મે મહિનાનો અંત નજીક આવી રહ્યો છે ત્યારે 1 જૂન 2026થી દેશભરમાં સામાન્ય લોકોના રોજિંદા જીવન અને ખિસ્સા પર સીધી અસર કરતા અનેક મહત્વપૂર્ણ નિયમોમાં ફેરફાર થવા જઈ રહ્યા છે. LPG ગેસ સિલિન્ડરની કિંમતો, બેંકિંગ નિયમો, એર ટ્રાવેલ ખર્ચ, સોલાર પેનલ ગાઈડલાઈન્સ, ટ્રાફિક નિયમો અને ઈન્શ્યોરન્સ પ્રીમિયમ સહિત અનેક ક્ષેત્રોમાં નવા નિયમો અમલમાં આવશે.
દર મહીનાની પહેલી તારીખે દેશભરમાં વિવિધ નાણાકીય અને વાણિજ્યિક નિયમોમાં ફેરફારો કરવામાં આવે છે, પરંતુ આ વખતે 1 જૂનથી લાગુ થનારા કેટલાક ફેરફારો સીધા સામાન્ય નાગરિકોના બજેટને અસર કરી શકે છે. ખાસ કરીને ઘરખર્ચ, મુસાફરી અને બેંકિંગ સેવાઓ મોંઘી કે સસ્તી થવાની સંભાવનાઓ વચ્ચે લોકોમાં ઉત્સુકતા વધી રહી છે.
LPG સિલિન્ડરના નવા ભાવ જાહેર થશે
દર મહીનાની જેમ 1 જૂને પણ ઓઈલ માર્કેટિંગ કંપનીઓ દ્વારા LPG સિલિન્ડરના નવા ભાવ જાહેર કરવામાં આવશે. હાલ પશ્ચિમ એશિયામાં ચાલી રહેલા તણાવ અને આંતરરાષ્ટ્રીય બજારમાં કાચા તેલના વધેલા ભાવોને કારણે ઘરેલુ અને કોમર્શિયલ ગેસ સિલિન્ડરના ભાવમાં વધારો થવાની શક્યતા વ્યક્ત કરવામાં આવી રહી છે.
હાલ દેશમાં કેટલાક શહેરોમાં કોમર્શિયલ ગેસ સિલિન્ડરના ભાવ ₹3000ની આસપાસ પહોંચી ગયા છે, જ્યારે ઘરેલુ LPG સિલિન્ડર પણ અનેક શહેરોમાં ₹1000ને પાર ગયો છે. જો નવા દરોમાં વધારો થાય તો તેનો સીધો પ્રભાવ સામાન્ય પરિવારના માસિક બજેટ અને હોટલ-રેસ્ટોરન્ટના ભોજન ખર્ચ પર પડશે.
આ પણ વાંચો: શું છે ઓપરેશન 'શેરુવાલી'? : જાણો રાજૌરીના ગાઢ જંગલોમાં સેના કઈ રીતે કરી રહી છે ઓપરેશન
હવાઈ મુસાફરી મોંઘી થઈ શકે
1 જૂનથી Aviation Turbine Fuel (ATF) એટલે કે હવાઈ ઈંધણના નવા દરો પણ જાહેર થશે. આંતરરાષ્ટ્રીય કાચા તેલના ભાવોમાં વધઘટનો સીધો પ્રભાવ ATF પર પડે છે. જો ATFના ભાવમાં વધારો થશે તો એરલાઈન્સ કંપનીઓ હવાઈ ટિકિટના દરમાં વધારો કરી શકે છે. વેકેશન સીઝન વચ્ચે મુસાફરી કરનારાઓ માટે આ વધારાનો ખર્ચ ચિંતાનો વિષય બની શકે છે. છેલ્લા કેટલાક સમયથી ક્રૂડ ઓઈલના આંતરરાષ્ટ્રીય બજારમાં ચાલી રહેલી અનિશ્ચિતતા હવાઈ મુસાફરીને વધુ મોંઘી બનાવી શકે છે.
HDFC બેંકના નિયમોમાં ફેરફાર
ખાનગી ક્ષેત્રની મોટી બેંક HDFC Bankએ 1 જૂનથી કેટલાક બેંકિંગ ચાર્જ, ક્રેડિટ કાર્ડ નિયમો અને રી-વેરિફિકેશન પ્રક્રિયામાં ફેરફાર કરવાની જાહેરાત કરી છે. બેંકના ગ્રાહકો માટે ટ્રાન્ઝેક્શન લિમિટ, મિનિમમ બેલેન્સ ચાર્જ, ક્રેડિટ કાર્ડ રિવોર્ડ પોઇન્ટ્સ અને સર્વિસ ફી સંબંધિત નવા નિયમો લાગુ થઈ શકે છે. તેથી ગ્રાહકોને સલાહ આપવામાં આવી રહી છે કે તેઓ બેંકના અપડેટ્સ સમયસર ચેક કરે, નહીં તો વધારાના ચાર્જ કપાઈ શકે છે.
આ પણ વાંચો: NEET વિવાદ પર સુપ્રીમ કોર્ટનું કડક વલણ : NTA ને વધુ મજબૂત બનાવવા કેન્દ્ર સરકાર પાસેથી માંગ્યો જવાબ
સોલાર પેનલ માટે નવી ગાઈડલાઈન્સ
કેન્દ્ર સરકાર દ્વારા રિન્યુએબલ એનર્જીને પ્રોત્સાહન આપવા સોલાર પેનલ રૂફટોપ યોજનાઓ માટે નવી ટેક્નિકલ અને સબસિડી ગાઈડલાઈન્સ અમલમાં મૂકવાની તૈયારી કરવામાં આવી રહી છે. 1 જૂનથી ઘર કે કોમર્શિયલ બિલ્ડિંગ પર સોલાર પેનલ લગાવનારા લોકોને નવા નિયમો હેઠળ અરજી કરવી પડશે. નવી ગાઈડલાઈન્સના કારણે સોલાર પેનલની કુલ કિંમત અને સબસિડીની પ્રક્રિયા પર અસર પડી શકે છે. સરકારનો ઉદ્દેશ વધુ પારદર્શિતા અને ગુણવત્તા સુનિશ્ચિત કરવાનો હોવાનું માનવામાં આવે છે.
ટ્રાફિક નિયમો વધુ કડક બનશે
1 જૂનથી માર્ગ પરિવહન અને રાજમાર્ગ મંત્રાલય દ્વારા કેટલાક નવા ટ્રાફિક નિયમો પણ અમલમાં આવી શકે છે. ખાસ કરીને ડ્રાઈવિંગ લાઈસન્સ પ્રક્રિયા અને ડ્રાઈવિંગ ટેસ્ટને વધુ કડક બનાવવામાં આવશે. અપરિપક્વ વયના બાળકો દ્વારા વાહન ચલાવવા, બિનલાયસન્સ વાહન ચલાવવું અને ટ્રાફિક નિયમોના ભંગ બદલ વધુ દંડ વસૂલવાની જોગવાઈઓ લાગુ થઈ શકે છે. સાથે સાથે પ્રાઈવેટ ડ્રાઈવિંગ ટ્રેનિંગ સેન્ટરો માટે પણ નવા નિયમો અને ધોરણો લાગુ થવાની શક્યતા છે.
વાહનનો ઈન્શ્યોરન્સ થશે મોંઘો
જૂન મહિનાથી થર્ડ પાર્ટી મોટર ઈન્શ્યોરન્સના પ્રીમિયમ દરોમાં પણ વધારો થઈ શકે છે. કાર અને બાઈકના માલિકોને વધુ પ્રીમિયમ ચૂકવવું પડી શકે તેવી શક્યતાઓ વ્યક્ત થઈ રહી છે. વીમા ક્ષેત્રના નિષ્ણાતોના મતે કેટલાક કેટેગરીના વાહનો માટે પ્રીમિયમમાં વધારો અનિવાર્ય બની શકે છે.
ડિલિવરી અને લોજિસ્ટિક્સ ચાર્જમાં વધારો
પેટ્રોલ અને ડીઝલના સતત ઊંચા ભાવોના કારણે ટ્રાન્સપોર્ટેશન ખર્ચમાં વધારો નોંધાયો છે. જેના કારણે અનેક કુરિયર કંપનીઓ, ઈ-કોમર્સ પ્લેટફોર્મ અને એપ આધારિત ડિલિવરી સેવાઓ જૂનથી તેમના ચાર્જમાં વધારો કરી શકે છે. તેના કારણે ઓનલાઈન શોપિંગ અને હોમ ડિલિવરી સેવાઓ વધુ મોંઘી બની શકે છે.
મ્યુચ્યુઅલ ફંડ અને NPSમાં નોમિની અપડેટ જરૂરી
જો રોકાણકારોએ હજુ સુધી તેમના મ્યુચ્યુઅલ ફંડ ફોલિયો અથવા નેશનલ પેન્શન સિસ્ટમ (NPS) ખાતામાં નોમિનીની માહિતી અપડેટ નથી કરી, તો જૂનથી આવા ખાતાઓમાં ટ્રાન્ઝેક્શન સંબંધિત મુશ્કેલીઓ ઊભી થઈ શકે છે. Securities and Exchange Board of India (SEBI) અને સરકાર દ્વારા સતત રી-વેરિફિકેશન પર ભાર મૂકવામાં આવી રહ્યો છે.
Google અને ટેક કંપનીઓના નવા અપડેટ્સ
કેટલીક ટેક અને ક્લાઉડ સ્ટોરેજ કંપનીઓ પણ જૂનથી તેમની ફ્રી સ્ટોરેજ પોલિસી અને સબ્સ્ક્રિપ્શન પ્લાનમાં ફેરફાર કરી શકે છે. પરિણામે વધુ ડેટા સ્ટોર કરવા માટે વપરાશકર્તાઓને ચૂકવણી આધારિત પ્લાન લેવાની જરૂર પડી શકે છે.
