જે લોકો પોતાના બ્રાન્ડ નામ કે લેબલમાં ORS શબ્દનો ઉપયોગ કરીને લોકોને ગેરમાર્ગે દોરે છે તેમને હવે મુશ્કેલીનો સામનો કરવો પડશે. આ સંદર્ભમાં, Food Safety and Standards Authority of India (FSSAI) એ તમામ રાજ્યો અને કેન્દ્રશાસિત પ્રદેશોના ફૂડ સેફ્ટી કમિશનરોને એક આદેશ જારી કર્યો છે, જેમાં સ્પષ્ટપણે જણાવાયું છે કે ગેરમાર્ગે દોરતા ઇલેક્ટ્રોલાઇટ પીણાં અને ORS ઉત્પાદનો તરત જ બજારમાંથી દૂર કરવા જોઈએ.
FSSAIનું કારણ સ્પષ્ટ છે — ORS શબ્દનો ઉપયોગ લોકોમાં ખોટી સમજણ પેદા કરે છે.
ORS શબ્દના ઉપયોગ પર પહેલાથી પ્રતિબંધ હતો
હકીકતમાં, FSSAIએ 14 અને 15 ઑક્ટોબર, 2025ના રોજ સ્પષ્ટ કહ્યું હતું કે કોઈપણ ખાદ્ય ઉત્પાદનના નામ પર ORS શબ્દનો ઉપયોગ સંપૂર્ણપણે પ્રતિબંધિત છે, પછી તે ફળ આધારિત પીણાં હોય કે non-carbonated / ready-to-drink ઉત્પાદનો.
છતાં અનેક કંપનીઓ અને પ્લેટફોર્મ્સ આ નિયમનું ઉલ્લંઘન કરતા રહ્યા છે.
રાજ્ય અધિકારીઓને કડક સૂચનાઓ
FSSAIને જાણવા મળ્યું છે કે આવા પીણાં હજુ પણ ઘણા e-commerce પ્લેટફોર્મ, ફાર્મસી, સુપરમાર્કેટ, અને સ્થાનિક દુકાનોમાં ORS નામ હેઠળ વેચાઈ રહ્યા છે.
આને અટકાવવા માટે રાજ્ય અધિકારીઓને નીચેના કડક આદેશો આપ્યા છે:
ક્ષેત્ર અને નિયુક્ત અધિકારીઓએ બજારો અને e-commerce પ્લેટફોર્મ્સ પર તાત્કાલિક નિરીક્ષણ કરવું.
ORS નામનો ગેરઉપયોગ કરતા ઉત્પાદનો તુરંત વેચાણમાંથી દૂર કરવા.
સંકળાયેલી કંપનીઓ સામે FSS Act, 2006 અંતર્ગત કાર્યવાહી કરવી.
ઝડપથી FSSAIને રિપોર્ટ મોકલવો — જેમાં ક્યાં નિરીક્ષણ થયું, શું મળ્યું, અને શું પગલાં લીધા, તેની સંપૂર્ણ વિગતો હોવી જરૂરી છે.
અસલી ORS પર કાર્યવાહી નહીં: FSSAIની સ્પષ્ટતા
ઘણા વિસ્તારોમાંથી ફરિયાદો આવી હતી કે કેટલાક અધિકારીઓ અસલી ORS (WHO ફોર્મ્યુલેશન મુજબનું ORS) સામે પણ કાર્યવાહી કરી રહ્યા છે.
FSSAIએ આ પર ગંભીર નોંધ લઈને સ્પષ્ટ કર્યું:
અસલી ORS FSSAIના કાર્યક્ષેત્રમાં નથી.
WHO દ્વારા બનાવેલા ORS દવા ઉત્પાદનો Drugs and Cosmetics Act, 1940 હેઠળ આવે છે.
ઑક્ટોબર 2025નો આદેશ અસલી ORS પર લાગુ પડતો નથી.
તેથી અસલી ORSના વેચાણ, વિતરણ, નમૂના લેતા, અટકાવતા – કંઈ પણ કાર્યવાહી ન કરવી.
