ઈટલીમાં કેથોલિક ચર્ચના પાદરીઓ સામે ગંભીર આરોપો ઉઠ્યા છે. પીડિતોના હક્ક માટે કામ કરતી સંસ્થા રેટે લાબુસોએ દાવો કર્યો છે કે 2020થી અત્યાર સુધી લગભગ 4,400 લોકો કેથોલિક પાદરીઓ દ્વારા જાતીય શોષણના ભોગ બન્યા છે. આ આંકડા પીડિતોના નિવેદનો, કોર્ટના દસ્તાવેજો અને મીડિયા અહેવાલો પર આધારિત હોવાનું જૂથે જણાવ્યું છે.
રેટે લાબુસોએ આ દુર્વ્યવહારના કેસો કયા સમયગાળા દરમિયાન બન્યા હતા તે અંગે ચોક્કસ માહિતી આપી નથી, પરંતુ સંસ્થાએ દાવો કર્યો કે આંકડા ચર્ચની અંદર ચાલી રહેલા ગુનાહિત વર્તન અને ઢાંકપીછોડની વૃત્તિઓ પર પ્રકાશ પાડે છે.
ઇટાલિયન બિશપ્સ કોન્ફરન્સએ આ તારણો પર કોઈ પ્રતિસાદ આપ્યો નથી. રેટે લાબુસોના પ્રવક્તાના જણાવ્યા મુજબ, વૈશ્વિક કેથોલિક ચર્ચ વર્ષોથી પીડોફિલ પાદરીઓના ગુનાઓને ઢાંકવાનો પ્રયત્ન કરતી આવી છે, જ્યારે ઇટાલીના સ્થાનિક ચર્ચોએ આ મુદ્દાને ગંભીરતાથી લેવાની તાકીદ દર્શાવી નથી.
નવા પોપ લીઓની પહેલી કાર્યવાહી
તાજેતરમાં ચૂંટાયેલા પોપ લીઓએ પાદરીઓ દ્વારા જાતીય શોષણનો ભોગ બનેલાઓ સાથે તેમની પહેલી મુલાકાત કરી. તેમણે ચર્ચના નવા બિશપ્સને ચેતવણી આપી કે આવા આરોપોને છુપાવવાની કોઈ પણ કોશિશ અગ્રાહ્ય ગણાશે.
પોપ લીઓના પૂર્વવર્તી પોપ ફ્રાન્સિસ, જેમણે 12 વર્ષ સુધી પોપ તરીકે સેવા આપી, તેમણે પણ પાદરીઓ દ્વારા થયેલા જાતીય શોષણના કેસોને રોકવા માટે સુધારાત્મક પગલાં લીધા હતા. જોકે, અનેક અહેવાલો મુજબ, તેમના પ્રયત્નોને મિશ્ર પરિણામ મળ્યા હતા.
વિશ્લેષકોનું કહેવું છે કે આ તાજા આંકડા કેથોલિક ચર્ચ માટે નવો આઘાતરૂપ સાબિત થઈ શકે છે, કારણ કે યુરોપના અન્ય દેશોમાં પહેલેથી જ આવા કૌભાંડો સામે તપાસો ચાલી રહી છે. વેટિકન તરફથી આ આક્ષેપો પર અત્યાર સુધી કોઈ સત્તાવાર નિવેદન આપવામાં આવ્યું નથી.
