અમેરિકાની ગુપ્તચર એજન્સી CIA પર દક્ષિણ એશિયામાં અસ્થિરતા ફેલાવવાનો આરોપ ફરી ઉઠ્યો છે. તાજેતરમાં બાંગ્લાદેશની રાજધાની ઢાકામાં એક યુએસ સ્પેશિયલ ફોર્સિસ અધિકારી ટેરેન્સ આર્વેલ જેક્સનના રહસ્યમય મૃત્યુ બાદ અનેક અહેવાલો અને અનુમાનો ચર્ચામાં આવ્યા છે.
‘ઓર્ગેનાઇઝર’ના તાજેતરના અહેવાલ મુજબ, જેક્સનના મૃત્યુ સાથે ભારતના વડાપ્રધાન નરેન્દ્ર મોદીને નિશાન બનાવવાના સંભાવિત કાવતરાના દાવા જોડાઈ રહ્યા છે. અહેવાલમાં એવો દાવો કરવામાં આવ્યો છે કે ભારતીય અને રશિયન ગુપ્તચર એજન્સીઓની સંયુક્ત કાર્યવાહીથી આ કાવતરું નિષ્ફળ બનાવાયું હતું.
જોકે, આ દાવાઓની OFFBEAT STORIES પુષ્ટિ નથી કરતું, અને અત્યાર સુધી કોઈ સત્તાવાર નિવેદન બહાર આવ્યું નથી.
ઢાકામાં રહસ્યમય મૃત્યુ
31 ઓગસ્ટે ઢાકાની એક હોટલમાં યુએસ અધિકારી ટેરેન્સ આર્વેલ જેક્સન મૃત હાલતમાં મળ્યા હતા. અહેવાલો અનુસાર, તેઓ બાંગ્લાદેશી સૈન્યને તાલીમ આપવા માટે સેન્ટ માર્ટિન ટાપુ પર તૈનાત હતા.
તે જ દિવસે વડા પ્રધાન મોદી ચીનના તિયાનજિન શહેરમાં SCO સમિટમાં હાજર હતા, જ્યાં તેમની રશિયન રાષ્ટ્રપતિ વ્લાદિમીર પુતિન સાથે લાંબી ખાનગી મુલાકાત થઈ હતી. “ઓર્ગેનાઇઝર”ના જણાવ્યા પ્રમાણે, બંને નેતાઓ વચ્ચેની આ બેઠકમાં ગુપ્તચર એજન્સીઓની સંયુક્ત કાર્યવાહી પર ચર્ચા થઈ હોઈ શકે છે.
શું પીએમ મોદીના ભાષણમાં સંકેત મળ્યો?
તિયાનજિનથી પરત ફર્યા પછી, વડા પ્રધાન મોદીએ 2 સપ્ટેમ્બરે નવી દિલ્હીમાં સેમિકોન સમિટમાં કહ્યું હતું –
“શું તમે તાળીઓ પાડી રહ્યા છો કારણ કે હું ચીન ગયો હતો કે કારણ કે હું પાછો આવ્યો છું?”
અહેવાલમાં દાવો છે કે વડા પ્રધાન મોદીની આ ટિપ્પણી કોઈ ગંભીર સંદેશ આપતી હોઈ શકે છે, જોકે આ અંગે સત્તાવાર સ્તરે કોઈ પ્રતિભાવ આવ્યો નથી.
અમેરિકા-ભારત સંબંધો પર પ્રશ્ન
તાજા અહેવાલોમાં અમેરિકા તરફથી ભારત પર દબાણ વધારવાના સંકેતો પણ દર્શાવવામાં આવ્યા છે. ભૂતપૂર્વ રાષ્ટ્રપતિ ડોનાલ્ડ ટ્રમ્પ દ્વારા તાજેતરમાં ભારત પર 50% ટેરિફ લગાવ્યા બાદ રાજકીય તણાવ વધ્યો છે.
કેટલાક વિશ્લેષકોના મતે, દક્ષિણ એશિયામાં CIAની વધતી ગતિવિધિઓ અને પાડોશી દેશોમાં દેખાતા રાજકીય ઉથલપાથલ વચ્ચે, ભારત પણ સંભાવિત લક્ષ્ય બની શકે છે.
હાલમાં, આ દાવાઓની કોઈ સ્વતંત્ર પુષ્ટિ ઉપલબ્ધ નથી, પરંતુ જો આ અહેવાલોમાં દર્શાવેલ વાતોમાં તથ્ય હોય, તો તે ભારત-અમેરિકા સંબંધોને ગંભીર રીતે અસર કરી શકે છે.
