Gujarat Monsoon 2026: ગુજરાતમાં સક્રિય બનેલા ચોમાસાને કારણે દરિયાઈ વિસ્તારોમાં હવામાન વધુ ઉગ્ર બનવાની શક્યતા વચ્ચે રાજ્યના તમામ બંદરો માટે લોકલ કોશનરી સિગ્નલ-III (LC-III) યથાવત રાખવામાં આવ્યું છે. આગામી પાંચ દિવસ સુધી દરિયામાં તેજ પવન, ઊંચા મોજાં અને તોફાની પરિસ્થિતિ રહેવાની આગાહી હોવાથી માછીમારોને દરિયો ન ખેડવાની કડક સલાહ આપવામાં આવી છે.
સક્રિય ચોમાસાને કારણે દરિયો ઉગ્ર બનશે
જાહેર કરાયેલા પોર્ટ વોર્નિંગ અનુસાર 4 જુલાઈથી 8 જુલાઈ 2026 સુધી સમગ્ર ગુજરાતના દરિયાકાંઠે સક્રિય ચોમાસાની અસર રહેશે. આ દરમિયાન દક્ષિણ-પશ્ચિમથી પશ્ચિમ દિશામાં 40થી 50 કિલોમીટર પ્રતિ કલાકની ઝડપે પવન ફૂંકાવાની અને તેના ઝોકા 60 કિલોમીટર પ્રતિ કલાક સુધી પહોંચવાની શક્યતા છે. પરિણામે દરિયો ખૂબ જ ઉછળતો અને જોખમી બની શકે છે. આ સ્થિતિને ધ્યાનમાં રાખીને રાજ્યના તમામ બંદરો પર LC-III ચેતવણી સંકેત યથાવત રાખવાનો નિર્ણય લેવામાં આવ્યો છે, જેથી બંદર પરની તમામ દરિયાઈ પ્રવૃત્તિઓમાં જરૂરી સાવચેતી રાખી શકાય.
ઉત્તર અને દક્ષિણ ગુજરાતના તમામ માછીમારો માટે ખાસ સૂચના
ચેતવણીમાં ઉત્તર ગુજરાત કિનારાના જખાઉ, માંડવી (કચ્છ), મુન્દ્રા, ન્યૂ કંડલા, નવલખી, સલાયા, ઓખા, બેડી, સિક્કા અને પોરબંદર સહિતના બંદરોનો સમાવેશ કરવામાં આવ્યો છે. તે જ રીતે દક્ષિણ ગુજરાતના મૂળ દ્વારકા, વેરાવળ, દીવ, જાફરાબાદ, પીપાવાવ, પોર્ટ વિક્ટર, ભાવનગર, આલંગ, ભરૂચ, દહેજ, મગદલ્લા અને દમણ વિસ્તાર માટે પણ સમાન ચેતવણી જાહેર કરવામાં આવી છે. સત્તાવાળાઓએ સ્પષ્ટ જણાવ્યું છે કે આગામી પાંચ દિવસ સુધી આ વિસ્તારોમાં માછીમારોએ દરિયામાં જવું નહીં, કારણ કે દરિયાની સ્થિતિ જોખમી બની શકે છે અને જીવલેણ અકસ્માતની શક્યતા વધી શકે છે.
3.5 મીટર સુધીના ઊંચા મોજાંનું એલર્ટ
પોર્ટ વોર્નિંગ સાથે INCOIS દ્વારા હાઈ વેવ એલર્ટ પણ જાહેર કરવામાં આવ્યું છે. દેવભૂમિ દ્વારકા, પોરબંદર, ગીર સોમનાથ, ઉત્તર અને દક્ષિણ જૂનાગઢ તેમજ કચ્છના કેટલાક દરિયાકાંઠે 3.0થી 3.5 મીટર સુધીના ઊંચા મોજાં ઉછળવાની આગાહી કરવામાં આવી છે. આ એલર્ટ 4 જુલાઈથી શરૂ થઈને 5 જુલાઈની રાત્રિ સુધી અસરકારક રહેશે. આ દરમિયાન દરિયાકિનારે ફરવા જનાર લોકો, માછીમારો અને દરિયાઈ કામગીરી સાથે જોડાયેલા કર્મચારીઓને વિશેષ સાવચેતી રાખવાની સલાહ આપવામાં આવી છે.
માત્ર માછીમારો નહીં, પ્રવાસીઓએ પણ રાખવી સાવચેતી
દરિયાકાંઠાના વિસ્તારોમાં વરસાદી માહોલ દરમિયાન ઘણા લોકો દરિયો જોવા અથવા પ્રવાસ માટે પહોંચતા હોય છે. જોકે હાઈ વેવ એલર્ટ દરમિયાન ઊંચા મોજાં અચાનક કિનારા સુધી પહોંચી શકે છે. તેથી દરિયાકિનારે ફોટોગ્રાફી, સેલ્ફી અથવા પાણીની નજીક જવું જોખમી બની શકે છે. બંદરો પર કામ કરતી એજન્સીઓ, માછીમારી બોટ સંચાલકો અને અન્ય દરિયાઈ સેવાઓ સાથે જોડાયેલા લોકોને પણ સ્થાનિક પ્રશાસન અને હવામાન વિભાગની સૂચનાઓનું પાલન કરવાની સલાહ આપવામાં આવી છે.
શા માટે જાહેર કરાય છે LC-III સિગ્નલ?
સ્થાનિક કૌશનરી સિગ્નલ-III ત્યારે જાહેર કરવામાં આવે છે જ્યારે બંદર વિસ્તારમાં ખરાબ હવામાન, તેજ પવન અને ઉગ્ર દરિયાઈ પરિસ્થિતિ સર્જાવાની શક્યતા હોય. તેનો મુખ્ય હેતુ દરિયાઈ પરિવહન, માછીમારી અને બંદર પરની કામગીરીને સુરક્ષિત રાખવાનો હોય છે. ચોમાસા દરમિયાન અરબી સમુદ્રમાં હવામાન ઝડપથી બદલાઈ શકે છે. તેથી સત્તાવાળાઓ સમયસર ચેતવણી જાહેર કરીને જાનહાનિ અને અકસ્માતો અટકાવવાનો પ્રયાસ કરે છે.
