સાબરકાંઠા: રાજ્યમાં ચોમાસાની સિઝન વચ્ચે ખેડૂતો માટે સૌથી મહત્વપૂર્ણ ગણાતી વાવણીની પ્રક્રિયા જોરશોરથી ચાલી રહી છે, ત્યારે સાબરકાંઠાના પ્રાંતિજમાં ખાતર વિતરણ માટે ફરજિયાત બનાવવામાં આવેલી મોબાઇલ એપ્લિકેશન ખેડૂતો માટે માથાનો દુખાવો બની છે. એપ્લિકેશનના ઉપયોગમાં સતત આવી રહેલી ટેકનિકલ ખામીઓ અને વારંવાર સર્વર ડાઉન થવાની સમસ્યાના કારણે ખાતર મેળવવામાં મુશ્કેલી ઊભી થતાં ખેડૂતો વિરોધ પર ઉતરી આવ્યા હતા.
પ્રાંતિજમાં મોટી સંખ્યામાં ખેડૂતો ખાતર વિતરણ કેન્દ્રો પર એકત્રિત થયા હતા અને એપ્લિકેશન આધારિત પ્રક્રિયા સામે સૂત્રોચ્ચાર કરીને પોતાનો રોષ વ્યક્ત કર્યો હતો. ખેડૂતોનું કહેવું છે કે વાવણીના નિર્ણાયક સમયે ખાતર મેળવવા માટે કલાકો સુધી રાહ જોવી પડે છે, છતાં ટેકનિકલ સમસ્યાઓને કારણે ખાતર મળતું નથી.
આ પણ વાંચો: રસ્તાના 'ખાડામાં' AMC ના દાવા! : ડેડલાઇન ફેલ, તંત્રએ આપી નવી તારીખ
એપ્લિકેશનના કારણે વધતી મુશ્કેલી
ખેડૂતોના જણાવ્યા મુજબ ખાતર મેળવવા માટે એપ્લિકેશનમાં વિગતો નોંધાવવી ફરજિયાત બનાવવામાં આવી છે. જોકે ગ્રામ્ય વિસ્તારોમાં નેટવર્કની સમસ્યા, ટેકનિકલ ખામીઓ અને વારંવાર સર્વર ડાઉન થવાના કારણે સમગ્ર પ્રક્રિયા ખોરવાઈ રહી છે.
ઘણા ખેડૂતોને સ્માર્ટફોન અને એપ્લિકેશનના ઉપયોગ અંગે પૂરતી જાણકારી ન હોવાને કારણે પણ મુશ્કેલીઓનો સામનો કરવો પડી રહ્યો છે. પરિણામે ખાતર મેળવવા માટે લાંબી કતારો લાગી રહી છે અને ખેડૂતોને વારંવાર ધક્કા ખાવા પડી રહ્યા છે. ખેડૂતોનો આક્ષેપ છે કે ડિજિટલ વ્યવસ્થા અમલમાં મૂકતા પહેલાં તેની કાર્યક્ષમતા અને ગ્રામ્ય વિસ્તારોની વાસ્તવિક પરિસ્થિતિને ધ્યાનમાં લેવામાં આવી નથી, જેના કારણે હાલની સ્થિતિ સર્જાઈ છે.
આ પણ વાંચો: વડોદરામાં ટ્રાફિક પોલીસની દાદાગીરી! : PSI એ કાર માલિકને લાફો ઝીંકી દીધો, સામે આવ્યો Video
વાવણી ટાણે ખાતર માટે ધક્કા
ખેડૂતો માટે હાલનો સમય અત્યંત મહત્વનો છે, કારણ કે ચોમાસાના વરસાદ બાદ વાવણીની કામગીરી ઝડપથી આગળ વધી રહી છે. આવા સમયે ખાતરની અછત અથવા વિતરણમાં વિલંબ પાક ઉત્પાદન પર સીધી અસર કરી શકે છે.
પ્રાંતિજના ખેડૂતોનું કહેવું છે કે સમયસર ખાતર ન મળવાના કારણે ખેતીના કામકાજમાં વિલંબ થઈ રહ્યો છે. વાવણી માટે અનુકૂળ સમય મર્યાદિત હોય છે અને જો આ સમયગાળામાં ખાતર ઉપલબ્ધ ન થાય તો ઉત્પાદનને નુકસાન થઈ શકે છે. ખેડૂતોના જણાવ્યા મુજબ, ખાતર વિતરણની પ્રક્રિયા સરળ અને ઝડપી હોવી જોઈએ, પરંતુ એપ્લિકેશનના કારણે પરિસ્થિતિ વધુ જટિલ બની ગઈ છે.
ખેડૂતોની મુખ્ય માંગ
વિરોધ પ્રદર્શન દરમિયાન ખેડૂતો દ્વારા એપ્લિકેશન આધારિત પ્રક્રિયા હટાવવાની માંગ ઉઠાવવામાં આવી હતી. ખેડૂતોનું કહેવું છે કે ખાતર વિતરણ માટે અગાઉની જેમ સરળ અને વ્યવહારુ વ્યવસ્થા અમલમાં મૂકવામાં આવે જેથી ખેડૂતોએ ટેકનિકલ સમસ્યાઓનો સામનો ન કરવો પડે.
વિરોધ દરમિયાન ખેડૂતો દ્વારા સૂત્રોચ્ચાર કરીને તંત્ર સમક્ષ રજૂઆત પણ કરવામાં આવી હતી. તેમણે માંગ કરી હતી કે ખાતર વિતરણમાં આવતી ટેકનિકલ અડચણો તાત્કાલિક દૂર કરવામાં આવે અને ખેડૂતોને સમયસર ખાતર ઉપલબ્ધ કરાવવામાં આવે.
