ગુજરાતમાં છેલ્લા કેટલાક દિવસોથી કાળઝાળ ગરમી અને ઉકળાટથી લોકો ત્રાહિમામ પોકારી રહ્યા છે, ત્યારે હવે હવામાન વિભાગે રાજ્ય માટે રાહતના સમાચાર આપ્યા છે. રાજ્યના વિવિધ વિસ્તારોમાં 30મે થી 2 જૂન દરમિયાન ગાજવીજ અને તેજ પવન સાથે વરસાદની આગાહી કરવામાં આવી છે. હવામાન વિભાગના અનુમાન મુજબ, આ સમયગાળા દરમિયાન 40થી 50 કિલોમીટર પ્રતિ કલાકની ઝડપે પવન ફૂંકાઈ શકે છે.
હવામાન નિષ્ણાતોના જણાવ્યા મુજબ, વેસ્ટર્ન ડિસ્ટર્બન્સની અસર અને અરેબિયન સમુદ્ર તરફથી અનુકૂળ બનેલી ચોમાસાની પરિસ્થિતિના કારણે રાજ્યમાં વાતાવરણમાં પલટો જોવા મળશે. આગામી બે દિવસ બાદ તાપમાનમાં અંદાજે 3થી 5 ડિગ્રી સુધીનો ઘટાડો થવાની પણ શક્યતા વ્યક્ત કરવામાં આવી છે.
ઉત્તર, મધ્ય અને દક્ષિણ ગુજરાતમાં વરસાદી માહોલ
હવામાન વિભાગે ઉત્તર ગુજરાત, મધ્ય ગુજરાત અને દક્ષિણ ગુજરાતના અનેક જિલ્લાઓમાં વરસાદની આગાહી જાહેર કરી છે. કેટલાક વિસ્તારોમાં ગાજવીજ સાથે છૂટોછવાયો વરસાદ તો કેટલાક વિસ્તારોમાં ભારે પવન સાથે ઝાપટાં પડવાની શક્યતા દર્શાવવામાં આવી છે. ખાસ કરીને બપોર બાદ અને સાંજના સમયે વાતાવરણમાં અચાનક પલટો આવી શકે છે. ગરમી અને ભેજના કારણે ઊભી થતી અસ્થિર પરિસ્થિતિને કારણે સ્થાનિક સ્તરે વાદળછાયું વાતાવરણ સર્જાશે.
આ પણ વાંચો: નર્મદાના વરખડ ગામે મુંબઈ પોલીસ અને નર્મદા પોલીસનું સંયુક્ત ઓપરેશન : સંદીગ્ધ કેમિકલ્સ જપ્ત
30 મેના રોજ આ જિલ્લાઓમાં વરસાદની શક્યતા
30 મેના રોજ Gujaratના કચ્છ, બનાસકાંઠા, પાટણ, સાબરકાંઠા, અરવલ્લી, મહીસાગર, પંચમહાલ, દાહોદ, છોટાઉદેપુર, નર્મદા અને તાપી જિલ્લામાં વરસાદની આગાહી કરવામાં આવી છે. આ વિસ્તારોમાં કેટલાક સ્થળોએ ગાજવીજ સાથે પવન ફૂંકાવાની શક્યતા પણ વ્યક્ત કરવામાં આવી છે. ખેડૂતો અને ખુલ્લા વિસ્તારમાં કામ કરતા લોકોને સાવચેત રહેવા સૂચના આપવામાં આવી છે.
31 મેના રોજ દક્ષિણ ગુજરાત સુધી અસર
31 મેના રોજ વરસાદી સિસ્ટમનો વ્યાપ વધુ વિસ્તરશે. આ દિવસે કચ્છ, બનાસકાંઠા, પાટણ, મહેસાણા, સાબરકાંઠા, અરવલ્લી, મહીસાગર, પંચમહાલ, દાહોદ, છોટાઉદેપુર, નર્મદા, તાપી અને ડાંગ જિલ્લામાં વરસાદની શક્યતા વ્યક્ત કરવામાં આવી છે. દક્ષિણ ગુજરાતના કેટલાક વિસ્તારોમાં ભારે પવન અને વીજળીના કડાકા સાથે વરસાદ પડી શકે છે. હવામાન વિભાગે વૃક્ષો નીચે આશરો ન લેવા અને વીજળી દરમિયાન ખુલ્લા મેદાનમાં ન રહેવા સલાહ આપી છે.
આ પણ વાંચો: ગીરના સિંહો પર રોગચાળાનું સંકટ : વનવિભાગનું હાઈએલર્ટ, 20થી વધુ સિંહ પર સતત નજર
1 જૂને અમદાવાદ સહિત અનેક જિલ્લામાં વરસાદ
1 જૂનના રોજ રાજ્યના મોટા ભાગના વિસ્તારોમાં વરસાદી માહોલ રહેવાની શક્યતા છે. ખાસ કરીને બનાસકાંઠા, પાટણ, મહેસાણા, સાબરકાંઠા, અરવલ્લી, ગાંધીનગર, Ahmedabad, ખેડા, આણંદ, પંચમહાલ, મહીસાગર, દાહોદ, વડોદરા, છોટાઉદેપુર, ભરૂચ, નર્મદા, સુરત, તાપી, નવસારી, ડાંગ, વલસાડ, દાદરા નગર હવેલી, અમરેલી, ભાવનગર, ગીર સોમનાથ અને દીવ જિલ્લામાં વરસાદની આગાહી કરવામાં આવી છે. અમદાવાદ સહિત મધ્ય ગુજરાતમાં ઉકળાટ બાદ અચાનક વાતાવરણમાં ફેરફાર થવાની શક્યતા છે. શહેરોમાં ધૂળની ડમરીઓ અને પવનની અસર પણ જોવા મળી શકે છે.
આ પણ વાંચો: કોંગોથી આવેલા શંકાસ્પદ દર્દીનો રિપોર્ટ નેગેટિવ : પ્રફુલ પાનસેરિયાએ નાગરિકોને અફવાથી દૂર રહેવા કરી અપીલ
2 જૂને સૌરાષ્ટ્ર અને ઉત્તર ગુજરાતમાં વરસાદ
2 જૂનના રોજ સૌરાષ્ટ્ર, ઉત્તર ગુજરાત અને દક્ષિણ ગુજરાતના વિસ્તારોમાં વરસાદી વાતાવરણ યથાવત રહેવાની શક્યતા છે. હવામાન વિભાગના અનુમાન મુજબ, આ સમય દરમિયાન કેટલાક વિસ્તારોમાં હળવાથી મધ્યમ વરસાદ નોંધાઈ શકે છે.
ચોમાસાની સ્થિતિ અનુકૂળ
અરેબિયન સમુદ્ર તરફથી ચોમાસાની ગતિ માટે અનુકૂળ પરિસ્થિતિ સર્જાઈ રહી છે. જેના કારણે આગામી દિવસોમાં દક્ષિણ પશ્ચિમ ચોમાસું વધુ સક્રિય બનવાની સંભાવના છે. જોકે સત્તાવાર રીતે ચોમાસાના આગમન અંગે હજુ સ્પષ્ટ જાહેરાત કરવામાં આવી નથી, પરંતુ હાલની હવામાન પરિસ્થિતિને કારણે લોકોને ગરમીથી મોટી રાહત મળવાની શક્યતા છે.
