Ahmedabad ED Action: સરકારી નોકરીમાં રહીને ગેરકાયદેસર રીતે સંપત્તિ એકઠી કરનારા તત્વો સામે એન્ફોર્સમેન્ટ ડિરેક્ટોરેટ (ED)એ ફરી એકવાર કડક વલણ અપનાવ્યું છે. અમદાવાદ ઝોનલ ઓફિસ દ્વારા પશ્ચિમ રેલવેમાં બોક્સ બોય (પોર્ટર) તરીકે ફરજ બજાવતા પ્રશાંત બળદેવભાઈ રબારી સામે મની લોન્ડરિંગ નિવારણ કાયદા (PMLA) હેઠળ મોટી કાર્યવાહી કરવામાં આવી છે. તપાસ દરમિયાન સામે આવેલા ચોંકાવનારા ખુલાસાઓ બાદ EDએ પ્રશાંત રબારી અને તેના પરિવારના નામે રહેલી અંદાજે રૂ.2.2 કરોડથી વધુની સંપત્તિ પ્રોવિઝનલ એટેચમેન્ટ ઓર્ડર હેઠળ જપ્ત કરી લીધી છે. આ કેસે માત્ર રેલવે તંત્ર જ નહીં પરંતુ સમગ્ર સરકારી વ્યવસ્થામાં ચર્ચા જગાવી છે. સામાન્ય વર્ગ-4ના કર્મચારી તરીકે ફરજ બજાવતો વ્યક્તિ થોડા વર્ષોમાં જ કરોડોની સંપત્તિનો માલિક કેવી રીતે બન્યો તે હવે તપાસનો મુખ્ય વિષય બન્યો છે.
ગુજરાત પોલીસની ફરિયાદ બાદ EDની એન્ટ્રી
આ સમગ્ર મામલાની શરૂઆત ગુજરાત પોલીસ દ્વારા નોંધાયેલી ફરિયાદથી થઈ હતી. પ્રાથમિક તપાસમાં આવક કરતાં વધુ સંપત્તિ એકત્ર કરવાની શંકા વ્યક્ત કરવામાં આવી હતી. ત્યારબાદ EDએ મની લોન્ડરિંગના એંગલથી તપાસ હાથ ધરી હતી. તપાસ દરમિયાન અધિકારીઓને જાણવા મળ્યું કે પ્રશાંત રબારીની સત્તાવાર આવકની સરખામણીએ તેની પાસે રહેલી સંપત્તિ અનેકગણી વધારે હતી. પ્રાથમિક તારણો મુજબ આરોપીએ પોતાની કાયદેસરની આવક કરતાં આશરે 10 ગણી વધુ સંપત્તિ એકઠી કરી હતી, જે ભ્રષ્ટાચાર નિવારણ અધિનિયમ હેઠળ ગંભીર ગુનો ગણાય છે.
માત્ર ચાર વર્ષમાં ઊભું કર્યું કરોડોનું સામ્રાજ્ય
EDની તપાસમાં ખુલાસો થયો છે કે, 1 જાન્યુઆરી 2017થી 2 ફેબ્રુઆરી 2021 દરમિયાન પ્રશાંત રબારીએ પોતાના અને પત્નીના નામે આશરે ₹2.58 કરોડની મિલકતો ઉભી કરી હતી. સામાન્ય પગારધોરણ ધરાવતા કર્મચારી માટે આટલી મોટી સંપત્તિ ઊભી કરવી શક્ય ન હોવાથી તપાસ એજન્સીઓએ તેના આવકના સ્ત્રોતોની ઊંડાણપૂર્વક તપાસ શરૂ કરી હતી. તપાસ દરમિયાન અનેક શંકાસ્પદ નાણાકીય વ્યવહારો પણ સામે આવ્યા હોવાનું જાણવા મળ્યું છે.
રેલવે સામગ્રીની ચોરીથી કમાયો કરોડો રૂપિયા
તપાસ એજન્સીઓના જણાવ્યા અનુસાર, પ્રશાંત રબારી પશ્ચિમ રેલવેના સાબરમતી કાળી ગામ વિસ્તારમાં પોર્ટર તરીકે ફરજ બજાવતો હતો. ફરજ દરમિયાન તેને રેલવેની વિવિધ સામગ્રી સુધી સરળતાથી પહોંચ મળી રહેતી હતી. આરોપ છે કે, તેણે લાંબા સમય સુધી રેલવેની કિંમતી સામગ્રી જેમ કે સ્ટીલ, તાંબુ અને પિત્તળની ચોરી કરી હતી. બાદમાં આ સામગ્રી ખાનગી રીતે વેચીને મોટી રકમ મેળવવામાં આવતી હતી. આ ગેરકાયદેસર કમાણીથી તેણે પોતાની સંપત્તિમાં સતત વધારો કર્યો હતો.
10 ટકા વ્યાજે ચલાવતો હતો નાણાં ધિરાણનો ધંધો
EDની તપાસમાં વધુ એક મહત્વનો ખુલાસો થયો છે. તપાસ અનુસાર પ્રશાંત રબારી માત્ર ચોરીની કમાણી સુધી જ સીમિત રહ્યો નહોતો, પરંતુ તે ઊંચા વ્યાજે નાણાં ધિરાણ આપવાનો ધંધો પણ ચલાવતો હતો.
અધિકારીઓના જણાવ્યા મુજબ, તે આશરે 10 ટકા જેટલા ઊંચા વ્યાજ દરે લોકોને રૂપિયા આપતો હતો. આ પ્રવૃત્તિમાંથી પણ મોટી માત્રામાં ગેરકાયદેસર આવક થતી હતી. તપાસમાં આવા અનેક નાણાકીય વ્યવહારોની વિગતો મળી હોવાનું જણાવવામાં આવ્યું છે.
આ પણ વાંચો: રસ્તાના 'ખાડામાં' AMC ના દાવા! : ડેડલાઇન ફેલ, તંત્રએ આપી નવી તારીખ
EDએ કઈ મિલકતો જપ્ત કરી?
તપાસ દરમિયાન પ્રશાંત રબારી અને તેની પત્નીના નામે ખરીદવામાં આવેલી અનેક કિંમતી મિલકતો સામે આવી હતી. EDએ હાલમાં જે સંપત્તિઓ જપ્ત કરી છે, તેમાં કાળી ગામ વિસ્તારમાં આવેલો આશરે 700 વારનો પ્લોટ સામેલ છે. આ ઉપરાંત અમદાવાદના ન્યૂ ચાંદખેડા વિસ્તારમાં આવેલા બે રહેણાંક ફ્લેટ પણ જપ્ત કરવામાં આવ્યા છે. તપાસમાં એવું પણ સામે આવ્યું છે કે, આરોપી પાસે અનેક કિંમતી વાહનો હતા, જે તેની સત્તાવાર આવકની સરખામણીએ અસંગત ગણાય છે.
મની લોન્ડરિંગના એંગલથી તપાસ યથાવત
EDના અધિકારીઓ હવે આ સંપત્તિ ખરીદવા માટે ઉપયોગમાં લેવાયેલા નાણાંના સ્ત્રોતો, બેંક ટ્રાન્ઝેક્શન અને અન્ય સંબંધિત વ્યક્તિઓની ભૂમિકાની પણ તપાસ કરી રહ્યા છે. તપાસ દરમિયાન વધુ મિલકતો અથવા નાણાકીય વ્યવહારો સામે આવે તેવી શક્યતા નકારી શકાય નહીં. આ કેસ ફરી એકવાર દર્શાવે છે કે, સરકારી તંત્રમાં રહેલા કેટલાક તત્વો ગેરકાયદેસર રીતે સંપત્તિ ઉભી કરવાનો પ્રયાસ કરે છે, પરંતુ તપાસ એજન્સીઓ હવે આવા કેસોમાં વધુ સક્રિય બની રહી છે. આગામી દિવસોમાં આ કેસમાં વધુ મોટા ખુલાસા થવાની સંભાવના વ્યક્ત કરવામાં આવી રહી છે.
