PM મોદીએ ફરી એકવાર યુક્રેનમાં શાંતિ પુનઃસ્થાપિત કરવા માટે પ્રયાસો કર્યા છે. PM મોદીએ ઘણી વખત સ્પષ્ટ કર્યું છે કે શાંતિ જ એકમાત્ર રસ્તો છે. પીએમ મોદીએ 10 સપ્ટેમ્બરના રોજ ઇટાલીના વડા પ્રધાન જ્યોર્જિયા મેલોની સાથે ફોન પર વાત કરી હતી. બંને નેતાઓ યુક્રેન યુદ્ધનો ઉકેલ શોધવા માટે સંમત થયા છે. આ ઉપરાંત બંનેએ ભારત-ઇટાલી વ્યૂહાત્મક ભાગીદારીને વધુ મજબૂત બનાવવાની પ્રતિબદ્ધતા વ્યક્ત કરી છે. આ ઉપરાંત રોકાણ, સંરક્ષણ, સુરક્ષા, વિજ્ઞાન, શિક્ષણ, અવકાશ, આતંકવાદ વિરોધી જેવા ક્ષેત્રો પર વાતચીત થઈ હતી.
ભારત-EU મુક્ત વેપાર કરાર
PM મોદી અને મેલોની વચ્ચેની વાતચીતમાં વેપાર પર પણ ચર્ચા થઈ હતી. ઇટાલીના પીએમ મેલોનીએ 2026માં યોજાનારી ભારત-EU મુક્ત વેપાર કરાર અને AI અસર સમિટને ટેકો આપ્યો હતો. આ ઉપરાંત ભારત મધ્ય પૂર્વ-યુરોપ આર્થિક કોરિડોરને પ્રોત્સાહન આપવા માટે પગલાં લેવા પર સર્વસંમતિ બની છે.
યુક્રેન શાંતિ પર વાત
PM મોદી અને મેલોની વચ્ચેની વાતચીતમાં યુક્રેનમાં ચાલી રહેલા સંકટ પર પણ વિગતવાર ચર્ચા કરવામાં આવી હતી. વર્ષ 2025-29 માટે સંયુક્ત વ્યૂહાત્મક કાર્ય યોજના હેઠળ સંબંધોને વધુ ગાઢ બનાવવા પર સંમતિ સધાઈ છે. યુક્રેન સંઘર્ષના શાંતિપૂર્ણ ઉકેલની જરૂરિયાત પર ચર્ચા કરવામાં આવી હતી. ભારતે આમાં સંપૂર્ણ સમર્થનનો પુનરોચ્ચાર કર્યો.
PM મોદીએ X પર માહિતી આપી
ઇટાલીના વડા પ્રધાન મેલોની સાથે વાત કર્યા પછી, પીએમ મોદીએ X પ્લેટફોર્મ પર માહિતી શેર કરી. પીએમ મોદીએ લખ્યું કે વડા પ્રધાન જ્યોર્જિયા મેલોની સાથે ખૂબ જ સારી વાતચીત થઈ. અમે ભારત-ઇટાલી વ્યૂહાત્મક ભાગીદારીને વધુ મજબૂત બનાવવા માટે અમારી સંયુક્ત પ્રતિબદ્ધતાને પુનરોચ્ચારિત કરી અને યુક્રેનમાં સંઘર્ષને શક્ય તેટલી વહેલી તકે સમાપ્ત કરવામાં સહિયારી રુચિ દર્શાવી. તેમણે કહ્યું કે પરસ્પર ફાયદાકારક ભારત-EU વેપાર કરારને અંતિમ સ્વરૂપ આપવા અને IMEEEC પહેલ દ્વારા કનેક્ટિવિટીને પ્રોત્સાહન આપવા માટે ઇટાલીના સક્રિય સહયોગ બદલ વડા પ્રધાન મેલોનીનો આભાર માન્યો.
