમાં જ નાખી દે છે, જેનાથી તે ચીકણા અને કઠણ બની જાય છે. સાચી રીત: પહેલા વાસણમાં પાણી સારી રીતે ઉકાળો. જ્યારે પાણીમાં બબલ્સ આવવા લાગે ત્યારે જ પાસ્તા કે નૂડલ્સ નાખો. આનાથી તે સરસ અલ દેન્તે (થોડા કઠણ) બફાઈ જશે અને ચીકણા પણ નહીં બને.
ફ્લાવર અને બ્રોકોલી બાફવાની રીત
શિયાળામાં ફ્લાવર અને બ્રોકોલીનો વપરાશ વધે છે, પરંતુ તેમાં જંતુઓ હોવાની શક્યતા વધુ હોય છે. ઘણા લોકો તેને લાંબા સમય સુધી ઉકાળે છે, જેનાથી પોષક તત્વો નાશ પામે છે. સાચી રીત: હંમેશા ગરમ કે ઉકળતા પાણીમાં જ નાખો. થોડી જ વાર (બ્લેન્ચિંગ) માટે ઉકાળો – આનાથી જંતુઓ મરી જશે, રંગ તેજ રહેશે અને વિટામિન્સ પણ સાચવાઈ જશે.
આમ,આ સરળ ટિપ્સ અપનાવીને તમે વાનગીઓને વધુ સ્વાદિષ્ટ અને આરોગ્યપ્રદ બનાવી શકો છો. આગલી વાર રસોઈ બનાવતા આ રીતો અજમાવી જુઓ, ફરક દેખાશે!
