વડાપ્રધાન નરેન્દ્ર મોદી જાપાનના પ્રવાસે છે. ભારત અને જાપાને ચંદ્ર મિશનને આગળ વધારવા માટે સંયુક્ત રીતે એક કરાર પર હસ્તાક્ષર કર્યા છે. બંને દેશોએ ચંદ્રના દક્ષિણ ધ્રુવ પર 'ચંદ્રયાન-5' મોકલવા માટે એક કરાર પર હસ્તાક્ષર કર્યા છે. આ કરાર ISRO અને જાપાન એરોસ્પેસ એક્સપ્લોરેશન એજન્સી (JAXA) વચ્ચે થયો છે જેમાં JAXAના ઉપપ્રમુખ માત્સુરા માયુમી અને જાપાનમાં ભારતના રાજદૂત સિબી જ્યોર્જ હાજર હતા.
ચંદ્રયાન-5 મિશનમાં જાપાન પણ જોડાશે
ચંદ્રયાન-5 મિશનનો ઉદ્દેશ્ય ચંદ્રના દક્ષિણ ધ્રુવમાં કાયમી છાયાવાળા પ્રદેશ (PSR)ની આસપાસના વિસ્તારમાં ચંદ્રના પાણી સહિત અસ્થિર પદાર્થોનો અભ્યાસ કરવાનો છે. આ મિશન JAXA દ્વારા તેના H3-24L લોન્ચ વાહનથી લોન્ચ કરવામાં આવશે, જેમાં ISRO દ્વારા નિર્મિત ચંદ્ર લેન્ડર હશે, જે જાપાન દ્વારા નિર્મિત ચંદ્ર રોવર વહન કરશે. ઇસરો, ચંદ્ર લેન્ડરના વિકાસ ઉપરાંત, ચંદ્ર ધ્રુવીય ક્ષેત્રમાં હાજર અસ્થિર પદાર્થોના સંશોધન અને ઇન-સીટુ વિશ્લેષણ માટેના મિશન માટે કેટલાક વૈજ્ઞાનિક સાધનો વિકસાવશે.
જાપાનની મુલાકાત દરમિયાન 'ધ યોમિયુરી શિમ્બુન' ને આપેલા ઇન્ટરવ્યુમાં, PM મોદીએ કહ્યું, 'મને ખુશી છે કે ભારત અને જાપાન ચંદ્રયાન શ્રેણી અથવા LUPEX (ચંદ્ર ધ્રુવીય શોધ) મિશનના આગામી સંસ્કરણ માટે હાથ મિલાવી રહ્યા છે. આ ચંદ્રના દક્ષિણ ધ્રુવ પર કાયમી રીતે છાયાવાળા પ્રદેશો વિશેની આપણી સમજને વધુ ગાઢ બનાવશે.' પ્રધાનમંત્રીએ કહ્યું કે તેમને વિશ્વાસ છે કે ભારત અને જાપાનની વૈજ્ઞાનિક ટીમો અવકાશ વિજ્ઞાનની સીમાઓને આગળ વધારવા માટે સાથે મળીને કામ કરશે.
''અવકાશ અંતિમ સીમા નથી, તે આગામી સીમા છે."
PM મોદીએ કહ્યું, કે, 'અવકાશમાં આપણી ભાગીદારી ફક્ત આપણી ક્ષિતિજોને વિસ્તૃત કરશે નહીં, પરંતુ આપણી આસપાસના જીવનને પણ સુધારશે' તેમણે કહ્યું કે ભારતની અવકાશ યાત્રા દેશના વૈજ્ઞાનિકોના દૃઢ નિશ્ચય, સખત મહેનત અને નવીનતાની વાર્તા છે. પ્રધાનમંત્રી મોદીએ કહ્યું, "ચંદ્રના દક્ષિણ ધ્રુવ પર ચંદ્રયાન-3 ના ઐતિહાસિક ઉતરાણથી લઈને આંતરગ્રહીય મિશનમાં આપણી પ્રગતિ સુધી, ભારતે સતત દર્શાવ્યું છે કે અવકાશ અંતિમ સીમા નથી, તે આગામી સીમા છે." પ્રધાનમંત્રીએ કહ્યું કે, "અવકાશ વિજ્ઞાનનો પ્રભાવ કૃષિ, આપત્તિ વ્યવસ્થાપનથી લઈને સંદેશાવ્યવહાર અને તેનાથી આગળના આપણા રોજિંદા જીવનની પ્રગતિ સાથે જોડાયેલો છે"
