રવિવારે વહેલી સવારે રશિયાએ યુક્રેનની રાજધાની કિવ અને અન્ય વિસ્તારો પર ભારે હવાઈ હુમલો કર્યો, જેમાં ઓછામાં ઓછા ચાર લોકોના મોત થયા અને ડઝનેક લોકો ઘાયલ થયા. 2022થી ચાલી રહેલા પૂર્ણ-સ્તરીય યુદ્ધ પછી કિવ પર થયેલા આ સૌથી મોટા હુમલાઓમાંનો એક ગણાઈ રહ્યો છે.
પોલેન્ડે હવાઈ ક્ષેત્ર બંધ કર્યું
આ હુમલાને પગલે પડોશી પોલેન્ડે દક્ષિણપૂર્વના બે શહેરોની નજીક તેનું હવાઈ ક્ષેત્ર તાત્કાલિક બંધ કરી દીધું હતું. ત્યાંના વાયુસેનાએ ખતરો દૂર ન થાય ત્યાં સુધી ફાઇટર જેટ તૈનાત કર્યા.
રાતોરાત 595 ડ્રોન અને 48 મિસાઇલ ફેંકાયા – યુક્રેન
યુક્રેનના લશ્કરી પ્રવક્તાના જણાવ્યા મુજબ રશિયાએ 595 ડ્રોન અને 48 મિસાઇલ લોન્ચ કરી હતી. યુક્રેનની હવાઈ સંરક્ષણ પ્રણાલીએ તેમાંના 568 ડ્રોન અને 43 મિસાઇલ તોડી પાડ્યા. મુખ્ય નિશાન કિવ શહેર હતું.
રાષ્ટ્રપતિ વોલોદિમિર ઝેલેન્સકીએ જણાવ્યું કે આ હુમલો 12 કલાકથી વધુ સમય સુધી ચાલ્યો હતો, જેમાં કાર્ડિયોલોજી ક્લિનિક, ઔદ્યોગિક ફેક્ટરીઓ અને રહેણાંક મકાનોને ગંભીર નુકસાન પહોંચ્યું.
રશિયાનો દાવો – લશ્કરી માળખાને નિશાન બનાવ્યું
રશિયન સંરક્ષણ મંત્રાલયે દાવો કર્યો કે હુમલો લાંબા અંતરના હવાઈ તથા દરિયાઈ શસ્ત્રો અને ડ્રોન વડે કરવામાં આવ્યો હતો. તેમના મુજબ નિશાન મુખ્યત્વે એરપોર્ટ અને લશ્કરી સુવિધાઓ હતાં.
મોસ્કોએ ફરી એકવાર નાગરિક વિસ્તારોને ટાર્ગેટ કરવાનો ઇનકાર કર્યો, જોકે અત્યાર સુધીના હુમલાઓમાં હજારો નાગરિકોના મૃત્યુ થયા છે અને રહેણાંક વિસ્તારોમાં ભારે નુકસાન થયું છે.
ઝેલેન્સકીએ વૈશ્વિક સમુદાયને અપીલ કરી
હુમલા બાદ ઝેલેન્સકીએ આંતરરાષ્ટ્રીય ભાગીદારોને રશિયાના ઊર્જા ક્ષેત્રની આવક રોકવા માટે તાત્કાલિક પગલાં લેવાની અપીલ કરી. તેમણે કહ્યું, “નિર્ણાયક પગલાં લેવાનો સમય બહુ પહેલાં આવી ગયો છે. અમે યુનાઇટેડ સ્ટેટ્સ, યુરોપ, G-7 અને G-20 દેશોથી મજબૂત પ્રતિસાદની અપેક્ષા રાખીએ છીએ.”
યુક્રેન સતત રશિયા સામે વધુ કડક પ્રતિબંધો લાદવા માટે અમેરિકી રાષ્ટ્રપતિ ડોનાલ્ડ ટ્રમ્પને મનાવવાનો પ્રયત્ન કરી રહ્યું છે, પરંતુ હજુ સુધી તેમાં સફળતા મળી નથી.
