ચીન વિશ્વનો સૌથી મોટો સૌર ઊર્જા ખેલાડી બની ગયો છે અને વૈશ્વિક સ્તરે સૌર ઊર્જાનો ખર્ચ ઘટાડ્યો છે. હવે ભારત પણ આ ક્ષેત્રમાં ઝડપથી આગળ વધી રહ્યું છે. નમો ભારત કોરિડોરમાં NCRTC દ્વારા સૌર ઊર્જાનો ઉપયોગ એક નવો માઈલસ્ટોન સાબિત થશે.
110 મેગાવોટનો સૌર પ્લાન્ટ સ્થાપિત થશે
NCRTCએ જાહેરાત કરી છે કે નમો ભારત કોરિડોરની 60% વીજળીની જરૂરિયાત સૌર ઊર્જાથી પૂરી કરવામાં આવશે. આ માટે ઉત્તર પ્રદેશમાં 110 મેગાવોટનો ગ્રીડ કનેક્ટેડ સોલર પીવી પ્રોજેક્ટ સ્થાપિત કરાશે. આ પ્રોજેક્ટમાંથી ઉત્પન્ન થતી વીજળીનો ઉપયોગ દિલ્હી-ગાઝિયાબાદ-મેરઠ કોરિડોર પર ટ્રેનો ચલાવવા અને સ્ટેશનોની જરૂરિયાતોને પૂરી કરવા માટે થશે.
ઓપરેશનલ ખર્ચમાં ઘટાડો
નમો ભારત કોરિડોરના સંચાલનમાં કુલ ખર્ચનો 30-35 ટકા હિસ્સો વીજળી પર થાય છે. NCRTCની આ પહેલથી વીજળીના ખર્ચમાં મોટો ઘટાડો થશે. NCRTCનો દાવો છે કે જ્યારે સમગ્ર 82 કિમીનો કોરિડોર કાર્યરત થશે, ત્યારે 15 મેગાવોટ વીજળી સ્ટેશનો અને ડેપો પર સ્થાપિત રૂફટોપ સૌર પ્લાન્ટમાંથી આવશે, જ્યારે 110 મેગાવોટનો નવો પ્લાન્ટ કોરિડોરની કુલ જરૂરિયાતનો મોટો હિસ્સો પૂરું પાડશે.
પર્યાવરણીય ફાયદો
આ પ્રોજેક્ટના અમલીકરણથી દર વર્ષે આશરે 1.77 લાખ ટન CO2 ઉત્સર્જનમાં ઘટાડો થશે. આ ઉપરાંત, કોલસાથી બનતી વીજળીની સરખામણીએ સૌર ઊર્જા પર આધારિત સિસ્ટમમાંથી નાઇટ્રોજન ઓક્સાઈડ (NOx) અને સલ્ફર ડાયોક્સાઈડ (SO2) જેવા હાનિકારક પ્રદૂષકોનું ઉત્સર્જન નહીં થાય. NCRTCએ આ પ્રોજેક્ટને રાષ્ટ્રીય સૌર મિશન અને ભારત સરકારના ગ્રીન ઊર્જા લક્ષ્યો સાથે સુસંગત ગણાવ્યો છે.
ટેન્ડર પ્રક્રિયા શરૂ
આ પ્રોજેક્ટ માટે NCRTCએ લાયક અને અનુભવી સૌર ઊર્જા પ્લાન્ટ ડેવલપર માટે ઓનલાઈન ટેન્ડર જાહેર કર્યા છે. NCRTCનું માનવું છે કે આ પહેલ નવીનીકરણીય ઊર્જાને પ્રોત્સાહન આપશે, શહેરી પરિવહનને પર્યાવરણમૈત્રી બનાવશે અને ભારતને ઊર્જા આત્મનિર્ભરતા તરફ લઈ જશે.
