WhatsApp યુઝર્સ માટે એક મોટા સમાચાર સામે આવ્યા છે. કંપની ચૂપચાપ એક એવું ફીચર હટાવી રહી છે જેને ક્યારેય ખૂબ જ ધામધૂમથી લોન્ચ કરવામાં આવ્યું હતું. ઘણા યુઝર્સના ફોનમાંથી આ ઓપ્શન ગાયબ પણ થઈ ગયો છે, શું તમારી એપમાં પણ આવું થયું છે?
WhatsApp એ તેના ચર્ચિત 'અવતાર' (Avatar) ફીચરને ધીમે-ધીમે હટાવવાનું શરૂ કરી દીધું છે. એન્ડ્રોઇડ અને iOS બંને પ્લેટફોર્મ પર આ ફેરફાર લાગુ કરવામાં આવી રહ્યો છે. ઘણા યુઝર્સને હજુ સુધી આ અંગે જાણ પણ નથી, કારણ કે આ પ્રક્રિયા તબક્કાવાર કરવામાં આવી રહી છે. અત્યાર સુધી મેટા (Meta) દ્વારા આ ફીચરને હટાવવા પાછળનું કોઈ સત્તાવાર કારણ જણાવવામાં આવ્યું નથી, પરંતુ માનવામાં આવે છે કે યુઝર્સનો ઓછો રસ આની પાછળનું મુખ્ય કારણ હોઈ શકે છે.
AI ઈમેજ ક્રિએશનમાં ભારત આગળ : ChatGPTનો નવો ટૂલ ટ્રેન્ડમાં
યુઝર્સે અવતાર ફીચરને ખાસ ન અપનાવ્યું
જ્યારે આ ફીચર લોન્ચ થયું ત્યારે એવી આશા હતી કે લોકો તેને 'બિટમોજી'ની જેમ ખૂબ ઉપયોગ કરશે. પરંતુ મોટાભાગના યુઝર્સ આજે પણ પોતાની પ્રોફાઇલ ફોટો, ઇમોજી અને સામાન્ય સ્ટિકર્સનો જ વધુ ઉપયોગ કરી રહ્યા છે.
યુઝર્સને મળવા લાગ્યા નોટિફિકેશન
WABetaInfoના રિપોર્ટ અનુસાર, હવે યુઝર્સને એપમાં નોટિફિકેશન મળી રહ્યા છે કે અવતાર એડિટિંગનો વિકલ્પ બંધ કરવામાં આવી રહ્યો છે. ઘણા ફોનમાં તો સેટિંગ્સમાંથી આખું અવતાર સેક્શન પણ ગાયબ થઈ ગયું છે.
હવે નવું નહીં બને અને એડિટ પણ નહીં થાય
હવે યુઝર્સ ન તો નવો અવતાર બનાવી શકશે અને ન તો જૂના અવતારને એડિટ કરી શકશે. અગાઉ સેટિંગ્સમાં જઈને ફેસ, હેરસ્ટાઇલ અને આઉટફિટ કસ્ટમાઇઝ કરવાનો ઓપ્શન મળતો હતો, જે હવે હટાવવામાં આવી રહ્યો છે.
ચેટ અને કીબોર્ડમાંથી પણ હટશે ફીચર
આ ફેરફાર ફક્ત સેટિંગ્સ પૂરતો મર્યાદિત નથી. ચેટ ઇન્ફો સ્ક્રીન અને કીબોર્ડ પરથી પણ અવતાર બનાવવાનો અને તેનો ઉપયોગ કરવાનો ઓપ્શન ધીમે-ધીમે નાબૂદ કરવામાં આવી રહ્યો છે. કંપનીએ આ ફીચરમાં ઘણા એડવાન્સ ઓપ્શન આપ્યા હતા, છતાં હવે તેને બંધ કરવામાં આવી રહ્યું છે.
હવે માણસ વગર બનશે ઘર? : ‘RAnts’ ટેકનોલોજી બદલશે ભવિષ્ય
જૂના સ્ટિકર્સનું શું થશે?
રાહતની વાત એ છે કે જો તમે અગાઉ અવતાર સ્ટિકર્સનો ઉપયોગ કર્યો હોય, તો તે સંપૂર્ણપણે ડિલીટ નહીં થાય. તે તમારા કીબોર્ડના ‘Recent’ અથવા ‘Favourite’ સેક્શનમાં દેખાતા રહેશે.
ધીમે-ધીમે સંપૂર્ણપણે હટી જશે આ ફીચર
જો કે તમે જૂના સ્ટિકર્સ મોકલી શકશો, પરંતુ તેમાં કોઈ ફેરફાર કરી શકશો નહીં કે નવો અવતાર બનાવી શકશો નહીં. આ ફેરફાર ધીમે-ધીમે લાગુ થઈ રહ્યો હોવાથી, થોડા સમય માટે તમારા ફોનમાં આ ફીચર દેખાઈ શકે છે, પરંતુ ટૂંક સમયમાં તે સંપૂર્ણપણે હટાવી દેવામાં આવશે.
