અમદાવાદના જુહાપુરા વિસ્તારમાં ગૌમાંસના કથિત કેસમાં ઝડપાયેલા જહીર ઉર્ફે જહીર ડબ્બાનાં મોત મામલે હવે રાજકીય અને સામાજિક સ્તરે ભારે ચર્ચા શરૂ થઈ છે. સમગ્ર ઘટનાએ પોલીસ કસ્ટડીમાં થતી કાર્યવાહી, માનવ અધિકાર અને કાયદાકીય પ્રક્રિયાઓ અંગે ગંભીર પ્રશ્નો ઉભા કર્યા છે. આ મામલે હવે નવો વળાંક ત્યારે આવ્યો છે જ્યારે જિગ્નેશ મેવાણી અને ઇમરાન ખેડાવાલા પીડિત પરિવાર સાથે રાજ્યના ઉચ્ચ પોલીસ અધિકારીઓને મળ્યા અને સમગ્ર ઘટનાની નિષ્પક્ષ તથા તથ્ય આધારિત તપાસ કરવાની માંગ કરી.
મળતી માહિતી મુજબ, જહીર ડબ્બાને વેજલપુર પોલીસ સ્ટેશન દ્વારા કથિત ગૌમાંસ મામલે અટકાયત કરવામાં આવ્યો હતો. અટકાયત બાદ તેની તબિયત અચાનક બગડતા તેને સારવાર માટે હોસ્પિટલમાં ખસેડવામાં આવ્યો હતો, જ્યાં તેનું મોત થયું હોવાનું સામે આવ્યું. જોકે, પરિવારજનોએ ગંભીર આક્ષેપો કરતાં જણાવ્યું છે કે પોલીસ કસ્ટડી દરમિયાન મારઝૂડ અને માનસિક દબાણના કારણે જહીરનું મોત થયું છે.
પરિવારના આક્ષેપો
જહીરના મોત બાદ પરિવારજનોમાં ભારે આક્રોશ જોવા મળી રહ્યો છે. પરિવારના સભ્યોનો આરોપ છે કે જો સમયસર યોગ્ય સારવાર આપવામાં આવી હોત અને પોલીસ દ્વારા માનવતાપૂર્ણ વર્તન રાખવામાં આવ્યું હોત તો કદાચ આ સ્થિતિ સર્જાતી નહીં. પરિવારજનોએ જવાબદાર અધિકારીઓ સામે કડક કાર્યવાહી કરવાની માંગ સાથે ન્યાય માટે લડત ચાલુ રાખવાની ચેતવણી પણ આપી છે.
આ સમગ્ર ઘટનાને લઈને જુહાપુરા અને આસપાસના વિસ્તારોમાં પણ લોકોમાં ભારે રોષ જોવા મળી રહ્યો છે. અનેક સામાજિક સંગઠનો અને સ્થાનિક આગેવાનો દ્વારા પણ ઘટનાની સ્વતંત્ર તપાસની માંગ ઉઠાવવામાં આવી રહી છે. વિસ્તારમાં તણાવપૂર્ણ સ્થિતિને ધ્યાનમાં રાખીને પોલીસ તંત્ર પણ સાવચેત બન્યું હોવાનું જાણવા મળે છે.
ઉચ્ચ પોલીસ અધિકારીઓ સાથે બેઠક
ઘટનાને લઈને જિગ્નેશ મેવાણી, ઈમરાન ખેડાવાલા તથા પરિવારના સભ્યોએ રાજ્યના ઉચ્ચ પોલીસ અધિકારીઓ સાથે મુલાકાત કરી હતી. બેઠક દરમિયાન વેજલપુર પોલીસ સ્ટેશનના ત્રણ અધિકારીઓ સામે ગંભીર આક્ષેપો રજૂ કરવામાં આવ્યા હોવાનું જાણવા મળે છે.
મુલાકાત દરમિયાન સમગ્ર મામલે હાઈકોર્ટના નિવૃત્ત ન્યાયાધીશ અથવા સ્વતંત્ર એજન્સી દ્વારા તપાસ કરાવવાની માંગ પણ કરવામાં આવી હતી. પ્રતિનિધિમંડળે દલીલ કરી હતી કે જો તપાસ માત્ર વિભાગીય સ્તરે થશે તો લોકોમાં વિશ્વાસ ઉભો થવો મુશ્કેલ બની શકે છે. તેથી પારદર્શક અને નિષ્પક્ષ તપાસ જરૂરી છે.
જિગ્નેશ મેવાણીએ જણાવ્યું કે, “જો કોઈ વ્યક્તિ આરોપી હોય તો પણ કાયદો પોતાના હાથમાં લેવાનો અધિકાર કોઈને નથી. પોલીસ કસ્ટડીમાં કોઈનું મોત થાય એ અત્યંત ગંભીર બાબત છે. અમે સમગ્ર ઘટનાની પારદર્શક તપાસ અને જવાબદાર લોકો સામે કડક કાર્યવાહી માંગીએ છીએ.”
આ પણ વાંચો: પેટ્રોલ-ડીઝલ સંકટથી ખાનગી બસ સેવા થઈ પ્રભાવિત : અનેક રૂટ કરાયા બંધ, કેટલાક રૂટ કરાયા ટૂંકા
ઈમરાન ખેડાવાલાની ચેતવણી
ઈમરાન ખેડાવાલાએ પણ જણાવ્યું કે પરિવારને ન્યાય મળે તે માટે તેઓ કાનૂની અને સામાજિક રીતે લડત ચાલુ રાખશે. તેમણે સ્પષ્ટ કહ્યું કે જો જરૂરી બનશે તો રાજ્યવ્યાપી રજૂઆતો અને વિરોધ કાર્યક્રમો પણ કરવામાં આવશે.
તેમણે જણાવ્યું કે આ મુદ્દો માત્ર એક વ્યક્તિના મોતનો નથી, પરંતુ સમગ્ર કાનૂની વ્યવસ્થા અને માનવ અધિકાર સાથે જોડાયેલો પ્રશ્ન છે. પોલીસ કસ્ટડીમાં કોઈ પણ પ્રકારની હિંસા અથવા દબાણ સહન કરવામાં નહીં આવે અને જો આવા કેસોમાં જવાબદારી નક્કી નહીં થાય તો ભવિષ્યમાં આવી ઘટનાઓ અટકાવવી મુશ્કેલ બની શકે છે.
પોલીસ તપાસ પર સૌની નજર
હાલ રાજ્ય પોલીસ દ્વારા સમગ્ર મામલે તપાસ શરૂ કરવામાં આવી હોવાનું જાણવા મળી રહ્યું છે. અધિકૃત રીતે હજુ સુધી કોઈ અંતિમ નિવેદન જાહેર કરવામાં આવ્યું નથી, પરંતુ આંતરિક તપાસ તેમજ મેડિકલ અને ફોરેન્સિક રિપોર્ટના આધારે આગળની કાર્યવાહી થવાની શક્યતા વ્યક્ત કરવામાં આવી રહી છે.
બીજી તરફ, લોકોની નજર હવે એ વાત પર છે કે શું ખરેખર આ મામલે જવાબદાર અધિકારીઓ સામે કાર્યવાહી થશે કે નહીં. સોશિયલ મીડિયા પર પણ આ ઘટનાને લઈને ભારે ચર્ચા ચાલી રહી છે અને અનેક લોકો પોલીસ કસ્ટડીમાં થતા મોતના મુદ્દે ગંભીર ચિંતાઓ વ્યક્ત કરી રહ્યા છે.
આ ઘટનાએ ફરી એકવાર પોલીસ કસ્ટડીમાં થતી ઘટનાઓ અને માનવ અધિકારના મુદ્દાઓને ચર્ચાના કેન્દ્રમાં લાવી દીધા છે. આગામી દિવસોમાં તપાસ શું ખુલાસા કરે છે અને સરકાર અથવા પોલીસ તંત્ર શું પગલાં ભરે છે તે સમગ્ર રાજ્ય માટે મહત્વપૂર્ણ બનશે.
