કેન્દ્રીય મંત્રી નીતિન ગડકરીએ મંગળવારે જાતિ, ભાષા અને અન્ય પરિબળોના નામે સમાજને વિભાજીત કરવાના પ્રયાસો અંગે ચિંતા વ્યક્ત કરી. અહીં એક પુસ્તક વિમોચન સમારોહને સંબોધતા ગડકરીએ કહ્યું કે દેશ ત્યારે જ પ્રગતિ કરશે અને મજબૂત બનશે જ્યારે તેના લોકો એક રહેશે.
''પછાતપણું એક રાજકીય હેતુ બની રહ્યું છે''
કેન્દ્રીય મંત્રીએ કહ્યું, "મને લાગે છે કે આજે... પછાતપણું એક રાજકીય હેતુ બની રહ્યું છે. દરેક વ્યક્તિ કહે છે, 'હું પછાત છું, હું પછાત છું.'... જાતિ, ભાષા અને બીજી બધી બાબતોના નામે સમાજને વિભાજીત કરવાનો પ્રયાસ થઈ રહ્યો છે." RSS ની 100 વર્ષની સફરની ચર્ચા કરતા, BJP નેતાએ કહ્યું કે વિરોધીઓએ ઘણી વાર સંઘને "જાતિવાદી અને સાંપ્રદાયિક" કહીને બદનામ કર્યો છે. તેમણે કહ્યું, "સંઘ કોઈની જાતિ પૂછતો નથી. સંઘમાં કોઈ ભેદભાવ કે અસ્પૃશ્યતા નથી." ગડકરીએ કહ્યું, "અમે દુનિયામાં દરેક વ્યક્તિનું કલ્યાણ અને પ્રગતિ ઈચ્છીએ છીએ, તે લોકોનું પણ જેઓ અમારો વિરોધ કરે છે."
ઓટોમોબાઈલ ક્ષેત્રને ટોચનું સ્થાન
સરકાર પાંચ વર્ષમાં ઓટોમોબાઈલ ક્ષેત્રને ટોચનું સ્થાન આપવાનું લક્ષ્ય રાખે છે. ગડકરીએ સોમવારે જણાવ્યું હતું કે સરકાર આગામી પાંચ વર્ષમાં ભારતના ઓટોમોબાઈલ ઉદ્યોગને વિશ્વમાં ટોચનું સ્થાન આપવા માટે કામ કરી રહી છે. 'ઈન્ટરનેશનલ વેલ્યુ સમિટ 2025'નું ઉદ્ઘાટન કરતાં તેમણે કહ્યું કે, ઓટોમોબાઈલ ક્ષેત્ર સરકારને સૌથી વધુ GST આવકનું યોગદાન આપે છે અને રોજગારની તકો ઉભી કરે છે.
ભારતમાં ઓટોમોબાઈલ ઉદ્યોગનું કદ રૂ. 22 લાખ કરોડ
માર્ગ પરિવહન અને રાજમાર્ગ મંત્રીએ કહ્યું, "અમારું લક્ષ્ય પાંચ વર્ષમાં ભારતના ઓટોમોબાઈલ ઉદ્યોગને વિશ્વમાં ટોચનું સ્થાન આપવાનું છે." ગડકરીએ ધ્યાન દોર્યું કે વિશ્વની તમામ મોટી ઓટોમોબાઈલ કંપનીઓ દેશમાં હાજર છે. તેમણે કહ્યું, "જ્યારે મેં પરિવહન મંત્રી તરીકે કાર્યભાર સંભાળ્યો ત્યારે ભારતીય ઓટોમોબાઈલ ઉદ્યોગનું કદ ₹14 લાખ કરોડ હતું. હવે ભારતીય ઓટોમોબાઈલ ઉદ્યોગનું કદ ₹22 લાખ કરોડ છે." હાલમાં અમેરિકન ઓટોમોબાઈલ ઉદ્યોગનું કદ ₹78 લાખ કરોડ છે. તે પછી ચીન (રૂ. 47 લાખ કરોડ) અને ભારત (રૂ. 22 લાખ કરોડ) આવે છે.
