જૂનાગઢ જિલ્લાના વિશ્વવિખ્યાત ગીર વન્યપ્રાણી અભયારણ્યની મુલાકાત લેતા પ્રવાસીઓ માટે મહત્વના સમાચાર સામે આવ્યા છે. ગીર ઈકો ટુરિઝમ ઝોનને 23 જૂન, 2026થી આગામી આદેશ સુધી પ્રવાસીઓ માટે બંધ રાખવાનો નિર્ણય લેવામાં આવ્યો છે. ચોમાસાની ઋતુ અને વન્યજીવોના સંરક્ષણને ધ્યાનમાં રાખીને આ નિર્ણય લેવામાં આવ્યો હોવાનું વન વિભાગ દ્વારા જાહેર કરવામાં આવ્યું છે.
ચીફ વાઇલ્ડ લાઇફ વોર્ડન અને અગ્ર મુખ્ય વન સંરક્ષક (વન્યપ્રાણી)ની સૂચના અનુસાર ગીર વન્યપ્રાણી અભયારણ્યના નિયત કરાયેલા પ્રવાસન રૂટ પર મુલાકાતીઓની એન્ટ્રી 23 જૂનથી બંધ કરવામાં આવશે. આ નિર્ણય અમલમાં આવ્યા બાદ પ્રવાસીઓ ગીરના મુખ્ય જંગલ વિસ્તારની સફારીનો લાભ લઈ શકશે નહીં.
દેવળીયા સફારી પાર્ક ચાલુ રહેશે
ગીર ઈકો ટુરિઝમ ઝોન બંધ રહેશે છતાં પ્રવાસીઓ માટે રાહતના સમાચાર એ છે કે ગીર પરિચય ખંડ દેવળીયા, જેને દેવળીયા સફારી પાર્ક તરીકે ઓળખવામાં આવે છે, તે યથાવત્ ખુલ્લો રહેશે. એટલે કે, ગીરના વન્યજીવોને નજીકથી નિહાળવાની તક પ્રવાસીઓને હજુ પણ ઉપલબ્ધ રહેશે.
દેવળીયા સફારી પાર્ક ગીર અભયારણ્યનો એક વિશિષ્ટ ભાગ છે, જ્યાં નિયંત્રિત અને સુરક્ષિત વાતાવરણમાં એશિયાટિક સિંહ સહિત વિવિધ વન્યજીવોને જોઈ શકાય છે. દર વર્ષે મોટી સંખ્યામાં દેશ-વિદેશના પ્રવાસીઓ દેવળીયા પાર્કની મુલાકાત લે છે.
આ પણ વાંચોઃ અમરેલીમાં યુવકના શિકાર બાદ કેમેરામાં કેદ થયો મિજબાની માણતો સિંહ : વીડિયો ઉતારનાર ટ્રક ચાલક હેડલાઈટ ચાલુ રાખી લાઈવ દ્રશ્ય જોતો રહ્યો
ચોમાસામાં કેમ બંધ થાય છે ગીર?
દર વર્ષે ચોમાસાની શરૂઆત સાથે ગીરના મુખ્ય જંગલ વિસ્તારને પ્રવાસીઓ માટે અસ્થાયી રીતે બંધ રાખવાની પરંપરા છે. વરસાદના કારણે જંગલના માર્ગો કાદવયુક્ત અને જોખમી બની જાય છે. ઉપરાંત આ સમયગાળા દરમિયાન વન્યજીવો માટે પ્રજનન અને કુદરતી વસવાટનું મહત્વનું સીઝન હોય છે.
વન વિભાગ દ્વારા વન્યજીવોના સંરક્ષણ, પર્યાવરણની જાળવણી અને પ્રવાસીઓની સુરક્ષાને ધ્યાનમાં રાખીને આ નિર્ણય લેવામાં આવે છે. સામાન્ય રીતે ચોમાસું પૂર્ણ થયા બાદ પરિસ્થિતિનું મૂલ્યાંકન કરીને ગીર સફારી ફરીથી શરૂ કરવામાં આવે છે.
ઓનલાઈન બુકિંગથી મળશે પ્રવેશ
વન વિભાગ દ્વારા જણાવવામાં આવ્યું છે કે દેવળીયા સફારી પાર્કની મુલાકાત લેવા ઈચ્છુક પ્રવાસીઓ માટે ઓનલાઈન બુકિંગની સુવિધા ચાલુ રહેશે. પ્રવાસીઓ સત્તાવાર વેબસાઇટ મારફતે અગાઉથી બુકિંગ કરાવી શકે છે.
દેવળીયા પાર્કમાં પ્રવાસીઓ માટે નિર્ધારિત સમય અને નિયમો અનુસાર સફારીનું આયોજન કરવામાં આવે છે. જેથી પ્રવાસીઓએ અગાઉથી બુકિંગ કરાવી પ્રવાસનું આયોજન કરવું જરૂરી રહેશે.
આ પણ વાંચો: અમરેલીમાં સિંહોના શિકાર બાદ યુવકનું ધડથી અલગ માથું મળ્યું : ચોથા દિવસે કૂતરું મોઢામાં દબોચી તેનો પગ લઈ આવ્યું, કંપારી છૂટે તેવા દ્રશ્યોથી હડકંપ
ગીરનું પર્યટન અને વૈશ્વિક મહત્વ
ગીર વન્યપ્રાણી અભયારણ્ય વિશ્વમાં એશિયાટિક સિંહોના એકમાત્ર કુદરતી નિવાસસ્થાન તરીકે ઓળખાય છે. દર વર્ષે હજારો દેશી અને વિદેશી પ્રવાસીઓ અહીં સિંહ સહિત વિવિધ વન્યજીવોના દર્શન માટે આવે છે.
ગીર માત્ર પર્યટન સ્થળ જ નહીં પરંતુ જૈવ વૈવિધ્યતા અને વન્યજીવ સંરક્ષણનું મહત્વનું કેન્દ્ર પણ છે. ચોમાસા દરમિયાન અભયારણ્યને આરામ આપવાનો નિર્ણય લાંબા ગાળે પર્યાવરણ અને વન્યજીવોના સંરક્ષણ માટે મહત્વપૂર્ણ માનવામાં આવે છે.
વન વિભાગે પ્રવાસીઓને સૂચના આપી છે કે ગીર સફારી માટે આયોજન કરતા પહેલા સત્તાવાર જાહેરાતો અને સમયપત્રકની માહિતી મેળવી લેવી જોઈએ. હાલ માટે 23 જૂનથી ગીર ઈકો ટુરિઝમ ઝોન બંધ રહેશે, જ્યારે દેવળીયા સફારી પાર્ક પ્રવાસીઓ માટે ખુલ્લો રહેશે.
