એલિસ પેરીએ તોડ્યો મિતાલી રાજનો વર્લ્ડ રેકોર્ડ! : ઓસ્ટ્રેલિયાની ધમાકેદાર જીત, ભારત સાથે સેમિફાઇનલમાં ટક્કર

ઓસ્ટ્રેલિયાએ મહિલા વર્લ્ડ કપ 2025માં દબદબો જાળવ્યો

મહિલા વર્લ્ડ કપ 2025માં ઓસ્ટ્રેલિયન મહિલા ક્રિકેટ ટીમે દક્ષિણ આફ્રિકાને 7 વિકેટથી કચડી નાખ્યું. દક્ષિણ આફ્રિકાની ટીમ ઓસ્ટ્રેલિયાના ઘાતક બોલિંગ આક્રમણ સામે ટકી શકી નહીં અને માત્ર 97 રનમાં ઓલઆઉટ થઈ ગઈ. ઓસ્ટ્રેલિયાએ આ લક્ષ્યને સરળતાથી હાંસલ કરી લીધું અને સેમિફાઇનલમાં ભારત સામેની ટક્કર માટે પોતાનું સ્થાન પાકું કર્યું.

એલિસ પેરીએ રચ્યો ઇતિહાસ

આ મેચમાં ઓસ્ટ્રેલિયાની સ્ટાર ખેલાડી એલિસ પેરીએ ભારતની મહાન ખેલાડી મિતાલી રાજનો વર્લ્ડ રેકોર્ડ તોડી દીધો. પેરી હવે મહિલા ODI ક્રિકેટમાં સૌથી વધુ 130 મેચ જીતનાર ખેલાડી બની ગઈ છે, જેણે મિતાલીના 129 જીતના રેકોર્ડને પાછળ છોડ્યો. પેરીએ 164 ODI મેચમાં 4427 રન બનાવ્યા છે, જેમાં 3 સદી અને 36 અડધી સદી સામેલ છે. આ ઉપરાંત, તેણીએ 168 T20I મેચમાં 2173 રન પણ ફટકાર્યા છે.

એલાના કિંગનું શાનદાર પ્રદર્શન

ઓસ્ટ્રેલિયાની બોલર એલાના કિંગે દક્ષિણ આફ્રિકા સામે 7 વિકેટ ઝડપીને મેચનો રામરામ રમાડ્યો. તેની શાનદાર બોલિંગે દક્ષિણ આફ્રિકાને 97 રનમાં ધરાશાયી કરી દીધું. બેટિંગમાં બેથ મૂની (42 રન) અને જ્યોર્જિયા વોલ (38 રન) ની શાનદાર ઇનિંગ્સે ઓસ્ટ્રેલિયાને આસાનીથી જીત અપાવી.

ઓસ્ટ્રેલિયાનું અજેય પ્રદર્શન

2025 મહિલા વર્લ્ડ કપના લીગ તબક્કામાં ઓસ્ટ્રેલિયા એકમાત્ર અજેય ટીમ રહી. 7 મેચમાં 6 જીત અને 1 ટાઇ સાથે 13 પોઇન્ટ મેળવીને ટીમ પોઇન્ટ ટેબલમાં ટોચ પર છે. હવે સેમિફાઇનલમાં ઓસ્ટ્રેલિયાનો મુકાબલો ભારતીય મહિલા ટીમ સાથે થશે, જે રોમાંચક લડાઈની આગાહી કરે છે.