ચીને અમેરિકાના રાષ્ટ્રપતિ ડોનાલ્ડ ટ્રમ્પની ચિંતા વધારી છે. તેણે પોતાના પાંચમી પેઢીના સ્ટીલ્થ ફાઇટર જેટ J-20નું અપગ્રેડેડ વર્ઝન J-20A રજૂ કર્યું છે. ચીનમાં તેને ઘાતક "માઈટી ડ્રેગન" તરીકે ઓળખાવવામાં આવી રહ્યું છે. આ ફાઇટર જેટ ચીનની વાયુસેનાની શક્તિમાં નોંધપાત્ર વધારો કરશે. વિશેષજ્ઞોના જણાવ્યા મુજબ, તે અમેરિકાના F-22 અને F-35 જેટલા જ અદ્યતન છે, પરંતુ ટેકનિકલી કેટલીક બાબતોમાં અલગ છે.
ચીને J-20A ને લાંબા અંતરના મિશન માટે ડિઝાઇન કર્યું છે. તેમાં બે શેનયાંગ WS-15 આફ્ટરબર્નિંગ ટર્બોફેન એન્જિન લગાવવામાં આવ્યા છે, જે અત્યંત શક્તિશાળી છે. ચીની એન્જિનિયરોએ દાવો કર્યો છે કે આ એન્જિન અમેરિકાના F-22 અને F-35 જેટનાં એન્જિન કરતા વધુ શક્તિશાળી છે.
J-20Aનું ડિઝાઇન એવી રીતે બનાવાયું છે કે તે રડારથી બચી શકે. તેની આગળની પ્રોફાઇલમાં રડાર ક્રોસ-સેક્શન ખૂબ નીચો છે, જેના કારણે તેને આગળથી શોધવું મુશ્કેલ બને છે. ઉપરાંત, તે ફ્યૂલ એફિશિયન્ટ છે અને લાંબા અંતરના મિશન સરળતાથી પૂરા કરી શકે છે.
હથિયાર ક્ષમતા:
નેશનલ સિક્યુરિટી જનરલના અહેવાલ મુજબ, J-20A ભારે હથિયાર લોડ કરી શકે છે. તે PL-15 અને PL-21 જેવી લાંબા અંતરની હવાથી હવામાં પ્રહાર કરતી મિસાઇલો લઈ જઈ શકે છે. ટૂંકા અંતરની મિસાઇલો માટે તેની બાજુની આંતરિક ખાડીઓમાં વ્યવસ્થા કરવામાં આવી છે, જેથી ખાડીઓ બંધ હોવા છતાં મિસાઇલ ફાયર કરી શકાય.
એર રિફ્યુઅલિંગ ક્ષમતા:
ચીનના નવા આ ફાઇટર જેટની ઇંધણ ક્ષમતા આશરે 12,000 કિલોગ્રામ છે. તેની લડતની રેન્જ લગભગ 2,000 કિલોમીટર સુધી છે. તે હવાથી હવા અને સ્ટ્રાઈક બન્ને પ્રકારના મિશન માટે સક્ષમ છે. સાથે જ તેમાં એર રિફ્યુઅલિંગની અદ્યતન સુવિધા છે, જેના કારણે તે લાંબા સમય સુધી લડાઇ ચાલુ રાખી શકે છે.
ચીની રક્ષા વિશ્લેષકોના જણાવ્યા મુજબ, J-20A માત્ર એક અપગ્રેડ નથી, પરંતુ ચીનની એવિએશન ટેક્નોલોજીમાં મોટો પગલું છે. અમેરિકા માટે હવે એશિયામાં હવાઇ સંતુલન જાળવવું વધુ પડકારરૂપ બનશે.
