કેનેડામાં ભારત વિરુદ્ધ ખાલિસ્તાની સમર્થકો દ્વારા ફરી એકવાર વિરોધ પ્રદર્શનો શરૂ થયા છે. અહેવાલ મુજબ SFJ એટલે કે શીખ્સ ફોર જસ્ટિસે વાનકુવરમાં ભારતીય વાણિજ્ય દૂતાવાસ પર કબજો કરવાની ધમકી આપી છે. એટલું જ નહીં ભારતીયોને તે વિસ્તારમાં ન જવાની ચેતવણી પણ આપવામાં આવી છે. જોકે, ભારત કે કેનેડિયન સરકાર દ્વારા આ અંગે સત્તાવાર રીતે કંઈ કહેવામાં આવ્યું નથી. મીડિયા રિપોર્ટ્સ અનુસાર, જૂથે ગુરુવારે વાણિજ્ય દૂતાવાસની મુલાકાત લેવાનું વિચારી રહેલા લોકોને અલગ તારીખ પસંદ કરવા કહ્યું છે. SFJ દ્વારા એક પોસ્ટર પણ બહાર પાડવામાં આવ્યું છે, જેમાં કેનેડામાં નવા ભારતીય હાઈ કમિશનર દિનેશ પટનાયકની તસવીર છે. તેમના ચહેરા પર નિશાન બનાવવાના ચિહ્નો છે. ભારતીય વાણિજ્ય દૂતાવાસ દ્વારા જાસૂસી નેટવર્ક ચલાવવામાં આવી રહ્યું હોવાના આરોપો લગાવવામાં આવી રહ્યા છે.
ગંભીર આરોપ
આ જૂથનો આરોપ છે કે, ખાલિસ્તાનીઓને દૂતાવાસ દ્વારા નિશાન બનાવવામાં આવી રહ્યા છે અને તેમની દેખરેખ રાખવામાં આવી રહી છે. નિવેદનમાં કહેવામાં આવ્યું છે કે, 'બે વર્ષ પહેલા 18 સપ્ટેમ્બર, 2023ના રોજ, વડાપ્રધાન જસ્ટિન ટ્રુડોએ સંસદમાં કહ્યું હતું કે, હરદીપ સિંહ નિજ્જરની હત્યામાં ભારતીય એજન્ટોની ભૂમિકાની તપાસ ચાલી રહી છે' તેમાં વધુમાં કહેવામાં આવ્યું છે કે, 'બે વર્ષ થઈ ગયા છે અને ભારતીય કોન્સ્યુલેટ ખાલિસ્તાની લોકમત પ્રચારકોને નિશાન બનાવીને જાસૂસી નેટવર્ક ચલાવી રહ્યું છે.'
કેનેડામાં ખાલિસ્તાનીઓને મદદ મળી રહી હોવાનો દાવો
ગયા અઠવાડિયે બહાર પાડવામાં આવેલા એક અહેવાલમાં દાવો કરવામાં આવ્યો હતો કે, ઓછામાં ઓછા બે ખાલિસ્તાની ઉગ્રવાદી જૂથોને કેનેડાની અંદરથી નાણાકીય સહાય મળી છે. '2025 એસેસમેન્ટ ઓફ મની લોન્ડરિંગ એન્ડ ટેરરિસ્ટ ફાઇનાન્સિંગ રિસ્ક ઇન કેનેડા' શીર્ષકવાળા અહેવાલમાં કેનેડાની અંદરથી નાણાકીય સહાય મેળવતા ખાલિસ્તાની ઉગ્રવાદી જૂથોને બબ્બર ખાલસા ઇન્ટરનેશનલ અને ઇન્ટરનેશનલ શીખ યુથ ફેડરેશન તરીકે ઓળખવામાં આવ્યા છે. ઓટ્ટાવાની ગુપ્તચર એજન્સીના અહેવાલમાં કહેવામાં આવ્યું છે કે કેનેડામાં રાજકીય રીતે પ્રેરિત હિંસક ઉગ્રવાદનો ખતરો 1980 ના દાયકાના મધ્યભાગથી ભારતના પંજાબમાં ખાલિસ્તાન નામનું સ્વતંત્ર રાષ્ટ્ર બનાવવા માટે હિંસક માધ્યમોનો ઉપયોગ કરવા માંગતા ખાલિસ્તાની ઉગ્રવાદીઓ દ્વારા ઉભરી આવ્યો હતો.
